Oscar Mira (* 1973 in’n Distrikt Cayo) is en Politiker ut Belize (PUP).

Mira is 1973 as Söhn von en Inwannerer ut El Salvador in’n Distrikt Cayo von Belize boren un in’n Stadtdeel Salvapan von Belmopan opwussen.[1][2] He güng in Belmopan op de Grundschool un denn op de Belmopan Comprehensive School. Glieks na de School is he as Soldaat bi de Belize Defence Force (BDF) anfungen. He is 1993 op de Royal Military Academy Sandhurst (Grootbritannien) utbillt worrn un hett en Master in Natschonale Sekerheit un Strategie an de University of the West Indies (Jamaika) maakt. Mira weer bi de BDF na över 23 Deenstjohren toletzt Major. In düsse Tied weer he ünner annern Militärattaché in de Baadschop von Belize in Guatemala-Stadt un Viez-Koordinater för Natschonale Sekerheit bi dat Ministerium för Natschonale Sekerheit.

Vör de Parlamentswahl in Belize 2015 hett Mira an’n 5. November 2013 bi de PUP-Vörwahl in’n Wahlkreis Belmopan 292 Stimmen kregen, wat nich reckt hett, üm sik gegen Patrick Jason Andrews (788 Stimmen) dörtosetten.[3]

Vör de Parlamentswahl 2020 hett Mira sik an’n 26. August 2018 bi de PUP-Vörwahl in’n Wahlkreis Belmopan mit 653 Stimmen gegen Wiseman Pat (94 Stimmen) un Michelle Rodriguez (171 Stimmen) dörsett.[4] Bi de Wahl an’n 11. November 2020 hett he denn 60,09 % von de Stimmen kregen un kunn sik gegen John Birchman Saldivar von de UDP un de unafhängige Kannedatin Anna Banner-Guy dörsetten. Dormit is he siet November 2020 Maat von dat Repräsentantenhuus von Belize.

An’n 16. November 2020 is he as Staatsminister in dat Ministerium för Verdeffenderen un Grenzsekerheit (ünner Minister Florencio Marin Jr.) insworen worrn (Kabinett Briceño I).

Footnoten ännern

  1. An Officer, A gentleman, And A Politician?! Major Mira Explains His PUP Passion, 7 News Belize an’n 27. August 2013
  2. PUP Aspirant, Mira, Is Belizean, 7 News Belize an’n 6. September 2013
  3. “John, your days are numbered!”, Amandala an’n 5. November 2013
  4. Oscar Mira is new PUP Belmopan standard bearer, Amandala an’n 29. August 2018