Överlandwark Noord-Hannover

(wiederwiest vun Elektrizitätsverband Stood)

Dat Överlandwark Noord-Hannover (hoochdüütsch Überlandwerk Nord-Hannover AG, ÜNH) weer en Elektrizitätsünnernehmen in dat Rebeed twüschen Elv un Werser in Neddersassen.

Historie ännern

1913 is de Elektrizitätsverband Stood as Zweckverband grünnt worrn, de en Stroomnett in’n Regerungsbezirk Stood un in de Kreise Horborg un Soltau in’n Regerungsbezirk Lümborg von de prüüßsche Provinz Hannover opboon schull. Mit de Siemens Elektrische Betriebe AG is en Verdrag slaten worrn, üm dat Rebeed mit Stroom to versorgen.

An’n 4. Mai 1929 hett de Elektrizitätsverband Stood as Bedrievssellschop de Aktiensellschop Överlandwark Noord-Hannover grünnt.

Mit dat Groot-Hamborg-Gesett 1937 hett de ÜNH Rebeden bi Horborg an de Hambörgschen Elektrizitätswarken (HEW) afgeven un gliektiedig von’n 1. Januar 1940 af an dat ole Amt Ritzbüttel von de HEW övernahmen.

Dat Överlandwark is 1998 dör Fusion mit de EWE AG tohoopgahn un hett denn as egenstännig Ünnernehmen nich mehr bestahn. Bi dat Ünnernehmen hebbt vör de Fusion (Stand 1996) 839 Lüüd arbeidt. Bi en Ümsatz von 833 Millionen Mark hett de ÜNH en Gewinn von knapp ölven Millionen Mark maakt. De Aktien hebbt to 66,67 Perzent de Landkreise Cuxhoben, Stood, Rodenborg, Horborg, Oosterholt, Heidkreis un Veern un de Stadt Cuxhoben tohöört un to 33,33 Perzent PreussenElektra.[1]

Seten hett dat Ünnernehmen in Bremen in de Stresemannstraat. Dat Gebüüd dor hett 1955 de Architekt Gerhard Müller-Menckens boot. Vörher weer dat Ünnernehmen in de Straat An’n Dobben 31/32 ünnerbröcht.

Ümspannwarken un Leitungen ännern

Von dat Ümspannwark Wulsdörp her na Cuxhoben hett dat bet 1935 en Dreihstroom-Leitung mit 20 kV geven. 1935 is dor denn en 60-kV-Dubbel-Leitung von worrn un Cuxhoben hett in de Industriestraat en neet Ümspannwark kregen. 1954 is Cuxhoben denn mit en twete 60-kV-Dubbel-Leitung an dat Ümspannwark Hemmoor anslaten worrn.

Literatur ännern

  • 50 Jahre Elektrizitätsverband Stade 1913-1963. Hoppenstedts Wirtschafts-Archiv, Darmstadt 1963

Footnoten ännern

  1. Norddeutsche Regionalversorger EWE und ÜNH wollen so schnell wie möglich fusionieren. Afropen an’n 21. Juli 2023.