The Streets of San Francisco (op plattdüütsch so veel as „De Straten vun San Francisco“; dt. Titel: Die Straßen von San Francisco) is en US-amerikaansche Krimi-Feernsehreeg, de in de Johren 1972 bit 1977 in tosamen fief Staffeln produzeert worrn is. De Krimireeg harr alltohopen 120 Folgen, wobi de Pilotfilm 120 Minuuten duer. De annern 119 Episoden weern 60 Minuuten lang (in Düütschland op 45 Minuuten kört). In de USA weer de Reeg af September 1972 to sehn, in Düütschland weer se in’n Mai 1974 to’n eersten mol sennt.
In de Krimireeg geiht dat üm de beiden Polizisten Detective Lieutenant Mike Stone (Karl Malden) un den düütlich jüngeren Inspector Steve Keller (Michael Douglas). In de düütschen Synchronisatschoon weer de Naam Keller in Heller afännert, dat de Tokiekers nich mit den düütschen Feernsehkommissar Keller (Erik Ode in Der Kommissar) dör’n Tüdel to bringen. Stone un Keller weern in de Folgen jümmer achter Verbrekers her, de se in deelwies fixe Verfolgungsjagden in de Binnenstadt vun San Francisco stellt hebbt. De Stadt sülvst weer dorbi faken fein as Kulisse in Szeen sett. So sünd faken de bekannten Bowarken vun de Stadt in de Folgen to sehn, as de Golden Gate Brüch, de Cable Car-Stratenbahn oder de Transamerica Pyramid.
In de föfften un letzten Staffel is Michael Douglas ut Tietgrünnen ut de Reeg utstegen. He harr mit de Produkschoon vun One Flew Over the Cuckoo’s Nest mit Jack Nicholson to doon. An sien Steed keem Richard Hatch as Inspector Dan Robbins in de Reeg, de in en as Dubbelepisood anleggte Folg to Anfang vun Staffel 5 inföhrt weer. Keller hett dorin vör, en Beroop an de Polizeischool to övernehmen. As he in de Folg anschaten warrt un dorbi meist doodblieven deit, sett he sien Plaan üm un scheedt ut’n aktiven Deenst ut. Mit den Wessel sünd aver de Tokiekertallen bannig torüch gahn, wat opletzt ok dat Enn vun de Reeg na de föfften Staffel bedüüt hett.
Wiel Karl Malden den Hööchpunkt vun sien Schauspeler-Loopbahn al achter sik haar un beropen weer, is Michael Douglas dör de Reeg eerst richtig bekannt worrn. För em weer dat en wichtigen Schritt, üm sik as egenstännigen Schauspeler dortostellen un ut den Schadden vun sien dormols al beropenen Vadder Kirk Douglas ruttokamen. In Gastrullen butendem weer en grote Tall vun bekannte Schauspelers to sehn, so as Arnold Schwarzenegger, Martin Sheen, Leslie Nielsen, Nick Nolte, Tom Selleck, David Soul, Don Johnson, Paul Michael Glaser, James Woods, Mark Hamill, Robert Wagner, Stefanie Powers oder Larry Hagman.
In’t Johr 1992 hett de NBC den Feernsehfilm Back to the Streets of San Francisco utstrahlt, de op de Krimireeg opboen de. In den Film hett Karl Malden wedder Mike Stone speelt, de intwüschen to’n Captain of Detectives opstegen is. Ok Darleen Carr, de al fröher in en poor Folgen de Dochter vun Stone speelt harr, weer wedder mit dorbi. In den Film mutt Stone ünner annern den Moord an sien fröheren Kolleeg Steve Keller opkloren. Keller is in den Film nich to sehn, blots sien Porsche ut de Kirmireeg kummt vör, as de ut de San Francisco Bay ruttogen warrt.
- Jens Szameit schreev 2008 op monstersandcritics.de, dat The Streets of San Francisco – anners as vergliekbore US-Krimiregen ut de 70er Johren (as Kojak, 1973-78) – de soziale Realität mit ehr Drogen- un Raßenproblemen utblennen oder blots in stiliseerte Biller weddergeven de. De Moordfäll weer holtsnittordig afhannelt un de Dramatik weer ut hüütige Sicht ’n beten traag opboet un nich mehr richtig spannend. De för de 1970er Johren tyypschen Spelereen mit de Kamera weern ok tomeist ahn filmischen Deepgang beschreven. Loovt weer dorgegen de snelle Soundtrack, de mit groot Künnen de Atmosphärr vun de Grootstadt infangen un vörandrieven de.[1]
- Antje Schmidt kummt 2011 op zelluloid.de to den Sluss, dat de Krimireeg mit Episoden vull vun Verfolgungsjagden to Foot oder mit Autos, mit Kriminalfäll, de man glöven künn, mit San Francisco as Kulisse un twee sympaathsche Hööftdorstellers ok vundaag noch sehnsweert weer un ok jümmer noch goot ünnerhollen künn.[2]
De Krimireeg weer bit hüüt (September 2013) 28 mol för Feernsehpriesen vörslahn, dorünner dreemol för den Golden Globe. Uttekent weer de Reeg mit veer Priesen:
- 1976: mit den Bambi in de Kategorie Feernsehreeg, Internatschonal för Michael Douglas
- 1977: mit den Eddie-Award in de Kategorie Best sneden Episood vun en Feernsehreeg för Howard Kunin („Dead or Alive“)
- 1977: mit den Edgar Allen Poe Adward in de Kategorie Beste Feernsehepisood för James Johnson Sweeney („Requiem for Murder“)
- 1979: mit den Bambi in de Kategorie Feernsehreeg, Internatschonal för Karl Malden
