Rebecca (Film)
| Filmdaten | |
|---|---|
| Plattdüütsch Titel: | — |
| Originaltitel: | Rebecca |
| Düütsch Titel: | Rebecca |
| Produkschoonsland: | USA |
| Johr vun’t Rutkamen: | 1940 |
| Läng: | 126 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | Alfred Hitchcock |
| Dreihbook: | Philip MacDonald Michael Hogan Robert E. Sherwood Joan Harrison |
| Produkschoon: | David O. Selznick |
| Musik: | Franz Waxman |
| Kamera: | George Barnes |
| Snitt: | William Hamilton |
| Szenenbild: | Lyle R. Wheeler |
| Dorstellers | |
| |
Rebecca is de Titel vun en US-amerikaanschen Speelfilm vun den beropenen Speelbaas Alfred Hitchcock ut dat Johr 1940. Togliek weer dat de eerste Film, den Hitchcock in Hollywood dreiht hett. De Geschicht baseert op den glieknöömten Roman vun Daphne du Maurier.
Inholt ännern
En schuulsche Sellschoppersche hollt sik mit ehr langwieligen Baas’sche in Monte Carlo op un dröpt dor den rieken Maxim de Winter. Maxim steiht noch vull ünner den Indruck vun den Dood vun sien eersten Fro Rebecca, de een johr vörher bi en Unfall mit en Boot ümkamen is. De junge Sellschoppersche verkiekt sik in Maxim, de ehr denn ok en Heiraatsandrag maken deit. He nimmt ehr mit na Manderley in Cornwall op sien groten düsteren Landsitt. As se dor ankummt, maakt se de Bekanntschop vun de Huushöllersche Mrs. Danvers, de gresig ieversüchtig is un Rebecca deep verehrt hett. Se sett allns doran, de junge Ehfro dat Leven swoor to maken, üm ehr in den Wahn un to’n Sülvstmoord to drieven. All Lüüd in’t Huus staht ünner en snaakschen Influss vun de do’en Rebecca.
As unvermodens dat Boot vun Rebecca funnen warrt, gifft Maxim sien Fro gegenöver to, dat he un Rebecca sik in Wohrheit hasst hebbt. Se harr em ingestahn, dat se en Kind vun en annern Mann kriegen deit. Dorophen harrn se sik in de Wull kregen, un Rebecca weer in’n Verloop vun den Striet so unglücklich strumpelt, dat se doodbleven is. An dat Boot warrt aver faststellt, dat dat vun binnen (vun Maxim, de sik mit en Biboot in Sekerheit bröcht harr) twei maakt un versenkt worrn is. Natürlich kummt de Fall vun Rebecca ehrn Dood vör Gericht, woneem Maxim aver vun de Schuld freesproken warrt. Mrs. Danvers leggt dorophen Füür in dat Goot Manderley. Dat Landhuus, dat mit so veel Gedanken an fröher belast is, liggt an’t Enn in Schutt un Aschen, un mit dat Huus ok dat Andenken an de do’e Rebecca.
Al in de Inleitung vun den Film hett de tweete Mrs. de Winter – ehr Naam warrt in’n Film nie kundgeven – dit Enn vörrutnahmen, as se seggen de, dat „se nie wedder (na Manderly) torüchkehren künnt“.
