Rosengoorn (Hamborg)

Wapen/Flagg	Koort
Basisdaten
Bundsland: Hamborg Bezirk: Horborg Stadtdeel: Neefeld
Inwahners:
Postleettall:	21129
Vörwahl:	040
Geograafsche Laag:	53° 31′ N, 9° 49′ O

Rosengoorn (hoochdüütsch Rosengarten) is en lütt Oort, de to’n Stadtdeel Neefeld (Bezirk Horborg) in de Hansestadt Hamborg höört.

Geografie

Rosengoorn liggt in de Masch von de Ünnerelv in Oolland. Fröher leeg in’n Noorden von’n Oort dat Möhlenbarger Lock un in’n Oosten de Süderelv. Dör den Utbo von de Lannbahn von dat Airbus-Wark Finkwarder in de Johren 2001 bet 2003 sünd Möhlenbarger Lock un Süderelv deelwies toschüddt worrn. Wat von de Süderelv nableven is, billt nu de Ole Süderelv. Wat von dat Möhlenbarger Lock nableven is, is as Naturschuulrebeed schuult.

De Naveröörd sünd Finkwarder in’n Noordoosten, Francop un Veertigstücken in’n Süüdoosten, Nincop in’n Süden, Hasselwarder in’n Süüdwesten, Liedenkummer in’n Westen un Cranz in’n Noordwesten.

Historie

Dat Rebeed von’n Rosengoorn is in’t Middelöller dör en Ringdiek indiekt worrn, de vör de Haupt-Dieklien von Neefeld leeg. Eerst in dat 20. Johrhunnert is de Neefeller Hauptdiek anleggt worrn, mit den de Diek von Rosengoorn in de twete Dieklien rückt is.

Dör den Utbo von de Lannbahn von dat Airbus-Wark Finkwarder in de Johren 2001 bet 2003 müss en Deel von’n Oort wieken. Dorbi is denn ok en groten Deel von’n olen Ringdiek verswunnen.

Verwaltungsgeschicht

De Oort hett vör 1852 to de Hauptmannschop Hasselwarder in dat Grevengericht Oolland tohöört un denn von 1852 bet 1885 to dat Amt Jörk. Na 1885 weer dat in’n Kreis Jörk un 1932 is dat Deel von’n Kreis Horborg worrn. Aver al mit dat Groot-Hamborg-Gesett von 1937 is de Oort denn an Hamborg kamen.

Inwahnertall

Johr	Inwahners
1871-12-011. Dezember 1871	61 Lüüd, 11 Hüüs

Religion

Rosengoorn is evangeelsch-luthersch präägt un höört to dat Kaspel von de Pankratius-Kark in Neefeld.

För de Kathoolschen is de Hillig-Krüüz-Kark in Neegraven tostännig.

Weertschop un Infrastruktur

Verkehr

Rosengoorn liggt dicht bi de Finkwarder Ümgehungsstraat, de 2012 trech worrn is. De direkte Togang is aver sparrt, dorüm is en Ümweg von twee Kilometer nödig. Över de Ümgehungsstraat kummt een na Waltershoff un an de Autobahn 7 (Afsnidd Hamborg–Hannover). De Opfohrt 30 Waltershoff liggt so ölven Kilometer in’n Oosten von Rosengoorn an de Finkwarder Straat.

Ans gifft dat Straten, de över Neefeld na Jörk, Buxthu, Vosshusen un Neegraven gaht.

De nächste Bahnhoff is so bi twölv Kilometer wied weg in’n Süüdwesten de Bahnhoff Buxthu an de Nedderelvbahn. De Bahnhoff Vosshusen von de S-Bahn Hamborg (S 3/S 31) liggt so söven Kilometer in’n Süden.