En Distrikt is en Verwaltungseenheit in’n Staat Belize. De söss Distrikte staht ünner’n Gesamtstaat un sünd sülvs wedder indeelt in 31 Wahlkreise un in Gemenen. Bi de Gemenen gifft dat verscheden Typen: Städer (city), Lüttstäder (town) un Dörper (village). Städer gifft dat twee (Belize City un Belmopan) un Lüttstäder söven. De Rest von dat Land is in Dörper indeelt.

Koort von de söss Distrikte

De Distrikte hebbt keen egen polietsche Vertreders un ok keen besünnere Behörden. De Verwaltung passeert op de Ebenen von’n Gesamtstaat un de Gemenen.

Codes för de Distrikte warrt in ISO 3166-2:BZ defineert.

Historie ännern

 
Koort von 1910 mit de olen Distrikt-Grenzen

Von de Tied üm 1870 rüm af an weer Brietsch-Honduras in veer Distrikte indeelt (Northern District, North-Western District, Central District un Southern District). 1881 is dat Land in de söss Distrikte indeelt worrn, de wi vondaag kennt: Belize, Cayo, Corozal, Orange Walk, Stann Creek un Toledo.

Von wegen dat grote Delen von dat Land kumplett unbewahnt weren, weren de Grenzen toeerst blots groff fastleggt un güngen stuur liekut dör dat Gelänn. Eerst later sünd de Grenzen nipp un nau fastsett un an Strööm un Waterscheden utricht worrn.

Corozal un Orange Walk sünd in de öllere Tied faken to’n Northern District mit Seet in Corozal tohoopfaat worrn. Eerst 1955 sünd se duurhaftig twee kumplett egenstännige Distrikte worrn. 1954 is en 854 km² groot Rebeed von’n Distrikt Toledo in’n Distrikt Cayo wesselt.

Fröher stünnen de Distrikte ünner dat Leid von en District Officer, aver düt Amt is later afschafft worrn.

Översicht ännern

Distrikt Hööftstadt Rebeed in km² Inwahners (2015) Inwahners (2010)
Belize Belize City 4310 110.644 95.292
Cayo San Ignacio/Santa Elena 5200 87.876 75.046
Corozal Corozal Town 1860 45.530 41.061
Orange Walk Orange Walk Town 4600 49.466 45.946
Stann Creek Dangriga 2550 39.865 34.324
Toledo Punta Gorda 4410 34.928 30.785