Meteorstroom
En Meteorstroom oder Steernsnuppenschuer is en Begeevnis an’n Steernhimmel, dat sik ut en Reeg vun Meteoren tohopensett. Anners as de enkelten oder sporadischen Steernsnuppen, de dat to jede Tiet mol geven kann, sünd Meteorströöm Anhüpen vun Steernsnuppens, de sik to sünnere Tieten vun’t Johr jümmer wedder afspelen doot, un bi de de Flaagbahnen vun disse lütten Körpers in’n Ruum op teemlich glieke Bahnen verloopt. An sik weer de Begreep Meteoroidenstroom de richtige Begreep dorför, man de is nich begäng.
Tostannenkamen
ännernMeteorströöm kamt dordör tostannen, dat de Eer op ehr Bahn üm de Sünn in de Neeg vun Kometenbahnen kamen kann oder jem sogor krüüzt. Nu is dat so, dat en Komeet in de Neeg vun de Sünn jümmer wedder opsmölten deit und op’n Weg en Deel vun sien Masse in Form vun Gas un Stoff verleren deit, de denn as Kometensteert to sehn is. Dorto höört ok lütte Steenschören un annere lütte Partikels, de as Meteoriden betekent warrt. Mit de Johrdusenden verdeelt sik disse Partikels över de hele Bahn vun den Komeet un de Eer löpt op ehr Bahn jeed Johr ruchweg to de glieken Tiet dör disse Wulk vun lütte Partikels. De fleegt denn dör de Atmosphäär un billt dorbi helllüchten Striepens, de Steernsnuppen.
Wo stark en Meteorschuer is, warrt mit de Zenithal Hourly Rate (ZHR) angeven. Dormit warrt de Tall vun de Meteoren in een Stünn betekent, de to’n Hööchdpunkt ünner ideale Bedingen to sehn sünd.
Variatschonen mit de Tiet un de Radiant
ännern
De Steernsnuppen vun en Schuer schient all vun’n glieken Punkt an’n Himmel uttogahn, wenn een de Flaagbahn na achtern wieter tütt. Disse Punkt warrt as Radiant betekent. De Laag vun den Radiant deent ok as Grundlaag för den Naam vun en sünneren Meteorstroom. So liggt de Radiant vun de Perseiden to’n Bispeel in’t Steernbild Perseus. Man, de Koordinaten vun den Radiant ännert sik mit de Tiet, vunwegen dat de Bahnellipsen vun de Partikels krumm sünd. Dat maakt an’n Dag ruchweg 1° ut.
De Dicht vun de Partikels op de Bahn is kort vör un kort na den Vörbigang an de Sünn düütlich grötter. Hier kann dat denn to en Meteormstorm kamen, bi den mitünner mehr as dusend Steernsnuppen in de Stünn to sehn wesen künnt. Dat kann aver ok eerst Johren na den Periheldörgang to en sünners grote Tall vun Meteoren kamen, as dat to’n Bispeel 2002 bi de Leoniden weer. De Periheldörgang vun den Komeet 55P/Tempel-Tuttle, de den Stroom utlööst, weer 1998 al.
De Partikelwulken op de Kometenbahnen blievt aver nich bestännig un lööst sik mit de Tiet op, vunwegen dat sik de Kometenbahnen dör Bahnstören vun de Planeten oder de Sünn ännern künnt oder de Kometen wegen jemehrn Massenverlust inst inaktiv warrt. Op lange Sicht verswinnt Meteorströöm also ok wedder, wiel annere noch aktive Kometen ok wedder ne’e Strööm tügen künnt.
Meteroströöm, de jeed Johr wedderkamt
ännern- Hööftartikel: List vun de Meteorströöm
In de Tabell staht en poor vun de gröttsten Meteorschuern, de mehr as teihn Steernsnuppen in de Stünn opwiest. Dat gifft aver noch vele annere Strööm. De beiden wichtigsten sünd de Perseiden un de Geminiden.
| Tiet (Maximum) | Naam | Afkumst | ZHR |
|---|---|---|---|
| 1. Januar – 5. Januar (3. Januar) |
Quadrantiden (Bootiden) |
Asteroid 2003 EH1 | 120 |
| 25. Januar – 15. April (24. März) |
Virginiden | ekliptikal | 5 |
| 16. April – 25. April (22. April) |
Lyriden | Komeet C/1861 G1 (Thatcher) | 18 |
| 19. April – 28. Mai (5. Mai) |
Mai-Aquariiden (η-Aquariden) |
Halleysch Komeet | 60 |
| 15. April – 15. Juli (19. Mai) |
Sagittariden | ekliptikal | 5 |
| 12. Juli – 25. August (3. August) |
Juli-Aquariiden (δ-Aquariiden) |
ekliptikal | 20 |
| 17. Juli – 24. August (12. August) |
Perseiden (Laurentius-Swarm) |
Komeet 109P/Swift-Tuttle | 110 |
| 6. Oktober – 10. Oktober (8. Oktober) |
Draconiden oder Giacobiniden | Komeet 21P/Giacobini-Zinner | var. |
| 2. Oktober – 7. November (21. Oktober) |
Orioniden | Halleysch Komeet | 23 |
| 1. Oktober – 25. November (5. November un 12. November) |
Tauriden | ekliptikal | 5 |
| 14. November – 21. November (17. November) |
Leoniden | Komeet 55P/Tempel-Tuttle | var. |
| 7. Dezember – 17. Dezember (14. Dezember) |
Geminiden | Asteroid (3200) Phaethon | 120 |
Literatur
ännern- Cuno Hoffmeister: Meteore, ihre kosmischen und irdischen Beziehungen. Akademische Verlagsgesellschaft m.b.H., Leipzig (1937)
- Cuno Hoffmeister: Meteorströme. Joh. Ambr. Barth Verlag, Leipzig (1948)
- Fritz Heide: Kleine Meteoritenkunde. Verständliche Wissenschaft Band 23, Springer-Verlag, Berlin 1957.
Weblenken
ännern
- International Meteor Organization (engelsch)