Holsseln

Holsseln (hoochdüütsch Holßel) is en Oort in de Gemeen Geestland in’n Landkreis Cuxhoben, Neddersassen.

Wapen/Flagg

Koort

Basisdaten

Bundsland: Neddersassen

19,85 km²

27607

04742

Koordinaten:53° 41′ N, 8° 37′ O53° 41′ N, 8° 37′ O

Bi Holsseln höört ok de lüttje Oort Holsselnerfeld mit bi.

Geografie

Holsseln liggt op’n Rand von de Geest (Hoge Lieth). Na Westen hen slütt sik de Masch von Land Wusten an. Dör dat Siedland von de Masch löppt de Wallsgroov.

De Naveröörd sünd Millm mit Kraansborg in’n Noorden, Krümpel in’n Noordoosten, Niewohl in’n Oosten, Hemendörp in’n Süüdoosten, Sievern in’n Süden, Dorum in’n Westen un Cappel in’n Noordwesten.

Historie

1711 hett dat in Holsseln brennt un alltohoop 45 Hüüs sünd dor bi afbrennt.

Holsseln leeg fröher in de Böörd Debst un dat Amt Beers. In de Franzosentied hett de Oort to de Kommuun Niewohl tohöört. Von 1852 bet 1885 hett de Oort bi dat Amt Dorum bihöört un denn bet 1932 bi’n Kreis Leh. Von 1932 bet 1977 leeg Holsseln in’n Landkreis Wersermünn.

1971 is dat Dörp Deel von de Samtgemeen Niewohl worrn, de aver mit de Gemeenreform in Neddersassen 1974 wedder oplööst worrn is, as Holsseln mit de Gemeen Langen tohoopleggt worrn is. De Gemeen Langen is to’n 1. Januar 2015 oplööst worrn. Dat Rebeed höört nu to de Gemeen Geestland.

In’n Eersten Weltkrieg sünd 23 Soldaten ut Holsseln fullen oder vermisst, un in’n Tweten 59^[1].

Inwahnertall

Johr	Inwahners
1824-00-001824^[2]	61 Füürsteden
1848-00-001848^[3]	405 Lüüd, 75 Hüüs
1910-12-011. Dezember 1910^[4]	489
1925-00-001925^[5]	499
1933-00-001933^[5]	568
1939-00-001939^[5]	563

Religion

Holsseln is evangeelsch-reformeert präägt un billt en egen Kaspel. De Kark stammt von 1111, de hüdige Karktoorn is 1896 boot worrn. De Örgel hett Cornelius Geerds Wallies 1755 to boon anfungen un Dirk Lohman denn 1756 kumplett maakt. De Örgel weer för de franzöösch-reformeerte Kark in Emmen, aver as de franzöösch-reformeerte Kark mit de düütsch-reformeerte Kark tohoopgahn is, keem de Örgel 1897 as Geschenk na Holsseln. De Bröder Hillebrand hebbt de Örgel mit ehre söven Registers 1992 bet 1995 restaureert.

Wapen

Dat Wapen wiest baven op sülvern Grund twee grone Nadelbööm. Ünnen op’n grönen Schildfoot is en sülvern Escher to sehn.

Oortsbörgermeesters

opstunns: Frank Berghorn

Kultur

En Denkmaal för de Fullenen ut Holsseln ut de twee Weltkrieg’ steiht bi de Kark.

Verenen

De Freewillige Füürwehr is an’n 15. November 1936 grünnt worrn. Vörher harr dat al en Plichtfüürwehr geven. De Schützenvereen hett sik 1901 grünnt. De Heimatvereen is von 1999 un bedrifft mit de ole Holsseler School en Heimathuus, dat 2008 apenmaakt hett.

Weertschop un Infrastruktur

Luftbild von’n Windpark ut de Tied von dat Repowering 2012

In’n Oosten von dat Dörp liggt en Windpark mit 20 Windrääd von’n Typ Enercon E-82 E2, de en Höögd von 140 Meter un en Leistung von 2,3 Megawatt hebbt. In dat sülve Rebeed bestünn vörher siet 1999 en Windpark mit 25 Anlagen von’n Typ Nordex N54, de 85 Meter hoog weren un en Leistung von 1 Megawatt harrn. De Windpark is 2012 repowert worrn.

Verkehr

Holsseln liggt an de Landsstraat 135, de in’n Noorden na Millm, Olenwoold un Cuxhoben löppt. In’n Süden löppt de L 135 na Sievern, Langen un Bremerhoben. De L 135 warrt in’n Süden von Holsseln von de L 119 krüüzt, de in’n Westen na Dorum löppt un in’n Oosten na Niewohl un Beers. An de L 119, in’n Süüdoosten von’t Dörp so dree Kilometer weg, liggt ok de Opfohrt 4 Niewohl op de Autobahn 27 (Afsnidd Cuxhoben–Bremerhoben).