Manteldreger
De Manteldreger (Larus marinus), up Platt ok woll Börgermeester oder Paster nömmt, up Hoochdüütsch Mantelmöwe, is en Vagel ut de Familie vun de Möwen (Laridae). Tohuse is se an de Küsten in Noord- un Nordwesteuropa, in Gröönland un in’n Noordosten vun Noordamerika. An de düütsche Waterkant un an de Waddensee brott he nich. In Europa gifft dat den gröttsten Bestand in Norwegen, Grootbritannien, Iesland un Sweden. De Populatschonen hooch ut’n Norden treckt in’n Winter na Süden oder Westen hen, de meisten annern blievt, wo se sünd.
| Manteldreger;
Manteldrager; Börgermeester; Paster | ||||||||||
|---|---|---|---|---|---|---|---|---|---|---|
 | ||||||||||
| Systematik | ||||||||||
| ||||||||||
| Wetenschoplich Naam | ||||||||||
| Larus marinus | ||||||||||
| (Linnaeus, 1758) |
Wiethen hollt sik de Manteldreger an de Waterkant. Dor boot he siene Nester an Stäen, wo numms henkamen kann, as up Eilannen un Felsklippen. Dat kummt fökener vor, datt he in Kolonien vun annere Möwen bröden deit. Dor besett he denn de hööchsten Stäen, de an’n besten Oversicht hefft. Freten deit he sunnerlich Deerter un Affall. Faken grippt he sik annere Vagels oder jaagt jem de Büte af, faken fritt he avers ok Fisch un annere Deerter ut de See.
In’n Loop vun dat 20. Johrhunnert hett de Bestand vun den Manteldreger bannig tonahmen. Sunnerlich in Noordamerika is dat bannig fix gahn.
Kennteken
ännernDe Manteldregers sünd de gröttste Aart mank de Möwen. Se könnt 74 cm lang weern un ehre Flunken spannt se bit hen to 1,5 m ut. Utwussene Vagels dreegt en swatten Mantel. Jungvagels sünd eerst mol bruun spickt un kriegt den swatten Mantel eerst in dat drüdde Vörjohr an. De Snavel is geel mit en roden Placken. De Poten hefft de Klöör vun Fleesch.
Wie he leven deit
ännernGegen de meisten annern Möwen over sünd Manteldregers normolerwiese Roofdeerter un jaagt annere Vagels ehre Büte af. Man se folgt ok Buckelwale, Heringshaie un Swarms vun Blaufinnthunfische na, un profiteert dor denn vun, wenn düsse Deerter Seefische upjaagt, so, datt se na boven an de See kaamt. Manteldregers sünd dor bekannt for, datt se as Roofvagels in Seevagelkolonien Eier un Küken vun Seepapagoyen, Seekuten, Kobben, Swattkoppmöwen un annere Vagels freten doot. Se könnt ok grote Seepapagoyen, Kieren, Singvagels up’n Tog un lüttje Aanten angriepen, versupen un daalsluken, ohn dor vun aftobieten.[1]
Wie he sik vermehrt
ännernDat Nest is ut allerhand Plantendeele tohopenboot un utstaffeert mit Feddern un Gras. De Manteldregers leggt dree brune Eier mit dunkere Placken. Dor sitt se denn 23 bit 26 Dage up to bröden.
Literatur
ännern- Klaus Malling Olsen, Hans Larsson: Gulls of Europe, Asia and North America, Helm Identification Guides, Christopher Helm, London 2003 (nee upleggt 2004, Fehlers rutnahmen), ISBN 978-0-7136-7087-5, S. 128–140
- Urs N. Glutz von Blotzheim, K. M. Bauer: Handbuch der Vögel Mitteleuropas, Band 8/I, Charadriiformes (3. Deel), Schnepfen-, Möwen- und Alkenvögel, AULA-Verlag, ISBN 3-923527-00-4, S. 675–699
- Thomas P. Good: Great Black-backed Gull (Larus marinus) in A. Poole (Rutg.): The Birds of North America Online, Cornell Lab of Ornithology, Ithaca 1998, doi:10.2173/bna.330
- Josep del Hoyo, Andrew Elliott, Jordi Sargatal (Rutg.): Handbook of the Birds of the World. Volume 3: Hoatzin to Auks. Lynx Edicions 1996, ISBN 978-84-87334-20-7, S. 605
Kiek ok bi
ännern- List vun Vagels, mit allerhand plattdüütsche Vagelnaams un Naams ut de Naberspraken
- Projekt: Deerternaams up Platt
