Mairie Bützfleet

De Mairie Bützfleet weer in de Franzosentied (1810 bet 1813) een von de dree Mairien, in de de Kanton Stood indeelt weer. De Seet weer in Bützfleet. Se harr 1547 Inwahners.

Historie

De Ümgegend von Bützfleet hett vör de Franzosentied to dat Grevengericht Bützfleet in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Bützfleet een von de söss Mairien in’n Kanton Drochters von’n Distrikt Stood, Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Bützfleet weer nu een von de dree Mairien in’n Kanton Stood, Distrikt Stood, Departement von de Elvmünnen. De Mairie hett sik von de Grött nich groot ännert. Blots den Oort Brunshusen hett de Mairie Bützfleet von de Mairie Stood tokregen.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Königriek Westfalen:

  Bützfleet ahn dat Huus Hanken un de twee Hüüs bi de Möhl in Butendiek, Hörn, Snee, Götzdörp, Fleet, Depenbeek, Abbenseet, Graueroort, de Moorstreek, Bützfletersand, Bützfletermoor, Schölisch, Schölischermoor

• Kaiserriek Frankriek:

  Bützfleet, Hörn, Snee, Götzdörp, Fleet, Depenbeek, Abbenseet, Graueroort, de Moorstreek, Bützfletersand, Brunshusen (tohoop 1216 Inwahners)

  Bützfletermoor, Schölisch, Schölischermoor (331 Inwahners)

Vondaag sünd düsse Öörd Deel von de Stadt Stood.