Kritik ännern
- Dat Lexikon vun’n internatschonalen Film beschreev Rebecca as en romantisch-määrkenhaftigen Thriller un loov de dichte Atmosphäär, de rutragenden Schauspelers un de GEschicht, de spannend entwickelt weer.[1]
- De Evangeelsche Film-Beobachter snack vun en ölleren Hitchcock-Film na den Roman vun Daphne du Maurier, de vele Details barg, de jemehrn Reiz harrn. In’n Gansen keem de Film aver nich an de mysteriöse Spannung ran, de de besten Warken vun Hitchcock utteken de.[2]
- Dat Handbook vun de kathoolschen Filmkritik meen, dat dat en psycholoogschen Film mit Anspröök weer, na den glieknöömten, ’n beten künstelten Roman, de mit ungewöhnliche Kunstmiddels akkerat int Bildliche överdragen weer.[3]
Utteken ännern
Rebecca weer alltohopen twölfmol för Filmpriesen vörslahn. Alleen för den Oscar weer de Film in ölven Kategorien nomineert. Uttekent weer Rebecca mit dre Priesen:
- 1940: mit den NBR Award in de Kategorie Top Ten Films
- 1941: mit den Oscar in de Kategorie Best Film för David O. Selznick
- 1941: mit den Oscar in de Kategorie Best Kamera (swartwitt) för George Barnes
Produkschoon ännern
Rebecca weer de eerste Speelfilm vun Hitchcock, den he in de USA dreiht hett. De Grundlaag to den Film weer de Romanvörlaag vun Daphne de Maurier ut dat Johr 1938, de weltwiet en Bestseller worrn is. Hitchcok hett al 1938 den Produzenten David O. Selznick Rebecca as mööglichen eersten gemeensomen Film vörslhan. To de Tiet weern Hitchcock de Rechten an dat Book to düür, anners harr he sülvt togrepen. Sleznick weer vun den Vörslag andoon un sik sik de Filmrechten foorts anegent. Hitchcock sien Verdrag mit Selznick güng eerst een Johr later los.
De eerste Faten vun’t Dreihbook keem bei Selznick gor nich goot an. As Hitchcock dat vun sien Arbeit in England wennt weer, is he düütlich vun de Romanvörlaag afweken un hett den Inholt, de Figuren un de Öörd afännert Butendem hett he ok ordig Humor toföögt. Selznick hett dat teemlich argert un he schreev Hitchcock en bannig lang Memo, in dat he düütlich sien Ansichten verkloren de. Selznick bestünn dorop, dat dat Wark nip un nau ümsett warrt. En annert Problem weer de Motion Picture Production Code, de dormols för Filmprodukschonen de Moralvörstellen fastschreev, de begäng weern. Na den Code dröff to’n Bispeel Maxim de Winter as Möörder vun sien eerste Fro Rebecca nich ahn Straaf dorvun kamen – anners as in der Romanvörlaag. Man keem also nich ümhen, Rebecca ehrn Dood as Unfall dortostellen. Hitchcock hett en Insehn hatt un dat eerste, fardige Dreihbook ümschrieven laten.
In’t Fohrwater vun den jüst vörher dreihten Spood Gone with the Wind wull Selznick ut de Söök na de Hööftdorstellersche för Rebecca en jüst so grote Publicity-Akschoon maken as vörher. Mehr as twintig Schauspelerinnen hebbt sik för de Rull vun de tweeten Mrs. de Winter vörstellt, un mit tomindst en Dutz dorvun weern ok Proovopnahmen maakt, so as Loretta Young, Anne Baxter (mit de Hitchcock later I Confess dreiht hett), Margaret Sullavan un Vivien Leigh, de dormols mit Laurence Olivier tosamen weer. Olivier stünn as Hööftdorsteller al fast un hett sik bannig för ehr stark maakt. Hitchcock hett sik opletzt op för Joan Fontaine fastleggt, de he vörher al in den Film The Women sehn harr[4].
De Dreiharbeiten hebbt för en teemlich anspannten Ümgang twüschen Hitchcock un Selznick sorgt. Hitchcock sien Arbeitswies weer, blots dat to Dreihn, wat ok för den fardigen Film bruukt warrt. Dormit keem Selznick nich recht kloor, vunwegen dat he dat wennt weer, bi’n Snitt ut de mehrfack ut verschedene Persepktiven dreihten Szenen to wählen un so dat wünschte Tempo in’n Film to kriegen. Mit Hitchcock sien Methood güng dat aver nich. En sünnere Last harr Joan Fontaine mit de Dreiharbeiten. Hitchcock hett keen Gelegenheit utlaten ehr to vertellen, dat ehr an’n Set keeneen lieden künn, mit Utnahm vun em sülvst. Bi Fontaine föhr dat to en depressive Verstimmen. De Rull vun de unschienboren inschüchterten Ehfro hett se in ehrn Tostand sünners övertügend speelt – wat dat nu Afsicht vun Hitchcock weeer oder ok nich.
