Bahnhoff Op de Hööv

De Bahnhoff Op de Hööv is en Bahnhoff mit een Gleis bi dat Dörp Op de Hööv. De Bahnhoff liggt an de Bahnlien Bremerhoben–Buxthu.

De Bahnhoff liggt en Stück in’n Süden von’n Hoff Heinschenwall, de to Op de Hööv höört, un knapp twee Kilometer in’n Noorden von Hipst an de Kreisstraat 144. Nadem de Bahnhoff op free Feld anleggt worrn is, sünd in de Tied sietdem aver ok en ganze Reeg Hüüs an’n Bahnhoff boot worrn, de nu den Oortsdeel Löh billt, de grötter is as dat ole Dörp Hipst. Dit Wassdom kummt to’n groten Deel dör Hüüs för Soldaten von dat Sperrtüügamt, dat 1933 in de Neegd anleggt worrn is.

Historie

1898 is de Bahnlien Bremerhoben–Stood boot worrn. To de Tied is ok de Bahnhoff Op de Hööv inricht worrn.

Dat Sperrtüügamt, dat 1933 boot worrn is, harr en egen Smallspoorbahn, de bi’n Bahnhoff en Ümslagsteed harr. Disse Smallspoorbahn is na dat Enn von dat Sperrtüügamt 1945 afboot worrn, üm en Bahn na dat Törfwark in dat Lange Moor to leggen. Disse Bahn ut dat Lange Moor na’n Bahnhoff Op de Hööv is 1997 afboot worrn, nadem dat Törfwark sien Bedriev instellt hett.

Nadem de Iesenbahnen un Verkehrsbedrieven Elv-Werser (EVB) 1993 mit de Buxthu-Harsfeller Iesenbahn tohoopgahn is, hett de EVB an’n 26. September 1993 den Fohrplaan ümstellt. Nu kunnen se von Bremerhoben över Buxthu direkt na Neegraven (mit Ansluss an de Lien S 3 von de S-Bahn Hamborg) föhren. Nadem de Lien S 3 to’n Winterfohrplaan 2007/2008 bet na Stood verlängert worrn is, is de EVB nich mehr bet na Neegraven föhrt. Dat Enn von de Lien (mit Övergang na de S 3) weer nu Buxthu.

De Afkörten in dat Bahnamtliche Betriebsstellenverzeichnis is AHWA un de Internatschonale Bahnhoffsnummer 615034.

De Bahnhoff hett en Siedenbahnstieg an de Süüdsied. Dat gifft keen Park&Ride-Anlaag för Autos, aver en Bike&Ride-Stellplatz mit üm un bi 10 Plätz för Fohrrääd.

Personenverkehr

Bedriever	Öörd	KBS	Takt
EVB	Buxthu – Obbens – Ruschwedel – Harsfeld – Bargst – Brest-Aasp – Kutenhult – Heesdörp – Bremervöör – Örel – Op de Hööv – Frellsdorp – Geestenseth – Wehdel – Sellst – Wulsdörp – Bremerhoben Hauptbahnhoff	KBS 122	elk Stünn