Mairie Intschen
De Mairie Intschen weer in de Franzosentied (1810 bet 1813) een von de veer Mairien, in de de Kanton Thänhusen indeelt weer. De Seet weer in Intschen. Se harr 2675 Inwahners.[1]
Historie
ännernDe Ümgegend von Intschen hett vör de Franzosentied to dat Amt Heien in de Graafschop Heien un dat Amt Wessen-Thänhusen in dat Förstendom Lümborg höört, wat allens in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Intschen een von de söven Mairien in’n Kanton Thänhusen von’n Distrikt Veern, Departement von de Elv- un Wersermünnen.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Intschen weer nu een von de veer Mairien in’n Kanton Thänhusen, Distrikt Bremen, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to söss Mairien höört harrn: de Mairie Intschen ut’n Kanton Thänhusen un de Mairien Hustäe, Öste, Einste, Blenner un Swarm ut’n Kanton Mattfeld. Von de Mairie Hustäe is blots de Oort Holbm mit Nee-Holbm an de Mairie Intschen kamen. Hustäe sülvs is an de Mairie Mattfeld gahn. Von de Mairie Swarm is blots de Oort Aodolshüsen an de Mairie Intschen gahn un de Rest an de Mairie Emhusen.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd
ännernDor hebbt düsse Öörd tohöört:
- Kaiserriek Frankriek:[1]
- Intschen (642 Inwahners), Holbm (123), Nee-Holbm (94), Öste (339), Einste (247), Varste (161), Blenner (439), Ritzenbargen (102), Neddern Hu’e (14), Aondörp (89), Aodolshüsen (62), Goolstörp (32), Reer (166), Hidzdörp (121), Winkel (44)
Vondaag sünd düsse Öörd all Deel von de Gemeen Blenner.
Footnoten
ännern- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 100
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 20