Belize Water Services Limited

(wiederwiest vun Belize Water Services)

Belize Water Services Limited (BWS) is en Ünnernehmen ut Belize, dat de Waterversorgung un de Afwaterentsorgung in dat Land bedrifft. Dat Ünnernehmen hett sien Seet in Belize-Stadt.

Historie ännern

Bet 2001 hett sik de staatliche Water and Sewerage Authority (WASA) in Belize üm Water un Afwater kümmert.[1] Dat Ünnernehmen Belize Water Services Limited is in’n Januar 2001 grünnt worrn un hett in’n März 2001 Vermögen, Verbindlichkeiten un Anlagen von de WASA övernahmen.[1] Dormit schullen Waterversorgung un Afwaterentsorgung privatiseert warrn.[1] 83 % von de Andelen an BWS hett dat brietsch-nedderlandsche Ünnernehmen Cascal Services Limited övernahmen.[1]

In’n Oktober 2005 hett de Regeren von Belize de Mehrheit von de Andelen von Cascal trüggköfft.[1] Stand 2017 hebbt von de 40 Milljonen Andelen 82,6 % de Regeren von Belize tohöört, 10 % dat Social Security Board von Belize un de Rest weer in Streibesitt.[2]

Dat Ünnernehmen versorgt Stand März 2017 57.200 Kunnen (dat sünd üm un bi 250.000 Personen) mit 787.000 Kubikmeter Water in’n Maand.[2] De Kunnen verdeelt sik op de twee Städer, söven Lüttstäder un 35 von de üm un bi 200 Dörper in Belize.[2] 60 % von dat Water kummt ut Strööm un de Rest to’n groten Deel ut bohrte Borns.[2] Blots de Oort San Pedro Town op dat Eiland Ambergris Caye un dat Eiland Caye Caulker warrt mit Water versorgt, dat dör Ümkehrosmose ut Seewater wunnen warrt.[2]

In dat Geschäftsjohr 2016/2017 hett dat Ünnernehmen bi Innahmen von 45,5 Milljonen Belize-Dollar en Gewinn von 8,586 Milljonen Belize-Dollar maakt.[2]

Stand 2019 bedrifft dat Ünnernehmen Klärwarken in de dree Städer Belmopan (17° 16′ N, 88° 47′ W), Belize-Stadt (17° 29′ N, 88° 13′ W) un San Pedro Town (17° 54′ N, 87° 60′ W). In Belmopan is dat Klärwark 1970 in Bedriev gahn, in Belize-Stadt 1980 un in San Pedro Town 1996. Keen von de dree Städer is to 100 % afdeckt.[3]

Footnoten ännern

  1. a b c d e About Us, Belize Water Services
  2. a b c d e f Annual Report 2016/2017
  3. Waste Water Treatment, Belize Water Services

Weblenken ännern


Koordinaten:17° 30′ N, 88° 12′ W