Ilhéu de Cima

De Ilhéu de Cima is en lütt nich bewahnt Eiland vun de Ilhéus do Rombo oder ok Ilhéus Secos, de to de Republiek Kap Verde höört. Vun de Inselgrupp is se tweetgröttste un liggt ganz in’n Oosten dorvun. Vun de Verwalten her höört de ganze Grupp to dat Eiland Brava.

Geografie

De Süüdküst vun Ilhéu de Cima vun’t Schipp ut sehn

Dat lütt Eiland hett en felsige Küst un in’t Binnere dröög Grasland. De Süüdküst kiekt en beten wat höger ut de See rut un is teemlich piel. As ok all de anneren kapverdischen Eilannen is ok de Ilhéu de Cima dör Vulkanismus tostannen kamen. De Grött vun’t Eiland is ruchweg 600 bit 800 m in de Läng un 200 bit 300 m in de Breed, womit se op en Flach vun üm un bi 1 km² kummt. Se liggt ruchweg in’n Noordoosten vun Brava twüschen de Eilannen Brava un Fogo.

Op de Oost-Siet gifft dat en lütte Bucht. Na Westen hen leegt de twee lütten Eilannen Ilhéu do Rei un Baixa de Boca de Porto vun de Inselgrupp, na Noordoosten de Eilannen Baixo Cabeçon un Baixo Dánel un. Doro kamt noch en ganze Reeg lüttere Eilannen un Steensülen, de ut dat Water rutluschert. Vun Brava ut is dat Eiland goot to sehn, vun Fogo ut is se blots bi goot Weder to sehn.

Bedüden

Dat Eiland hett weertschopplich so goot as keen Bedüden, wieldat hier nix wassen deit un dat Eiland an sik ok blots ut Steen besteiht. Intressant sünd aver de sandigen Steden vun de Küst, woneem dat mitünner feinen Sandstrand gifft. Vun Brava ut gifft dat private Fischerslüüd, de Touristen to’n Baden na dat Eiland översetten doot.

Eilannen vun Kap Verde

Koordinaten:14° 58′ N, 24° 40′ W