Manatee Highway

Straat in Belize

Karte De Manatee Highway oder ok Coastal Highway is een von de lüttjeren Överlandstraten in Belize. He liggt in de Distrikte Belize un Stann Creek.

De üm un bi 58 Kilometer lange Straat is en Schotterstraat un nich asphalteert.

Verloop ännern

De Highway fangt an’n George Price Highway (Straat von Belmopan na Belize-Stadt) in La Democracia un dicht bi Mahogany Heights an un löppt von dor na Süüdoosten över’n Sibun River. In’n Oosten doot de Western Lagoon un de Southern Lagoon liggen. Bi Gales Point kummt de Straat bet dicht an de Karibische See ran un dreiht denn aver na Süden. De Straat föhrt an’n Oort Mullins River vörbi un geiht över’n Stroom, de ok Mullins River heten deit. In Hope Creek an’t Över von’n North Stann Creek münnt de Straat in’n Hummingbird Highway, de in’n Süüdoosten wieder na Dangriga löppt. Von dor sünd dat ok blots en poor Kilometer bet na de Steed, an de von’n Hummingbird Highway de Southern Highway aftwiegt.

De Straat löppt dorbi dör de dünn besiedelte Küstenebene in en Bagen üm de höger legenen Maya-Bargen (in’n Süüdwesten) rüm.