Borchshöh
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Postleettall: | 28755, 28757 | |
| Vörwahl: | 0421 | |
| Geograafsche Laag: | Koordinaten:53° 11′ N, 8° 38′ O53° 11′ N, 8° 38′ O | |
|
| ||
Borchshöh (hoochdüütsch Borchshöhe) is en Deel von de Stadt Bremen in dat Bundsland Bremen. Binnen Bremen höört dat to’n Oortsdeel Aumund-Hammersbeck in’n Stadtdeel Vesack. Dat liggt an de Landsgrenz na Neddersassen.
Geografie
ännernDe Oort liggt op de Oosterholter Geest. Dat Water ut dat Rebeed flütt över de Schönebecker Au af.
In histoorsche Tieden weren de Naveröörd Löhnhorst in’n Noorden, Leuchtenborg in’n Noordoosten, Schönebeck in’n Oosten, Friedrichsdörp in’n Süüdoosten, Vöraumund un Bröcken in’n Süden, Aumund, Vesack un Fähr in’n Süüdwesten un Hünertshagen un Hammersbeek in’n Westen.
Historie
ännernÜm 1700 rüm hett Friedrich von der Borch as Herr op Schönebeck de Öörd Nee-Schönebeck, Friedrichsdörp un Borchshöh nee grünnt. Na em hett dat Dörp ok sien Naam kregen.
Bet an dat Enn von dat 19. Johrhunnert weer de Oort noch ländlich präägt. Denn is Borchshöh aver to en Vöroort von Bremen-Noord worrn.
Verwaltungsgeschicht
ännernDe Oort hett vör 1852 to’n Bezirk Schönebeck von dat Gericht Leessem-Schönebeck tohöört, von 1852 bet 1859 to dat Amt Leessem un denn von 1859 bet 1885 to dat Amt Blomendal. Na 1885 weer dat in’n Kreis Blomendal, de 1932 Deel von’n Kreis Oosterholt worrn is.
De Oort weer fröher en egenstännige Gemeen, de 1908 aver Deel von de Gemeen Aumund worrn is. 1939 is de Gemeen Aumund Deel von de Stadt Bremen worrn.
Inwahnertall
ännern| Johr | Inwahners |
|---|---|
| 1848[1] | 130 Lüüd, 21 Hüüs |
| 1. Dezember 1871[2] | 106 Lüüd, 28 Hüüs |
| 1. Dezember 1885[3] | 137 Lüüd, 27 Hüüs |
| 1895[4] | 197 Lüüd |
| 1. Dezember 1905[5] | 248 Lüüd, 42 Hüüs |
Religion
ännernBorchshöh is evangeelsch-luthersch präägt un höört to dat Kaspel von de Aumunder Kark. Bevör düsse Kark 1877 trech worrn is, hett de Oort to dat Kaspel von de Martin-Kark in Leessem tohöört.
För de Kathoolschen is de Hillige-Familie-Kark in Grohn tostännig. Von 1920 bet 2006 hett Borchshöh to de Karkengemeen von de St.-Willehad-Kark in Aumund höört. Düsse Kark hett von 2006 af an to de Hillige-Familie-Kark höört un hett 2011 kumplett dichtmaakt. Vör 1920 weer de St.-Marien-Kark in Blomendal för den Oort tostännig.
Weertschop un Infrastruktur
ännernVerkehr
ännernDe wichtigste Straat in Borchshöh is de Borchshöher Straat, de in’n Süüdwesten na Vesack löppt un in’n Noordoosten na Leuchtenborg. Dor in Neddersassen geiht de Straat in de Kreisstraat 20 över. Na Westen geiht von de Borchshöher Straat de Hammersbeker Straat af, de na Blomendal föhrt.
De nächste Autobahn is de Autobahn 270. De Opfohrt 4 Vesack-Midd liggt en beten mehr as een Kilometer in’n Süüdwesten von Borchshöh .
De nächste Bahnhoff is so bi annerthalv Kilometer wied weg in’n Westen de Bahnhoff Aumund an de Bahnlien Farge–Vesack. De Bahnhoff Schönebeck an de Bahnlien Vesack–Bremen un de Bahnhoff Vesack, in den de beiden Lienen sik draapt, sünd twee Kilometer wied weg. All düsse Bahnhööv warrt von de Lien RS1 von de Regio-S-Bahn Bremen/Neddersassen bedeent.
Scholen
ännernIn de Straat Op’n Flintacker liggt de Grundschool Borchshöh.
Footnoten
ännern- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 150
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 158
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 171
- ↑ Inwahnertallen op gemeindeverzeichnis.de
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 20
