Landkreis Heidkreis

De Landkreis Heidkreis (bit 31. Juli 2011: Landkreis Soltau-Fambossel) is en Landkreis in’n Naturpark Lümbörger Heid in’n Noordoosten vun Neddersassen. He hett 140.369 Inwahners (Stand 1. Dezember 2019). De Kreisstadt is Bad Fambossel un de gröttste Stadt in’n Kreis is Wasra.

Wapen/Flagg

Koort

Basisdaten

Sitt:

1.873,5 km²

140.369 (1. Dezember 2019)

Inwahnerdicht:

74,5 Inwahners pro km²

Geograafsche Laag:

52° 55′ N, 9° 45′ O

Grenzen bi OSM:

62674

Kennteken:

HK

Kreisslötel:

03358

Gemenen in’n Kreis:

23

Landraad:

Manfred Ostermann (ahn Partei)

Websteed:

www.heidekreis.de

NUTS-Code:

DE938

Geologie

Noorddüütschland is geoloogsch vör ungefäähr 600-500 Millionen Johren tostannen kamen in’t late Proterozoikum, wat to dat Präkambrium rekent warrt. De Landmass, de vundaag Noorddüütschland billt, leeg to de Tiet noch in deepe süüdliche Breden an’n Noordrand vun den Grootkontinent Gondwana. De is later twei broken in en Tall vun lüttere un gröttere Lithosphärenplaten. En vun de lütteren Platen, de vun de Wetenschopplers Avalonia nöömt warrt, is na Noorden dreven, wo se in’n Silur vör ruch weg 450-420 Millionen Johren mit den ureuropääschen Kontinent Baltika tohopenstött is. De Kollision hett de Kaledonisch Bargenbilln na Oosten hen wieter maakt, de dorvör al in’n Noorden anfungen harr nu vör ungefäähr 410 Mio. Johren wedder ophöört hett. Wietere Mikroplaten hebbt sik in’t Karbon vör üm un bi 300 Mio. Johren vun Süden her anlagert un dorbi de Variskisch Bargenbilln veroorsaakt. De Resten dorvun billt vundaag de middeldüütschen Bargen.

De Heidkreis liggt nöördlich vun de noordvarisk’schen Deformatschoonsfront op dat Lüünborg Massiv, dat to Avalonia höört un domit en Stück vun dat öllere Europa (Paläo-Europa) dorstellt. De süüdööstliche Deel dorvun raakt jüst so even an de Deformatschoonsfront an. Dör dat Inwarken vun tektonische Kräft is Avalonia later afsackt un hett in’n Perm (vör 299-251 Mio. Johren) dormit Ruum geven för en wiet Seerebeet, dat bit wiet na Middeleuropa vördrungen is. To disse Tiet sünd de Soltvörkamen (Zechsteen) billt worrn, de in’n ganzen Noorddüütschen Ruum un ok ünner de Lünborger Heid to finnen sünd.

Dat Noorddüütsch Becken, as dat Rebeet bit to de Middelbargen ok nöömt warrt, hett sien geografsche Laag in de nafolgend Johren nich mehr ännert, is aver en poor mol anböhrt un wedder afsackt worrn. Vundaag is dat Noorddüütsch Becken mit düchtig veel fast worrn Sediment opfüllt, worut vörmols de Kaledoonsch Bargens bestahn hebbt, de denn aver dör Erosion afdragen worrn sünd. Vun de Bargens is hüüt nix mehr to sehn, man op disse Oort un Wies is de Noorddüütsch Becken bit to 10 km dick mit Sedimentiten un Sedimenten füllt^[1],^[2].

Geografie

De Heidkreis grenzt an düchtig veele annere Landkreisen an: In’n Westen leegt de Landkreisen Veern un Rodenborg (Wümm), in’n Noorden de Landkreisen Horborg un Lünborg un in’n Oosten de Landkreisen Uelzen un Celle. In Süüden slutt de Landkreis Nienborg an un en lütt Stück vun de Region Hannober.

De Heidkreis warrt landschopplich bestimmt dör de Lünborger Heid, de meist dat hele Rebeet vun den Kreis ümfaat. De süüdliche Deel warrt mehr dör den Veehbrook präägt, wat vör allen ut Veehweiden un Wischen besteiht. Vörmols weer dat en teemlich moorig Rebeet, wat sien anfänglich Charakter dör en düchtig Drinkwaterverbruuk verloren hett. Deele dorvun sind vundaag wedder in’n oorsprünglichen Tostand.

In’n Heidkreis gifft dat düsse Strööm: Aller, Böhm, Bomlitz, Grindau, Wiedau, Leine, Örtz un Wümm.

Historie

De Landkreis Soltau-Fambossel is an’n 1. August 1977 ut de ollen Landkreisen Fambossel un Soltau tohopenföhrt worrn. De eersten Johren vun den Landkreis weern bestimmt dör de groten Truppenöövsteden vun de Britschen Rhienarmee, vun de NATO un vun de Bundswehr un dat Bestreven vun’n Landkreis, mööglichst veel Flachen för den Tourismus apen to maken. In dat Rebeet vun de Lünborger Heid warrt neemlich veel wannert un Utfohrten maakt. Na’t End vun Kolen Krieg sünd eenige Öövsteden dicht maakt worrn, de nu vundaag as apenlich Naturschuulrebeden togänglich sünd, man in Munste un Bad Fambossel gifft dat ok hüüt noch grote Garnisonen.

