Kanton Drochters

De Kanton Drochters weer as Kanton en Verwaltungsrebeed in dat Königriek Westfalen, dat blots von 1810 bet 1811 bestahn hett (Franzosentied). De Seet weer Drochters.

Historie

De Ümgegend von Drochters hett vör de Franzosentied to dat Grevengericht Bützfleet un dat Amt Wischhoben in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Kanton Drochters een von de 16 Kantons in’n Distrikt Stood von dat Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Kanton Drochters is opdeelt worrn op de Mairien Bützfleet un Aßel in’n Kanton Stood un de Mairien Drochters un Hamelwöörden in’n Kanton Freeborg, all in’n Distrikt Stood, Departement von de Elvmünnen.

In’n Harvst 1813 hebbt de Russen de Franzosen slahn un dat Rebeed befreet. Dat Kurförstendom Hannover is denn 1813/1814 wedder herstellt worrn un de ole Stand von vör 1810 wedder dor.

Mairien

De Kanton weer indeelt in söss Mairien:

• Mairie Drochters: Drochters, Doornbusch, Blomendal, Nindörp, Krummenweg, Theisbrügg, Sietwenn, Gauensiek, Aschhoorn
• Mairie Bützfleth: Bützfleet, Hörn, Snee, Götzdörp, Fleet, Depenbeek, Abbenfleet, Graueroort, Moorstreek, Bützfletersand, Bützfletermoor, Schölisch, Schölischermoor
• Mairie Aßel: Aßel, Diekshörn, Ritscherslüüs, Diekreeg, Ritsch, in’t Feld, Butendiek, Weth, Barnkroog, Ringwischmoor, Aßlersand
• Mairie Neeland-Wischhoben: Neeland, Wischhoben
• Mairie Hamelwöörden: Hamelwöörden, Hollenwisch, Olendörp, Holenweg, Wischhoben, Hollerdiek, Moor, Köckweg, Wulfsbrook
• Mairie Kruutsand: Kruutsand

Footnoten

Kantons in’n Distrikt Stood (Königriek Westfalen, 1810–1811)

Drochters | Freeborg | Harsfeld | Himmelpoorten | Hornborg | Jörk | Loomst | Neehuus | Neenkarken | Öberndörp | Oosten | Oterndörp | Steenkark | Stood | Sürsen | Zeven