Kanton Thänhusen

De Kanton Thänhusen weer as Kanton en Verwaltungsrebeed in de Franzosentied (1807-1813). De Seet weer Thänhusen.

Historie ännern

Dat Rebeed weer vörher opdeelt op twee Staten: dat Amt Wessen-Thänhusen hett to de Graafschop Heien (Kurförstendom Hannover) höört un dat Amt Thänhusen as Exklaav to dat Förstendom Bruunswiek-Wulfenbüttel.

Dat Franzöösche Kaiserriek harr siet 1803 dat Kurförstendom besett hollen. Dat Förstendom Bruunswiek-Wulfenbüttel weer siet 1807 ok von Frankriek besett. Op Delen von dat besett Rebeed is 1807 dat Königriek Westfalen utropen worrn, wat en Vasallenstaat von dat Franzöösche Kaiserriek weer. Dat bruunswiek-wulfenbüttelsche Amt Thänhusen weer nu Deel von düssen Staat un hett den Kanton Thänhusen in’n Distrikt Rinteln billt, de to dat Departement von de Werser höört hett.

An’n 1. März 1810 hett de westfäälsche König Hieronymus kund daan, dat ok dat Kurförstendom Hannover Deel von sien Königriek warrt. De Verwaltungsrebeden sünd dorbi nee indeelt worrn. Binnen Westfalen weer de Kanton Thänhusen nu een von de ölven Kantons in’n Distrikt Veern von dat Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Kanton Thänhusen weer nu een von de ölven Kantons, ut de de Distrikt Bremen in dat Departement von de Wersermünnen tohoopsett weer.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover un dat Förstendom Bruunswiek-Wulfenbüttel sünd denn wedder herstellt worrn un de ole Stand von vör 1810 wedder dor.