Wapen

Dat Wapen von’n Landkreis wiest baven op gollen Grund en blauen Lööw mit rode Tung un Klauen. Ünnen wiest dat op blauen Grund en gollen Hünengraff. De Lööw kummt ut dat Wapen von dat Hertogdom Bruunswiek-Lümborg, to dat dat Rebeed von’n Landkreis fröher tohöört hett, un dat Hünengraff steiht för de Söven Steenhüüs.

Politik

De Kreisdag vun’n Heidkreis besteiht ut föfftig Afordente. Siet de letzten Kreisdagswahl in’n September 2011 sett sik de Kreisdag as folgt tohopen:

Partei \ Johr	2006	2011
CDU	19	19
SPD	15	17
Bündnis 90/De Grönen	3	6
FDP	3	1
De Linke	1	1
NPD	-	1
BörgerUnion	2	2
Wasraer Börgerlist	1	2
UWG	-	1

Weertschap

De Tourismus is in de Lüünborger Heid en wichtig Weertschapsrebeet un Born för Innahmen, de t. ok dör Deer- un Freetietparks as de Heid-Park in Soltau, den Serengiti-Park in Hodenhagen oder den Vagelpark Wasra föddert warrt. De Strööm sünd egent to’n Angeln oder Swimmen oder för Kanu- un Flottföhren. De Heidlandschap is en fein Rebeet to’n Wannern oder för Utfohrten mit dat Fohrrad.

Verkehr

Dör dat Kreisrebeet loopt twee Autobahnen. Dat en is de bedüden Noord-Süüd-Verbinnen vun Hamborg na Hannober, de A 7. Dat annere is de A 27, de an’t Autobahndreeeck Wasra anfangt un denn na Bremen föhrt.

Bedüdend Iesenbahnstrecken sünd de „Amerikalien“ Bremen – Soltau – Uelzen un de „Heidbahn“ Hamborg – Bookholt – Soltau – Bennemöhlen – Hannober.

De Landkreis Heidkreis is as Dreger tostännig för üm un bi 470 Kilometer Kreisstraten un 153 Kilometer Radweeg (Kreisstraten in’n Landkreis Heidkreis).

Religion

Dat Rebeet vun’n Landkreis is ut de Traditschoon her evangelsch-luthersch bestimmt. De Gemenen höört to de Landskark Hannober. Sünners na den Krieg hebbt sik dör de totogen Gastarbeiters, de Heimatverdrevenen un Utsiedlers ut de Oosteuropääsch Länner gröttere kathoolsche Gemenen billt, de dat Bisdom Hilmessen anhöört. Vun wegen de groten Tall vun Lüüd, de ut de Karken rutgahn sünd, ünnerleegt beid Karken en Wannel in jemehr Strukturen. Wietere Glovensgemenen in’t Kreisrebeet sünd de Muslimen as ok Liddmaten vun Freekarken un de Tügen vun Jehova.

Kultur

Üm de kulturellen Inrichten vun’n Landkreis kümmert sik de Lünborgsche Landschapsverband, de as indragen Vereen dorvör grünnt worrn is.

Städer un Gemenen

Koort mit de Gemenen

(Inwahnertallen vun’n 30. Juni 2006)

Eenheitsgemenen

Bad Fambossel, Stadt (11.756)
Bissen (6.252)
Bomlitz (hdt; 7.139)
Munste, Stadt (17.113)
Neenkerken (5.747)

Snevern, Stadt (19.105)
Soltau, Stadt (22.010)
Wasra, Stadt (24.398)
Witzendörp (4.078)

Samtgemenen mit jemehr Liddmatengemenen

Sitt vun de Samtgemeenverwalten *

1. Samtgemeen Ahlden (hdt; 7.045)

Ahlden (Aller), Flecken (hdt; 1.541)
Eickeloh (hdt; 793)
Graitn (673)
Hamstorp (886)
Hodenhagen * (hdt; 3.152)

2. Samtgemeen Reten/Aller (4.826)

Böhm (953)
Frankenfeld (hdt; 567)
Hüßel (885)
Reten, Stadt * (2.421)

3. Samtgemeen Swarms (12.106)

Bookholt (Aller) (2.058)
Äsel (1.103)
Gilten (1.158)
Linneweh (2.495)
Swarms * (5.292)

gemeenfree Bezirk

Oosterheid [Sitt: Oerbke] (829)

Literatur

Gernot Erler u. Kurt Brüsehoff: 10 kunst- und kulturgeschichtliche Exkursionen im Landkreis Soltau-Fallingbostel. (Rgv.: Landkreis Soltau-Fallingbossel), o.O. o.J. [ca. 1981], 147 S.

Bornen

↑ Schönenberg, R. & Neugebauer, J., Einführung in die Geologie Europas, Rombach Wissenschaft, 7. Opl. Freiburg 1997
↑ Wölbern, I., Verifizierung krustenbedingter Einflüsse auf Laufzeitresiduen von Erdbebenwellen anhand von Daten aus dem TOR-1-Projekt, Diplomarbeit, Chrisian-Albrechts-Universität, Kiel 1999

Weblenken

Landkreis Heidkreis. Mehr Biller, Videos oder Audiodateien to’t Thema gifft dat bi Wikimedia Commons.

Websteed von’n Landkreis (hoochdüütsch)

Landkreisen un kreisfre’e Städer in Neddersassen

[1] Schönenberg, R. & Neugebauer, J., Einführung in die Geologie Europas, Rombach Wissenschaft, 7. Opl. Freiburg 1997

[2] Wölbern, I., Verifizierung krustenbedingter Einflüsse auf Laufzeitresiduen von Erdbebenwellen anhand von Daten aus dem TOR-1-Projekt, Diplomarbeit, Chrisian-Albrechts-Universität, Kiel 1999

[1]

[2]