Reer

Wapen/Flagg	Koort
Basisdaten
Bundsland: Neddersassen Landkreis: Veern Samtgemeen: Thänhusen Gemeen: Blenner
Inwahners:
Postleettall:	27337
Vörwahl:	04233
Geograafsche Laag:	52° 57′ N, 9° 9′ O

Reer (hoochdüütsch Reer) is en Dörp in de Gemeen Blenner (Samtgemeen Thänhusen) in’n Landkreis Veern, Neddersassen. Binnen de Gemeen höört dat Dörp bi Intschen mit bi.

Geografie

De Oort liggt in de Masch von de Werser. Dat Water ut dat Rebeed flütt över Gravens na de Werser hen af.

De Naveröörd sünd Winkel in’n Noorden, Eeßel in’n Noordoosten, de Holbmer Winkel in’n Oosten, Ritzenbargen un Aondörp in’n Süüdoosten, Blenner un Hidzdörp in’n Süüdwesten, Wulmsdörp in’n Westen un Intschen in’n Noordwesten.

Historie

Reer kummt 1260 as Redere toeerst in de Oorkunnen vör.

Verwaltungsgeschicht

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Intschen in’n Kanton Thänhusen höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Intschen in’n Kanton Thänhusen.

De Oort hett vör 1852 to de Vaagdie Intschen in dat Amt Wessen-Thänhusen tohöört un denn von 1852 bet 1859 to dat Amt Swarm. As dat Amt Swarm 1859 oplööst worrn is, keem Intschen mit Reer an dat Amt Veern. Na 1885 weer dat in’n Kreis Veern, de 1932 mit’n Kreis Achem to’n ne’en un grötteren Kreis Veern tohoopgahn is.

De Oort hett al von öllers bi de Gemeen Intschen mit bihöört, de an’n 1. Juli 1972 mit de Gemeenreform in Neddersassen Deel von de Gemeen Blenner worrn is.

Inwahnertall

Johr	Inwahners
1791-00-001791	17 Füürsteden
1812-00-001812	166
1824-00-001824	18 Füürsteden
1848-00-001848	162 Lüüd, 27 Hüüs
1871-12-011. Dezember 1871	134 Lüüd, 26 Hüüs
1885-12-011. Dezember 1885	143 Lüüd, 25 Hüüs
1905-12-011. Dezember 1905	121 Lüüd, 22 Hüüs

Religion

Reer is evangeelsch-luthersch präägt un höört to dat Kaspel von de Michaelis-Kark in Intschen.

För de Kathoolschen is de St.-Josef-Kark in Veern tostännig.

Weertschop un Infrastruktur

För Reer is de freewillige Füürwehr Intschen mit tostännig.

Verkehr

De eenzigen Straten ut Reer rut loopt na Intschen un na Aondörp. In Intschen föhrt düsse Straat an de Kreisstraat 9, de in’n Noordoosten na Dauben/Langwedel an de Landsstraat 158 ran geiht un in’n Süden na Blenner an de L 203. De L 203 föhrt von Blenner in’n Noordwesten över Wulmsdörp un Morsen na Thänhusen un in’n Oosten bi Veern an de Bundsstraat 215.

De nächste Autobahn is de Autobahn 27 (Afsnidd Bremen–Wasra). De Opfohrt 24b Langwedel liggt so negen Kilometer in’n Noordoosten von Reer an de K 9.

De nächste Bahnhoff is so bi acht Kilometer wied weg in’n Noordoosten de Bahnhoff Langwedel an de Bahnlien Wunsdörp–Bremen.

Scholen

De Kinner ut Reer gaht vondaag na de Grundschool Blenner.

En Volksschool in Reer is toeerst 1768 nawiest. In de Tied weer de School noch ümschichtig in de Buurnhüüs. Eerst 1781 is dat eerste Schoolhuus boot worrn. Dat Schoolhuus is 1842 utboot worrn, aber 1856 na en Blitzslagg afbrennt. 1857 is dat an’n Schoolweg 117 wedder opboot worrn. De School is to’n 1. Oktober 1923 oplööst worrn.

Lüüd

De Jurist Ernst Klemeyer is 1904 in Reer boren.