Mairie Weersbe

De Mairie Weersbe weer in de Franzosentied (1810 bet 1813) een von de dree Mairien, in de de Kanton Hagen indeelt weer. De Seet weer in Weersbe. Se harr 2882 Inwahners.

Historie

De Ümgegend von Weersbe hett vör de Franzosentied to’n Bezirk Oosterstood von dat Amt Hagen in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Weersbe een von de twölv Mairien in’n Kanton Hagen von’n Distrikt Bremervöör, Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Weersbe weer nu een von de dree Mairien in’n Kanton Hagen, Distrikt Bremerleh, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to fiev Mairien höört harrn: de Mairien Weersbe, Saans, Uthleer un Wortfleet ut’n Kanton Hagen un de Mairie Rechtenfleth ut’n Kanton Stotel.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Königriek Westfalen:

  Weersbe, Weersbermoor, Offenwarden, Offenwardermoor

• Kaiserriek Frankriek:

  Weersbe (465 Inwahners), Saans (460), Saanstermoor (44), Offenwarden (289), Offenwardermoor (139), Uthleer (595), Rechtebe (169), Wortfleet (290), Rechtenfleth (431).

Vondaag sünd düsse Öörd Deel von de Gemeen Hagen.