Theodor Fachtmann
Theodor Christian Fachtmann (* 30. Januar 1815 in Börstel; † 10. Januar 1894 in Paane[1]) weer en hannöverschen Verwaltungsbeamten.
Fachtmann is 1815 as Söhn von Gottlieb Wilhelm Rudolph Fachtmann (1781–12. Dezember 1855) in Börstel boren.[1] Sien Vader weer Pastoor in dat Klooster Börstel.[1] He hett mit dat Sommersemester 1833 anfungen, an de Universität Halle Juristeree to studeren. 1840 keem he as Auditer in dat Amt Grönenberg, 1845 as Amtsassesser in dat Amt Lingen, 1849 an de Landdrostie Ossenbrügge un denn 1851 as Regerungsraad un Referent an dat Binnenministerium in Hannover.[1] 1855 güng he as Amtsverwalter in dat Amt Hagen un is dor 1858 Amtmann worrn.[1] He weer 1857 Mitgrünner von’n Landweertschoplichen Vereen[1] un is 1858 Viezpräsident von’n Provinzialvereen to Bremervöör worrn. In Hagen weer he 1856 ok Mitgrünner von de Amtsspoorkass (höört vondaag to de Werser-Elv-Spoorkass).[1] 1865 is he Amtmann von dat Amt Oosterholt worrn.[1] Nadem Prüßen dat Königriek Hannover annekteert hett, hett Fachtmann sien Amt denn Amtshauptmann heten. He weer von 1867 bet 1877 bito Kreishauptmann von’n Kreis Oosterholt. 1877 is he na dat Amt Aimbeck un den Kreis Aimbeck wesselt un harr dor de sülven Ämter. Bi de Verwaltungsreform to’n 1. April 1885 hett he dat Amt as eersten Landraad von’n nee grünnten Kreis Aimbeck övernahmen.[1] Dat is he bet 1886 bleven. Sien Nafolger weer Friedrich von Borries. Fachtmann hett tolest in Paane un Saulterhellen leevt.
Fachtmann weer bi de Wahl to dat Prüüßsche Aforntenhuus 1867 Kannedaat in’n Wahlkreis Hannover 34, kunn sik mit 39,1 % von de Stimmen aver nich gegen Wilhelm Werenberg dörsetten. Bi de Wahl 1876 weer he noch wedder Kannedaat, hett ditmaal aver blots 5,3 % von de Stimmen kregen un dormit düüdlich gegen Johann Mahlstedt verloren.[2]
He hett an’n 2. Oktober 1850 in Lingen Erika Johanna Hülsemann (22. Januar 1825-1. Februar 1893) freet.[1] De beiden harrn ünner annern de Döchter Catherine (Käthe) Helene Wilhelmine (4. Februar 1852-12. Oktober 1910), Auguste Maria (* 5. Februar 1857) un Theodore Caroline Hermine (* 17. Januar 1858).
Footnoten ännern
Warken ännern
- Das aussergerichtliche Sühneverfahren in Norddeutschland durch Friedensrichter, Schieds- und Vertrauensmänner. Rackhorst, 1849 (dat Book bi Google Böker)
- Kirchenrechtliche Mittheilungen über das Fürstenthum Osnabrück mit besonderer Berücksichtigung der Parochiallasten. Ossenbrügge 1852