Häckel
Dit Woort hett noch annere Bedüden: kiek dorför ünner Haeckel.
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | 2.461 (31. Dezember 2015) | |
| Hööchd: | 34 m över NN | |
| Postleettall: | 21335 | |
| Vörwahl: | 04131 | |
| Geograafsche Laag: | Koordinaten:53° 13′ N, 10° 24′ O53° 13′ N, 10° 24′ O | |
Häckel (hoochdüütsch Häcklingen) is en Dörp in de Stadt Lümborg in’n Landkreis Lümborg, Neddersassen. Binnen de Gemeen billt dat Dörp en egen Oortschop. To de Oortschop höört ok de lüttje Oort Nee-Häckel mit bi.
Geografie ännern
De Oort liggt fiev Kilometer in’n Süden von de Lümbörger Binnenstadt. In’n Westen un Noorden flütt de Ölz üm dat Dörp rüm un münnt in’n Noordoosten denn in’n Hasenbörger Möhlenbeek. De Möhlenbeek wedder münnt een Kilometer in’n Oosten von Häckel in de Ilmenau. Dat Daal von de Ilmenau is as Naturschuulrebeed Lümbörger Ilmenaudaal mit Deergoorn schuult.
De Naveröörd sünd Bokelsbarg in’n Noordoosten, Wendsch Äwern in’n Oosten, Düütsch Äwern un Melbäck in’n Süüdoosten, Emsen un Örzen in’n Süüdwesten, Rättme in’n Westen un Öhm in’n Noordwesten.
Historie ännern
In’n Eersten Weltkrieg sünd teihn Soldaten ut Häckel fullen oder vermisst.[1]
An’t Enn von’n Tweten Weltkrieg an’n 30. April 1945 hett de 2. brietsche Armee ünner Feldmarschall Bernard Montgomery in Häckel ehr Hööftquarteer inricht. De Befehlshebber von de 2. brietsche Armee, Miles Dempsey is an’n 20. April 1945 in de Villa Möllering intagen. De Villa liggt op Grund, de von öllers to Häckel mit tohöört hett, is vondaag aver dör dat Wassdom von dat Dörp Rättme Deel von Rättme. In de Villa hett en düütsche Delegatschoon, de von’n letzten Riekspräsident Karl Dönitz autoriseert weer, de sik mit de letzte Rieksregerung in Flensborg-Mürwik ophollen dee, de Briten dat eerste Maal de Deelkapitulatschoon för de Truppen in Noorddüütschland, Däänmark, Holland un Noorwegen anbaden. De Deelkapitulatschoon is denn an’n 4. Mai üm halvig söven op’n Timelobarg bi Wendsch Äwern ünnerschreven worrn.[2]
Verwaltungsgeschicht ännern
In de Franzosentied hett de Oort toeerst 1810 bet 1811 binnen dat Königriek Westfalen to de Mairie Rättme in’n Kanton Bienbüddel höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Karkgellsen in’n Kanton Garlstörp.
De Oort weer fröher opdeelt twüschen de Gerichtsborkeit von dat Klooster St. Michaelis in Lümborg un dat Amt Winsen. Stand 1791 hebbt von de söss Hüüs in Häckel veer to dat Klooster höört un twee to dat Amt. To’n 24. März 1849 is de Gerichtsborkeit von dat Klooster oplööst worrn un de Oort is in dat Amt Lüün (dat von 1862 af an Amt Lümborg heten hett) wesselt. Na 1885 weer dat in’n Kreis Lümborg, de 1932 mit’n Kreis Bleikd to’n ne’en un grötteren Kreis Lümborg tohoopgahn is.
De Oort is an’n 1. März 1974 mit de Gemeenreform in Neddersassen Deel von de Stadt Lümborg worrn un billt sietdem binnen de Gemeen en Oortschop mit egen Oortsvörsteiher.
Inwahnertall ännern
| Johr | Inwahners |
|---|---|
| 1791[3] | 6 Füürsteden |
| 1812[4] | 74 |
| 1824[5] | 8 Füürsteden |
| 1848[6] | 97 Lüüd, 13 Hüüs |
| 1. Dezember 1871[7] | 129 Lüüd, 11 Hüüs |
| 1. Dezember 1885[8] | 115 Lüüd, 13 Hüüs |
| 1. Dezember 1905[9] | 127 Lüüd, 15 Hüüs |
| 1. Dezember 1910[10] | 175 |
| 1925[11] | 191 |
| 1933[11] | 206 |
| 1939[11] | 207 |
| 6. Juni 1961 | 427 |
| 27. Mai 1970 | 748 |
| 31. Dezember 1992 | 1.271 |
| 31. Dezember 1997 | 1.719 |
| 31. Dezember 2002 | 2.476 |
| 31. Dezember 2007 | 2.495 |
| 31. Dezember 2012 | 2.453 |
| 31. Dezember 2015 | 2.461 |
Religion ännern
Häckel is evangeelsch-luthersch präägt un höört to dat Kaspel von de Katharinenkark in Emsen.
