Rodwell Ferguson

Rodwell Stephen Ferguson Sr. (* 1962) is en Politiker ut Belize (PUP).

Leven

Ferguson is 1962 boren. He hett Bookholler lehrt un en Diplom an de International Correspondence Schools maakt. Von 1978 bet 1985 weer he Lohnbookholler bi de Belize Food Products Limited, von 1985 bet 1993 bi dat sülve Ünnernehmen Baas för’n Inkoop un dat Lagerhollen un denn von 1993 bet 2002 Bürobaas bi de Patrick Polack Group. Düssen Job hett he opgeven, as he in de Politik gahn is.

Ferguson is verheiraadt un hett fiev Kinner. He leevt in Pomona un bedrifft dor en Hotel.

Politik

Bi de Parlamentswahl in Belize 2003 weer he Kannedaat för de PUP in’n Wahlkreis Stann Creek West un hett de Wahl mit 55,93 % von de Stimmen gegen Glenford Eiley von de UDP wunnen. Bi de Wahl 2008 weer he in’n sülven Wahlkreis Kannedaat, kunn sik aver mit 41,99 % von de Stimmen nich gegen Melvin Hulse von de UDP dörsetten.

Bi de Wahl 2012 hett he 53,44 % von de Stimmen haalt un dormit gegen Melvin Hulse wunnen. Bi de Wahl 2015 hett he sik bi acht Stimmen Vörsprung mit 49,44 % wedder dörsett, dütmaal gegen Walter H. Garbutt von de UDP.

Dormit weer he von März 2003 bet Februar 2008 un siet März 2012 Afornten von dat Repräsentantenhuus von Belize.

Ünner Premierminister Said Musa weer he Staatsminister in verscheden Ministerien. Von März 2003 bet 2004 in dat Binnenministerium ünner Minister Ralph Fonseca, von’n 29. Dezember 2004 bet 2005 in dat Ministerium för Tourismus ünner Minister Godfrey Smith un von 2005 bet 2007 in dat Ministerium för Bildung ünner Minister Francis Fonseca.

An’n 4. Juni 2007 is he Maat von dat Kabinett Musa II worrn, as he den Posten as Minister för Natschonale Sekerheit, Junge Lüüd un Sport von Cordel Hyde övernahmen hett. He is bet to de nächste Wahl in’n Februar 2008 Minister bleven, as de UDP de Macht övernahmen hett.