Ooldklooster

Oort in de Gemeen Buxthu in’n Landkreis Stood, Neddersassen
(wiederwiest vun Ooltklooster)
Wapen/Flagg Koort
Wapen unbekannt
Ooldklooster
Laag vun Ooldklooster in Düütschland
Basisdaten
Bundsland: Neddersassen
Landkreis: Stood
Gemeen: Buxthu
Inwahners:
Postleettall: 21614
Vörwahl: 04161
Geograafsche Laag:
Koordinaten:53° 28′ N, 9° 41′ O
53° 28′ N, 9° 41′ O

Karte

Ooldklooster (hoochdüütsch Altkloster) is en Oort in de Gemeen Buxthu in’n Landkreis Stood, Neddersassen. Vondaag is dat fröhere Dörp ganz mit de Stadt Buxthu tohoopwussen. To Ooldklooster höört von öllers ok de Hoff Brillenborg to. Ok de Hüüs in’n Ellerbrook hebbt to Ooldklooster höört.

En lütten Deel von Ooldklooster, op’n Kloosterbarg, hett fröher to Eindörp höört.

Geografie ännern

Ooldklooster liggt an de Eest op de Stoder Geest, nich wied von’n Rand hen na Moor un Masch.

De Naveröörd sünd Buxthu in’n Noordoosten, Eindörp in’n Süüdoosten, Pippens un Heimbrook in’n Süden, Ottens un Obbens in’n Süüdwesten, Grundolendörp in’n Westen un Heendörp, Neeklooster un Heitmannshusen in’n Noordwesten.

Historie ännern

De Eddellüüd Gerlach un Henrik von Buxthu harrn keen Söhns hatt un wullen 1197 mit jemehr Besitt en Klooster stiften. Mit Verlööv von Bischop Rudolf von Veern is denn bi Ooldklooster en neet Benediktiner-Nunnenklooster anleggt worrn.

Wohrschienlich 1285 is denn dicht bi dat Klooster von’n Bremer Arzbischop Gisbert vun Bronchorst en Stadt anleggt worrn. Disse Stadt hett later Buxthu heten. Eerst nadem 1286 dat Klooster an de Lüh na Bredenbeek ümtagen is, hett Bredenbeek Neeklooster heten un Ooldklooster hett sien hüdigen Naam kregen. Na’n Westfäälschen Freden 1648 in de Swedentied dröff dat Klooster nich mehr wiedermaken. De Nunnen dröffen noch bet to jemehr Dood in’t Klooster blieven, aver dat schull kene ne’en Nunnen mehr geven. Ut den Kloosterbezirk is denn dat Amt Ooldklooster worrn.

De letzte Pastoor in de Kloosterkark, Heribert von Schapen, is 1695 doodbleven un de Lüüd ut Ooldklooster güngen denn na Buxthu na Kark. De Kloosterkark is 1769 dalreten worrn.

Nadem dat mit dat Klooster toenn weer, weer Ooldklooster man noch en lütt Buurdörp. Eerst as Johann Hinrich Winter 1816 de lüttje Poppeermöhl, de dat al siet opminnst 1622 geven harr, köfft un utboot hett, hett sik dat wedder ännert. 1865 is ut dat Ünnernehmen en AG worrn. Üm 1900 hebbt in de Wintersche Poppeerfabrik mehr as 300 Lüüd arbeidt. Bi en Brand 1917 is de Fabrik meist kumplett afbrennt un 1925 hett de Fabrik denn dichtmaakt. Op dat Gelänn von de Fabrik weer denn von 1954 af an de Obstmosterei Klindtworth, de 1968 von Granini köfft worrn is. Dat Granini-Wark hett 1994 dichtmaakt.

In’n Eersten Weltkrieg sünd 119 Soldaten ut Ooldklooster fullen oder vermisst[1].

Verwaltungsgeschicht ännern

Dat Amt Oold- un Neeklooster is an’n 1. Juli 1823 oplööst worrn un weer denn bet 1852 Deel von dat Amt Harsfeld. In dat Johr is de Oort in dat Amt Hornborg wesselt. Dat Amt Hornborg is aber blots bet 1859 bestahn bleven un Ooldklooster hett denn wedder to dat Amt Harsfeld höört. Mit’n 1. April 1885 is dat Amt oplööst worrn un de Oort is Deel von’n Kreis Stood worrn. 1932 is dat Deel von’n ne’en, grötteren Kreis Stood worrn.

Ooldklooster is 1931 Deel von de Gemeen Buxthu worrn.

Inwahnertall ännern

Johr Inwahners
1791-00-001791[2] 17 Füürsteden
1812-00-001812[3] 216
1824-00-001824[4] 31 Füürsteden
1848-00-001848[5] 277 Lüüd, 34 Hüüs
1871-12-011. Dezember 1871[6] 493 Lüüd, 47 Hüüs
1910-12-011. Dezember 1910[7] 2.770

Kloosterbarg (to Eindörp):

Johr Inwahners
1848-00-001848[8] 17 Lüüd, 3 Hüüs
1871-12-011. Dezember 1871[9] 23 Lüüd, 5 Hüüs

Religion ännern

Ooldklooster is evangeelsch-luthersch präägt un höört to dat Kaspel von de St.-Petri-Kark in Buxthu. För de Kathoolschen is de St.-Maria-Kark in Buxthu tostännig.

Gemeenvörstehers ännern

  • ~1910: Johann Allers
  • 1. Januar 1920-31. März 1923: Johannes Krancke
  • 1923-1931: Franz Andreas

1931 is Ooldklooster Deel von Buxthu worrn un harr denn keen Gemeenvörstehers mehr.

Kultur ännern

En Denkmaal för de Fullenen ut den Eersten Weltkrieg steiht bi’n Karkhoff.

Verenen ännern

De Schüttenvereen Ooldklooster is an’n 6. Mai 1883 grünnt worrn un fiert elk Johr an’t eerste Wekenenn in’n August sien Schützenfest.

Weertschop un Infrastruktur ännern

De Volksbank Geest hett in Ooldklooster in de Straat Delmer Bagen 14 en Filiaal.

Verkehr ännern

Ooldklooster liggt an de Bundsstraat 73, de in’n Oosten na Öbergünn un Vosshusen löppt un in’n Noordwesten na Neeklooster, Heendörp un Hornborg. Na Süden un Süüdwesten loopt de Landsstraat 141 (över Pippens un Doans na Misborg), de Kreisstraat 52 (över Ottens na Nindörp un Guldbeek) un de Landsstraat 127 (na Obbens).

De nächste Bahnhoff is de Bahnhoff Buxthu an de Nedderelvbahn un de Bahnlien Bremerhoben–Buxthu.

Scholen ännern

De Grundschool Ooldklooster is 1890 grünnt worrn un hett vondaag so bi 425 Schölers un 25 Schoolmeesters.

Ver- un Entsorgung ännern

För dat Afwater is de Stadtentwässerung Buxthu tostännig.

Lüüd ännern

De Theoloog Johannes Fürsen weer von 1633 bet 1638 Pastoor in Ooldklooster.

Literatur ännern

  • A. H. F. Gast: Führer durch Buxtehude, Altkloster und Neukloster. 1930

Footnoten ännern

  1. http://www.denkmalprojekt.org/dkm_deutschland/buxtehude-altkloster_ns.htm
  2. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 8
  3. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 57
  4. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 16
  5. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 134
  6. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 141
  7. Inwahnertallen op gemeindeverzeichnis.de
  8. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 99
  9. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 131