Paul Maxime Nurse
Sir Paul Maxime Nurse (* 25. Januar 1949 in Norwich, England) is en britisch Biochemiker, de 2001 mit den Nobelpries för Physiologie oder Medizin uttekent wurrn is.
Leven ännern
Nurse wurr an‘ 25. Januar 1949 in England boren. Nah Afsluss vun sien Schoolutbillen hett he an de Universitäten Birmingham un East Anglia studeert. In Birmingham hett he 1970 sien Bachelor maakt un in East Anglia 1973 sien Doktertitel. Ansluutend weer he wetenschaplich Mitarbeiter an de Universitäten vun Bern, Edinburgh, Kopenhagen und Sussex. 1987 is Nurse den Roop vun de University of Oxford folgt, wo he bit 1993 as Perfesser tätig weer. Dornah is he an dat Krebsforschungszentrum ICRF (Imperial Cancer Research Fund) in London wesselt, wo he 1996 Generaldirekter wurr. Siet September 2003 is he Präsident vun de Rockefeller University in New York. 2010 is he Präsident vun de Royal Society wurrn. Siet Anfang 2011 is he Direkter vun dat Francis Crick Institute.
En wetenschaplich Swoorpunkt vun Nurse is de Erforschung vun de biologisch Slöötelkomponenten vun den so nömmten Zellzyklus. Mit genetischen un molekularbiologischen Methoden hett Nurse dat schafft, in Hefezellen dat Gen för en vun disse Komponenten, en cyclinafhängig Kinase, utfindig to maaken. Kinasen sünd spezielle Enzyme, Cycline spezielle, wiels de Zellwasdomsphase bild Proteine. Beid nehmen en Slöötelpositschoon bi de Mitose un dormit ok bi den Zellzyklus in. Nurse sien Kolleeg Richard Timothy Hunt kunn rutfinnen, dat sück de Cycline in de Wasdomsphase mit de cyclinafhängigen Kinasen verbinnen. Dör dissen Vörgang aktiveert, fangen de Enzyme an, bestimmte Eiwitten mit Phosphorsüermolekülen to verbinnen. Disse Vörgang führt sluutend to de Synthesephase, dat heet, dat sett en Verdüppeln vun dat Arvmaterial in.
De Opdecken vun Nurse un Hunt hemm fundamentale Bedüüden för dat Verständnis, welker Rull de Cyclinen in‘ Zellzyklus tokummt. De Forschungsergevnisse hemm aber ok to nee Perspektiven för künftige Behannelnsmethoden vun Krebserkrankungen führt.
Utteknungen ännern
- 1989 Liddmaat (Fellow) vun de Royal Society
- 1992 Wellcome Prize vun de Royal Society
- 1992 Gairdner Foundation International Award
- 1995 Royal Medal vun de Royal Society
- 1996 Dr. Josef Steiner Krebsforschungspries
- 1997 Alfred P. Sloan, Jr. Prize
- 1998 Albert Lasker Award for Basic Medical Research
- 2001 Nobelpries för Physiologie oder Medizin gemeensam mit Richard Timothy Hunt un Leland Harrison Hartwell
- 2005 Copley Medal vun de Royal Society
- 2006 Upnahm in de American Academy of Arts and Sciences
- 2010 Ehrendokterwürden vun de Dalhousie University un de Universität Soltborg
- 2013 Albert Einstein World Award of Science
- 2016 Ehrenliddmaat vun de British Academy.
Warken ännern
- Paul Nurse: The Great Ideas Of Biology: The Romanes Lecture For 2003 (Romanes Lecture). Oxford University Press, Oxford 2004. ISBN 0-19-951897-1
Weblenken ännern
- Nurse up de Sieden vun den Nobelpries (engelsch)
- Kört Afreet över Nurse bi de Tietschrift Nature