Sells

Sells is en Dörp mit 1.810 Inwahners (Stand 29. Februar 2012), dat to de Eenheitsgemeen Schippdörp in’n Landkreis Cuxhoben höört. Dat liggt sowat söven Kilometer to’n Oosten vun Bremerhoben. Oortsbörgermeester is Ralf Wolter (SPD).

Wapen/Flagg

Koort

Basisdaten

Bundsland: Neddersassen

Landkreis: Cuxhoben

Gemeen: Schippdörp

Inwahners:

1.810 (2012-02-2929. Februar 2012)

Postleettall:

27619

Vörwahl:

04703

Geograafsche Laag:

Koordinaten:53° 31′ N, 8° 44′ O53° 31′ N, 8° 44′ O

Laag von Sells in de Gemeen Schippdörp (Koort lett sik anklicken)

Geografie

Sells liggt op de Geest. To’n Noorden liggt dat Ollenmoor un de Sellser See. Dat Rebeet steiht ünner Naturschutz. De Geest löppt so bi dree Kilometer to’n Noorden vun Sells langs. Naveröörd sünd to’n Oosten Wehdel, Donnern in’n Süden un Schippdörp na’n Westen. In’n Noorden sünd achter’t Ollenmoor Bramel un Elm de nächsten Navers.

Historie

Toeerst in de Oorkunnen kummt dat Dörp 1139 as Scelligstede vör, as en Thrutbert den Arzbischop vun Bremen Adalbero annerthalf Hoven Land bi Sells schenkt.

In de Johren bi 1500 höör dat Dörp to dat Kaspel Beverst un to de Börde Beverst. Bet 1851 höört dat Dörp noch bi dat adelige Gericht Beverst. In de Franzosentiet kummt Sells na de Mairie Bexhöövd (Kanton Bremerleh). Vun 1851 bet 1859 weer dat Dörp Deel vun dat Amt Beverst un denn bet 1885 vun dat Amt Leh. 1885 hebbt se de Ämter oplööst un Sells höör nu bi’n Kreis Geestmünn bi un vun 1932 af an bi’n Landkreis Wersermünn, de 1977 Deel vun’n Landkreis Cuxhoben worrn is. To’n 1. Januar 1971 harr Sells mit Bramel un Schippdörp de Samtgemeen Geestoort grünnt. Disse Samtgemeen is aver al 1974 oplööst worrn un vun de Samtgemeen is de Eenheitsgemeen Schippdörp worrn.

Ehrdat de Bahn na Sells keem, harr dat Dörp so bi 400 Inwahners. Disse Tall güng düchtig rop, nadem de Bahn dor weer. Bi’n Bahnhoff hebbt sik veel Lüüd ansiedelt, de in de Stadt arbeiden deen, vör allen eenfache Arbeiders. De Dörpslüüd hebbt so’n beten minnachtig op disse Bahnhoffsters rafkeken.

Vun 1988 bet 1993 geev dat en Dörperneuerung in Sells. En wichtigen Deel dorvun weer ok, dat Hokemeyers Hus, en oold Neddersassenhuus ut dat 18. Johrhunnert wedder neet herricht worrn is.

Inwahnertall

Johr	Inwahners
1824-00-001824^[1]	60 Füürsteden
1848-00-001848^[2]	343 Lüüd, 62 Hüüs
1910-12-011. Dezember 1910^[3]	617
1925-00-001925^[4]	844
1933-00-001933^[4]	945
1939-00-001939^[4]	1.001
2008-00-002008	1.857
2012-02-2929. Februar 2012^[5]	1.810

Religion

Sells is evangeelsch-luthersch präägt un höört to dat Kaspel von de Johannes-de-Döper-Kark in Bexhöv.

För de Kathoolschen is de St.-Johannes-de-Döper-Kark in Lox tostännig, de siet 1. November 2006 to de Karkengemeen Hillig Hart Jesu in Geestmünn höört. De Kark in Lox is 1966 wieht worrn. Vörher weer von 1911 bet 1959 de Hillig-Hart-Jesu-Kark in Geestmünn un von 1959 bet 1966 de St.-Nikolaus-Kark in Wulsdörp för dat Rebeed tostännig.

Börgermeesters

Börgermeesters:

1952–1958: Heinrich Schröder

Oortsbörgermeesters:

1976–31. Oktober 2006: Heinz Misch (SPD)
1. November 2006–: Ralf Wolter (SPD)

Kultur

Verenen

Sells hett en Sportvereen (TSV Sells, 1906 grünnt), en Schützenvereen (1891 grünnt), en Heimatvereen (1992 grünnt) un en Theatergrupp.

Weertschop un Infrastruktur

Sells hett en egene Freewillige Füürwehr.

De Filiaal von de Werser-Elv-Spoorkass in Sells hett to’n 1. Dezember 2015 dichtmaakt.

Verkehr

Sells liggt bi de Landsstraat 143, de na’n Oosten över Wehdel bi Geestenseth an de Landsstraat 128 rangeiht. Bi Sells maakt de L 143 en Knick na Süden un hett bi Bexhöv Ansluss an de Bundsstraat 71. Föhrt een dor, wo de L 143 den Knick maakt, liekut, kummt een över de Kreisstraat 58 in’n Westen na Schippdörp un Bremerhoben. Dor hett een ok Ansluss an de A 27. Na Noorden is dat Dörp dör dat Ollenmoor vun’n Verkehr afsperrt. Sells hett mit’n Bahnhoff Sells ok en lütten Bahnhoff an de Bahnlien Bremerhoben–Buxthu.

Scholen

Dat gifft en Kinnergoorn (utleggt för dree Gruppen to 25 Kinners) un de Grundschool Sells, op de ok de Kinners ut Bramel gaht. De Grundschool hett ok en Turnhall un en Sportplatz. Na de Grundschooltiet kaamt de Kinners na Schippdörp na dat Schoolzentrum.