Heinz Dabelow

Heinz Dabelow (* 4. Oktober 1922 in Stettin; † 5. März 2011 in Stood) weer en düütschen Politiker von de SPD.

Dabelow is 1922 in Stettin boren un hett bi de Stettiner Oderwarken en Lehr as Schippboer maakt. In’n Tweten Weltkrieg weer he Soldaat. As Panzerfohrer is he an de Oostfront swoor verwunnt worrn un hett dor en Oog bi verloren. Na’n Krieg kunn he nich mehr in sien olen Beroop arbeiden. An’t Enn von dat Johr 1945 keem he na Stood. Dor hett sien Verloovte Charlotte leevt, nadem Stettin ünner poolsche Verwaltung fullen weer. De beiden hebbt een Johr later freet. Se sünd bet to ehren Dood an’n 15. Oktober 2006 tohoopbleven. He hett denn bi de Fabrik Gummi-Schmidt in Stood arbeidt, is dor Vörsitter von’n Bedrievsraad worrn un hett bi’n Wedderopbo von de Gewerkschaft hulpen. 1959 hett he bi de Phoenix-Gummiwarken in Horborg anfungen un weer dor siet de Johren 1960 ok wedder in’n Bedrievsraad. He is bet 1984 bi de Phoenix-Warken bleven.

Von 1954 bet 1979 weer Dabelow Arbeidsrichter. Siet 1965 weer he Maat von’n Vörstand von de Verwaltungsstell von de IG Chemie, Poppeer, Keramik in Hamborg.

1964 is Dabelow dat eerste Maal in’n Stadtraad von Stood wählt worrn un is dor bet 2001 in bleven. He weer von 1968 bet 1976 Vörsitter von’n Sozialutschuss in’n Stadtraad un von 1968 bet 1972 Viez-Vörsitter von’n Verkehrsutschuss. An’n 5. Mai 1969 is he Frakschoonsvörsitter von de SPD in’n Raad worrn. 1972 is Dabelow as tweten Viez-Börgermeester von Stood wählt worrn. He weer Maat in’n Verwaltungsutschuss, in’n Finanzutschuss, in’n Utschuss för Ümweltschuul un von 1972 bet 1976 Vörsitter von’n Verkehrsutschuss. Von 1972 bet 1986 weer he Vörsitter von’n Opsichtsraad von de Stadtwarken Stood.

1976 is he as Börgermeester von Stood wählt worrn. Dat weer he för een Amtsperiood bet 1981. Bi de nächste Wahl hett sik denn aver Horst Eylmann von de CDU dörsett un Dabelow weer von 1981 bet 1986 eersten Viez-Börgermeester. He weer in disse Tied in’n Verwaltungsraad von de Stadtspoorkass Stood, in de Sellschopperversammlung von de Wohnbau Niederelbe un in’n Verkehrs- un Verwaltungsutschuss. Bi de Wahl 1986 kunn he sik wedder gegen Eylmann dörsetten un is Börgermeester worrn. De beiden hebbt sik aver de Amtsperiood deelt un so hett Eylmann 1989 dat Amt as Börgermeester övernahmen un Dabelow is eersten Viez-Börgermeester ween. Ok in en Reeg Utschüss weer he wedder. 1991 hett Dabelow denn wedder as Börgermeester övernahmen. Dat is he nu för twee Wahlperioden bet 2001 bleven.

Dabelow hett sik för dat Kernkraftwark Stood insett, von wegen dat dör de Gewarvstüür-Innahmen de Stoder Binnenstadt opfleet un de Infrastruktur von de Stadt utboot warrn kunn. Dabelow hett dör sien polietsch Warken ok veel dor bi daan, dat de Ooldstadt von Stood saneert warrt.

Ehren

• 1981: Bundsverdeenstkrüüz 1. Klass
• 1989: Ehrenoorkunn von’n Neddersassischen Städtedags
• 1998: Groot Verdeenstkrüüz von de Bundsrepublik Düütschland
• 2001: Ehrenbörger von de Stadt Stood
• Königlich-sweedschen Noordsteern-Orden

In Stood driggt de Platz vör dat Raadhuus siet 2001 den Naam Börgermeester-Dabelow-Platz.