Michael James McCulley

Michael James McCulley (* 4. August 1943 in San Diego, Kalifornien, USA) is en ehmalger US-amerikaansch Astronaut.

Werdegang

McCulley kreeg 1971 en Bachelor un en Master in Metallurgietechnik vun de Purdue University.

1961 gung he to de United States Navy un hett toeerst up verscheeden U-Booten Deenst maakt. Nah sien Studium an de Purdue University vun 1965 bit 1970 hett he en Utbillen as Marinefleeger maakt un ansluutend de Empire Test Pilots School in Grootbritannien besöcht, wo he to’n Testpiloten utbildt wurr. Nahdem he as Testpilot an dat Naval Air Test Center in Patuxent River in Maryland insett wurr, wessel he to Insatzen up de Floogtüüchdräger USS Saratoga un USS Nimitz.

Astronautentätigkeit

In’ Mai 1984 wurr McCulley vun de NASA as Astronautenanwärter utwählt. Nahdem he sien Utbillen as Shuttle-Pilot afslooten harr, wurr he ünner annern as Weerkoordinator, Technisch Assistent in de Afdeelen Flight Crew Operations un Liddmaat vun de Ünnerstüttensmannschapen (Cape Crusader) an dat Kennedy Space Center insett.

STS 61-N

In’ Dezember 1985 wurr McCulley as Pilot för de Mission STS-61-N vun dat US-Ministerium för't Verdeffenderen indeelt. As wiedere Crewliddmaaten weern Kommandant Brewster Shaw, de Missionsspezialisten James Adamson, David Leestma un Mark Brown as ok de Bruuklastspezialisten Frank Casserino (MSE) un Lawrence Skantze (DoD) vörsehn. De Floog sull in’ September 1986 starten, wurr aber nah de Challenger-Katastrooph an’ 28. Januar 1986 afseggt.

STS-34

An’ 18. Oktober 1989 is McCulley as Pilot vun de Ruumfähre Atlantis in’t All flagen. Kommandant bi disse Mission weer Donald Williams. Dorto keemen de Missionsspezialisten Franklin Chang-Diaz, Shannon Lucid un Ellen Baker.

De Hööftbruuklast weer de Jupitersonde Galileo. Se wurr tosommen mit de Raketenböverstuuf Inertial Upper Stage (IUS) iin den Weltruum utsett. Wiederhen wurrn Experimente to Eerderkunnen, Umweltforschung, Materialtechnologie, Astronomie un Medizin dörführt un dat weer en IMAX-Kamera an Bord. Filmupnahmen vun de Mission wurrn in den Science-Fiction-Film The Wild Blue Yonder vun Werner Herzog bruukt.

Nah de NASA

Nah sien Utscheeden ut de NASA in’ Oktober 1990 wessel McCulley to Lockheed Martin Space Operations. Af 1996 hett he denn för United Space Alliance arbeit. In’ November 1999 wurr he Chief Operating Officer (COO) un in’ Mai 2003 Chief Executive Officer (CEO, Geschäftsführer) bi United Space Alliance. In’ September 2007 gung McCulley vun den CEO-Posten bi United Space Alliance in den Ruhestand.

Privates

Michael McCulley is verheiradt un hett söss Kinner.

Weblenken

Michael J. McCulley. Mehr Biller, Videos oder Audiodateien to’t Thema gifft dat bi Wikimedia Commons.

NASA: Biografie (engelsch)
spacefacts.de: Körtbiografie