Philip Goldson Highway

Karte De Philip Goldson Highway (oder ok Northern Highway) is een von de veer groten Highways in dat Land Belize. De Highway is 153 Kilometer lang un föhrt von Belize-Stadt dör de Distrikte Belize, Orange Walk un Corozal na de Grenz to’n Bundsstaat Quintana Roo, Mexiko. De Straat is dörgahns asphalteert un hett twee Sporen.

Highways in Belize. N is de Philip Goldson Highway
De Philip Goldson Highway in Ladyville

Verloop ännern

De Anfang is in Belize-Stadt an’n Flag Roundabout. Över düssen Kreisverkehr kummt een över’n Central American Boulevard ok na’n George Price Highway, de von Belize-Stadt na Belmopan föhrt. Von’n Flag Roundabout löppt de Highway na Noordwesten, toeerst an’n Haulover Creek langs un denn över’n Belize River. He geiht dör de Öörd Ladyville, Lords Bank un Gentleville. Bi Ladyville liggt ok de Philip-S.-W.-Goldson-Flegerhaven. In Gentleville münnt de Burrell Boom Cutoff in’n Highway, de den Philip Goldson Highway över den Oort Burrell Boom mit’n George Price Highway verbinnen deit, so dat de Verkehr twüschen Orange Walk un Belmopan nich dör Belize-Stadt dör mutt.

De Highway geiht wieder an Maxboro langs na Sand Hill. In Sand Hill geiht na Noorden de Old Northern Highway af, de in Carmelita wedder op’n Philip Goldson Highway drippt. Dat weer fröher de Verloop von’n Northern Highway. De hüdige Philip Goldson Highway sülvs löppt wieder na Noordwesten dör Gardenia un Biscayne an de Jones Lagoon langs över Rhaburn Ridge bet na Carmelita un Tower Hill. Dor geiht de Highway över’n New River. Hier dreiht de Highway nu un löppt na Noorden. Mit en Ümtostraat föhrt he üm de Stadt Orange Walk rüm, de dorbi noch twee Maal mit Brüggen över’n New River föhrt.

Von San Jose/San Pablo af an dreiht de Highway na Noordoosten un löppt över Buena Vista, Santa Clara, San Roman un San Narciso na Louisville. Kort achter Louisville twiegt von’n Philip Goldson Highway de Corozal Bypass af, wat en Straat is, de över de Öörd San Pedro, Cristo Rey, Yo Chen un Patchacan na Chan Chen löppt un dor wedder mit’n Philip Goldson Highway verbunnen is. De Straat kört dorbi den Weg över Corozal af.

De Philip Goldson Highway sülvs löppt in en Bagen över de Öörd Concepcion, San Joaquin, Calcutta, Carolina, Ranchito un Corozal. Von de Steed, an de Philip Goldson Highway un Corozal Bypass wedder openanner draapt, löppt de Straat an de Four Mile Lagoon langs na Santa Elena an de Grenz na Mexiko. Dor besteiht en Grenzövergang un en Brügg över’n Hondo River na dat mexikaansche Subteniente López. De Philip Goldson Highway is hier toenn. De Straat geiht in Mexiko aver noch veer Kilometer wieder un münnt dor denn en poor Kilometer in’n Westen von Chetumal in de Carretera Federal 186.

De Fohrtied von Belize-Stadt na de mexikaansche Grenz bedriggt üm un bi twee Stünnen.

Historie ännern

De Straat is 1968 as Northern Highway inricht worrn. An’n 21. September 2012 hett Premierminister Dean Barrow kund daan, dat de Highway to Ehren von’n Politiker Philip Goldson den ne’en Naam Philip Goldson Highway kriggt.[1]

Brüggen ännern

Brüggen gifft dat över de Strööm Belize River (Haulover Bridge), New River (3×) un Hondo River. De Brügg över’n Hondo River is twüschen 2007 un 2013 boot worrn. Vörher güng de Straat merrn dör de Öörd Santa Elena un Subteniente López. Straat un Brügg bestaht noch, sünd nu aver blots noch för Footgängers un lüttjere Fohrtüüg apen.

Footnoten ännern

  1. Two highways renamed on Independence Day in honor of National Heroes, The San Pedro Sun an’n 29. September 2012

Weblenken ännern

  Philip Goldson Highway. Mehr Biller, Videos oder Audiodateien to’t Thema gifft dat bi Wikimedia Commons.