Enckesch Komeet

De Enckesche Komeet (offizielle Beteken: 2P/Encke) is en kortperioodschen Komeet, de na Johann Franz Encke nöömt is. Vun all bekannten Kometen hett disse de körtste Ümlooptiet.

2P/Encke
Egenschoppen vun’n Orbit (Simulatschoon)
Orbitklass	kortperioodsch
Grote Halfass	2,218 AE
Perihel — Aphel	0,339 — 4,097 AE
Bahnexzentrizität	0,847
Bahnnegen gegen de Ekliptik	11,8 °
Ümlooptiet	3,3 a
middlere Bahnsnelligkeit	69,53 km/s
Physikaalsch Egenschoppen
Dörmeter	4,8 km
Periheldörgang	21. November 2013
Albedo	0,047
Historie
opdeckt vun	Jean-Louis Pons
an’n	27. November 1818
in

Encke hett ümfangrieke Studien un Bereken anstellt un dordör verschedene Beobachten in de Johren 1786, 1795, 1805 un 1818 mit’nanner in Verbinnen bringen künnt. Sien Resultaten hett he 1819 in de Tietschrift Correspondance Astronomique publizeert un dat Torüchkamen vun den Komeet för 1822 richtig vörutseggt.

Historie

Sien offiziellen Naam na, is Encke de tweete Komeet na den Halleyschen Komeet, de as perioodsch bestimmt weer. Sien eerst Beobachten weer an’n 17. Januar 1786 vun Pierre Méchain. As he 1975 torüch kamen weer, hett Caroline Herschel em opdeckt. 1805 un nochmol 1818 is de Komeet vun Jean-Louis Pons opfunnen worrn. Denn eerst künn Encke all veer Beobachten op een enkelten Kometen torüchsluten. Ofschoonst Kometen normalerwies na jemehrn Opdecker nöömt warrt, is disse Komeet na de Person betekent, de sien Ümloopbahn toeerst bestimmt hett. De Enckesche Komeet weer as Teel för de Kometensond CONTOUR utsöcht, man de Misschoon is fehlslahn.

Ümloopbahn

De Ümloopbahn vun 2P/Encke

De Enckesche Komeet löpt op en langtogene elliptische Ümloopbahn üm de Sünn. De sünnneegste Punkt hett en Afstand vun ruchweg 0,339 AE, wat in’t Rebeet vun de Merkur-Bahn liggt. De wietste Punkt vun de Ümloopbahn reckt mit 4,097 AE bit in’t Rebeet vun de Jupiter-Bahn. De Even vun de Ümloopbahn is üm 11,8° gegen de Ekliptik verkippt. Mit blots 3,3 Johren hett 2P/Encke de körtste Ümlooptiet vun all bekannten Kometen.

Al in’t 19. Johrhunnert weer faststellt, dat sik de Ümloopstiet vun den Enckeschen Kometn jümmer ’n lütt beten verkörten deit. Dat weer as en Bewies för den Äther ansehn, de mit sien Rievwedderstand vör’t Afbremsen verantwoortlich maakt weer. Vundaag weet man, dat dat Afbremsen dorvun kummt, dat in Sünnneeg Materie ut’n Kometenkarn in Form vun en Jet utstött warrt, de as en Oort Bremsrakete wirkt. Dordör verlütt de Komeet ok jümmer mehr Materie, wat ok dorto föhrt, dat sien Helligkeit afnehmen deit. In föfftig Johren geiht de afsluute Helligkeit in’n Dörsnitt üm ruchweg 0,5sup>mag torüch. Sien Dörmeter warrt dorüm ok blots op ruchweg 4,8 km schätzt.

Steernsnuppen

De Enckesche Komeet warrt mit den Meteorstroom vun de Tauriden tosamenbröcht. En poor Wetenschopplers glöövt, dat en Stück vun den fröher grötteren Komeet in de Bronzetiet Schaden in’n Fruchtboren Halfmaand anricht hett. En mööglichen Bewies is en groten Inslagkrater in’n Irak. Man nipp un nau ünnersöcht worrn is de Struktur noch nich.

Kiek ok

• List vun de Kometen

Weblenken

Enckesch Komeet. Mehr Biller, Videos oder Audiodateien to’t Thema gifft dat bi Wikimedia Commons.

• Gary W. Kronk’s Cometography - 2P/Encke (engelsch)
• Comets and the Bronze Age Collapse (engelsch)