För de Kathoolschen is de Marienkark in Lümborg tostännig.
De Doden warrt op’n 1,5 Hektar groten Karkhoff Häckel begraven, de an’n Oostrand von’t Dörp an de Hauptstraat liggt.
Oortsvörsteihers ännern
Kultur ännern
En Denkmaal för de Fullenen ut’n Eersten Weltkrieg steiht in Emsen op’n Karkhoff.
As Stadtdeelhuus för Häckel un Rättme is 2004 dat Bonhoeffer-Huus boot worrn, dat de Stadt Lümborg un de Kark in Emsen tohoop bedrievt. Dat Gebüüd steiht op Häckeler Grund an’n Rand von Rättme.
Verenen ännern
De Vereen Eintracht Lüneburg hett sien Wuddeln in Häckel: an’n 18. August 1903 is in Häckel de FC Favorite Lüneburg grünnt worrn, de 1905 mit’n FC Hansa Lüneburg to de Eintracht tohoopgahn is.
De Tennisclub Häckel is 1971 grünnt worrn.
Weertschop un Infrastruktur ännern
Häckel hett en egene freewillige Füürwehr, de an’n 8. Mai 1902 grünnt worrn is. Toeerst weer de Füürwehr tohoop mit dat Dörp Rättme, aver 1934 is de Füürwehr deelt worrn un beide Dörper hebbt en egen Füürwehr kregen. Siet 1994 steiht dat Sprüttenhuus för de Füürwehr in Rättme. De Füürwehren von Häckel, Rättme un Öhm sünd all egenstännig, deelt sik aver dat sülve Sprüttenhuus.
In’n Süden von’n Oort liggt de Windpark Melbäck-Häckel mit negen Windkraftanlagen, de 2003 un 2017 opboot worrn sünd un von de twee Stück op dat Rebeed von Häckel staht.
Von 1964 bet 2007 hett dat in Häckel (an’n Rand von Rättme) en Psychiatrische Klinik geven, de 2007 na Ülzen ümtagen is.
Verkehr ännern
Dör dat Dörp Häckel sülvs loopt kene grötteren Straten. De Kreisstraat 17 löppt in’n Noordwesten dör Rättme un föhrt von dor in’n Noordoosten na Lümborg rin un in’n Süüdwesten na Örzen an de Bundsstraat 209. In’n Oosten löppt de K 7 an dat Dörp langs. De K 7 föhrt in’n Noorden na Lümborg rin un geiht in’n Süden in de B 4 över, de von dor över Melbäck un Bienbüddel na Ülzen löppt. Bevör Lümborg sien Ümtostraat kregen hett, weer de K 7 sülvs Deel von de B 4. Dor, wo de K 7 in de B 4 övergeiht, is en grote Krüzung. De Straat na Süüdwesten is de B 209, de över Örzen un Amelkusen na Soltau löppt un de Straat na Noordoosten is de kumbineerte B 4/B 209, de as Ümtostraat üm Lümborg rümföhrt un denn in de Autobahn 39 (Afsnidd Lümborg–Hamborg) övergeiht. De Opfohrt 6 Lümborg-Noord op düsse Autobahn liggt so acht Kilometer in’n Noorden von Häckel.
De nächste Bahnhoff is so bi fiev Kilometer wied weg in’n Noordoosten de Bahnhoff Lümborg an de Bahnlienen Hannover–Hamborg un Wittenbarg–Bookholt. Von 1913 bet 1977 hett dat ok Personenverkehr op de Bahnlien Lümborg–Soltau geven. De Bahnhoff Rättme an düsse Bahnlien hett twüschen de Dörper Häckel, Rättme un Öhm legen un weer von Häckel en goden Kilometer wied weg.
Scholen ännern
Häckel hett mit de Grundschool Häckel en egen Grundschool un ok en egen Kita, de 2002 boot worrn is. De eerste School is in dat Johr 1792 boot worrn. Dat gifft ok en Montessori-School, de op Häckeler Rebeed in Rättme steiht. De Montessori-School is 2008 op dat Gelänn von de Psychiatrische Klinik inricht worrn un 2017 in en egen Gebüüd intagen.
Lüüd ännern
De Politiker Peter Zenner is 1949 in Häckel boren.
Footnoten ännern
- ↑ Onlineprojekt Gefallenendenkmäler
- ↑ Die Kapitulation auf dem Timeloberg (pdf, 16. Sieden; 455 kB)
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 99
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 58
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 232
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 97
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 122
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 136
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 112
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
