Warnau (Neddersassen)

Warnau
Laag	Neddersassen
Stroomsystem	Werser
Läng	18 km
Afströömrebeed	47 km²
Born	bi Behningen (op 82 m över NN)
Münn	bi Borg in de Böhm (op 38 m över NN)
linke Blangenströöm	Fuhrrieth
rechte Blangenströöm	Jarler Beek (Allernbeek)

De Warnau is en 18 Kilometer langen Beek, de von rechts in de Böhm münnt.

De Cordinger Möhl in Benefeld

De Warnau hett ehren Born in’n Süüdwesten von Behningen. Von dor flütt se na Süüdwesten twüschen Riepholm un Eitze dör. An disse Steed geiht de Bahnlien Ülzen–Langwedel över de Warnau. Bi Oddingen dreiht de Beek na Süden un dor löppt ok de Bundsstraat 440 över de Warnau röver. De Beek heet hier ok Sneebeek, von wegen, dat de Beek dor fröher de Grenz twüschen dat Stift Veern un dat Förstendom Lümborg billt hett (Sneed: Grenz). Vondaag is dat de Grenz twüschen Landkreis Rodenborg un Landkreis Heidkreis.

De Beek geiht vörbi an Meyerhoff, Eekhoff, Ohrsen un Jarl un flütt denn dör Cordingen. Bi Jarl münnt von rechts de Jarler Beek in de Warnau, de sien Born bi Ebben hett. Denn geiht dat twüschen Beenfeld un Borg dör. In Beenfeld gifft dat de Cordinger Möhl, de 1810 anleggt worrn is. Dat hett aver ok vörher al en Watermöhl an disse Steed geven. Toeerst in de Oorkunnen keem de Möhl 1661 vör. Ok in Jarl un Beenfeld hett dat fröher Watermöhlen geven. In Cordingen geiht de Bahnlien Wasra–Bomlitz över den Beek weg. De Schienen in’n Süden von Cordingen weren fröher Deel von de Bahnlien Bremervöör–Wasra, de en groot Stück dör dat Daal von de Warnau lopen dee un 1984 stillleggt worrn is. De Bahnlien Bremervöör–Wasra harr aver keen Brügg över de Warnau un is jümmer op dat rechte Över bleven.

Twüschen Borg un Lönsheid münnt de Beek in de Böhm, nich wied weg von de Münn von de Bomlitz.

Dat Water in de Böhm flütt denn wieder in de Aller un von dor in de Werser un de Noordsee.