Holt-Spangen
Holt-Spangen (hoochdüütsch Holte-Spangen) weer fröher en Gemeen un is vondaag en Oortschop binnen de Gemeen Cuxhoben in’n Landkreis Cuxhoben, Neddersassen. De ole Gemeen sett sik tohoop ut de twee Öörd Holt un Spangen.
Historie
ännernHolt-Spangen hett sik 1873 billt, as Holt un Spangen sik to een Gemeen tohoopdaan hebbt. De ne’e Gemeen weer tohoop 4,10 km² groot.
Holt-Spangen hett noch bet to’n Groot-Hamborg-Gesett (1. April 1937) to Hamborg tohöört. Denn is dat Deel von’n Kreis Land Hadeln worrn. An’n 1. Juli 1963 hett sik Holt-Spangen mit Sahlenborg to en Samtgemeen tohoopdaan.
An’n 1. Juni 1970 is Holt-Spangen denn tohoop mit Sahlenborg Deel von de Gemeen Cuxhoben worrn. Vondaag billt Holt-Spangen binnen de Gemeen Cuxhoben en Oortschop mit en egen Oortsvörstand.
In’n Eersten Weltkrieg sünd twee Soldaten ut de Gemeen Holt-Spangen fullen oder vermisst, un in’n Tweten negen[1].
Inwahnertall
ännern| Johr | Inwahners |
|---|---|
| 1. Dezember 1910[2] | 117 |
| 1933[3] | 130 |
| 1939[3] | 169 |
| Dezember 2006 | 292 |
Wapen
ännern
Dat Wapen wiest op roden Grund en gollen Ekentelg mit twee Bläder un een Ecker. Ünnen, dör en sülvern Wellenbalken aftrennt, en gröön Feld.
De Eek un dat rood staht för de Heid un dat Gröön för de Wischen. De Wellenbalken steiht för’n Spanger Beek.
Dat Wapen hett Albert de Badrihaye maakt un de Raad von Holt-Spangen hett dat an’n 10. März 1965 annahmen. De Regerungspräsident in Stood hett dat in’n Juni 1966 genehmigt.
Oortsvörstänn
ännern- opstunns: Ernst-Ferdinand Heidtmann
Kultur
ännernDe Gemeen Holt-Spangen hett ok en Denkmaal för de Fullenen ut de twee Weltkrieg’. Dat Denkmaal is 1921 opstellt worrn.
Infrastruktur
ännernScholen
ännernGanz fröher güngen de Kinner ut Holt un Spangen na Olenwoold na School. In de Midd von dat 19. Johrhunnert harrn de twee Dörper denn den Winter över en egen Schoolmeester, aver keen egen Schoolhuus. School weer to de Tied de Reeg üm in de Hüüs von de Dörplüüd. As Holt un Spangen sik 1873 to een Gemeen tohoopslaten hebbt, hett dat mit de School denn wedder ophöört un de Kinner güngen wedder na Olenwoold. An’n 1. April 1885 hett de Gemeen denn aver ehr egen Schoolhuus un Schoolmeester kregen. Disse School hett dat bet to’n 31. März 1965 geven, denn sünd de Schölers na Olenwoold na School gahn.
Footnoten
ännern- ↑ http://www.denkmalprojekt.org/dkm_deutschland/holte-spangen.htm
- ↑ http://www.gemeindeverzeichnis.de/gem1900/gem1900.htm?hamburg/ritzebuettel.htm
- ↑ a b http://www.verwaltungsgeschichte.de/hadeln.html
Koordinaten:53° 51′ N, 8° 39′ O
Weblenken
ännern
Berensch-Arensch | Cuxhoben | Döös | Duhnen | Groden | Holt-Spangen | Olenbrook | Olenwoold | Sahlenborg | Stickenbüttel | Süderwisch-Westerwisch | Worth