De Produkschoon hett mehr as een Million US-Dollar köst un weer bit dorhen Hitchcock sien düürsten Film. Vun de Presse un vun de tokiekers weer de Film mit veel Freid opnahmen. As eenzigen Hitchcock-Film weer Rebecca mit en Oscar as besten Film uttekent. De Pries güng aver an David O. Selznick. Hitchcock sien eerste US-Produkschoon, de vun’n Stil, vun’t Ambiente un ok vun de Utwahl vun de Schauspelers noch teemlich britisch weer, hett blangento en Stück tyypsch britische Fronsböverkleedaasch weltwiet bekannt un populär maakt: de Strickjack mit runnen Hals, de Joan Fontaine in vele Szenen an harr, warrt ok vundaag noch in’t Spaansche un sünners in Latienamerika as Rebeca betekent[5]. Üm de düstere Atmosphäär vun’t Book to wohren, hett Hitchcock besloten, den Film in swartwitt to dreihn. Dormit stünn de Film in’n Kuntrast to de buntklöörten Selznick-Produkschoon Gone with the Wind, de dat Vörjohr bestimmt harr[6].
De Premiere vun den Film weer an’n 27. März 1940 in Los Angeles. In Düütschland weer he dat eerste mol an’n 6. Juni 1951 in’n Titania-Palast in Berlin-Steglitz to sehn as Optaktfilm vun de eersten Berlinale. Rebecca lööp dor buten de Konkurrenz. In de düütschen Kinos keem de Film in’n Oktober 1951.
Literatur ännern
- Daphne du Maurier: Rebecca (OT: Rebecca). Fischer, Frankfort an’n Main 1999, ISBN 3-596-50395-7
- Hans-Jürgen Kubiak: Die Oscar-Filme. Die besten Filme der Jahre 1927/28 bis 2004. Die besten nicht-englischsprachigen Filme der Jahre 1947 bis 2004. Die besten Animationsfilme der Jahre 2001 bis 2004. Schüren, Marborg 2005, ISBN 3-89472-386-6
- John Russell Taylor: Die Hitchcock-Biographie. Alfred Hitchcocks Leben und Werk (Originaltitel: Hitch, the Life and Work of Alfred Hitchcock). Düütsch vun Klaus Budzinski. Fischer-Cinema. Fischer-Taschenbuch-Verlag, Frankfort an’n Main 1982, 402 S., ISBN 3-596-23680-0
- Donald Spoto: Alfred Hitchcock - Die dunkle Seite des Genies. Heyne, München 1984, ISBN 3-453-55146-X (hoochdüütsche Översetten vun Bodo Fründt)
Borns ännern
- ↑ Filmkritk in’t Lexikon vun’n internatschonalen Film; CD-ROM-Utgaav, Systhema, München, 1997
- ↑ Evangelischer Film-Beobachter, Kritik Nr. 171/1951
- ↑ 6000 Filme. Kritische Notizen aus den Kinojahren 1945 bis 1958. Handbook V vun de kathoolschen Filmkritik, 3. Oplaag, Verlag Haus Altenberg, Düsseldörp 1963, S. 350
- ↑ http://www.imdb.com/title/tt0032976/trivia
- ↑ http://buscon.rae.es/
- ↑ http://www.imdb.com/title/tt0032976/trivia
Weblinks ännern
- Rebecca in de Internet Movie Database (engelsch)
- Toondräger mit de Filmmusik