Schedensnavels

De Schedensnavels (Coleorrhyncha) sünd en Unnerornen mank de Snavelinsekten. Wohrschienlich hannelt sik dat um en Sustergrupp vun de Wandlüse. De eenzige Familie, de hüdigendags noch leven deit, sünd de Moss-Wandlüse (Peloridiidae). Se sünd in de matigen Breden un in de Subantarktis up de Süüdhalfkogel to finnen. De dree annern Familien, vun de dat hüdigendags bloß man noch fossile Exemplare gifft, weern ok in annere Regionen vun’e Eer tohuse. De hüdigen Schedensnavels sünd also wohrschienlich de Overrest vun en gröttere Verwandtschop mit mehr Aarden, de dat vörtieds mol geven hett.

Schedensnavels
Xenophyes rhachilophus, en Moss-Wandluus ut Neeseeland
Systematik
Stamm: Liddfööt (Arthopoda) Ünnerstamm: Tracheendeerter (Tracheata) Böverklass: Sessfööt (Hexapoda) Klass: Insekten (Insecta) Ünnerklass: Fleeginsekten (Pterygota) Böverornen: Neeflunken (Neoptera) Ornen: Snavelinsekten (Hemiptera) Ünnerornen: Schedensnavels (Coleorrhyncha)
Wetenschoplich Naam
Coleorrhyncha
Myers & China, 1929

Kennteken

De hüdigen Moss-Wandlüse sünd lüttje Insekten, bi 2 bit 5 Millimeters groot un bruun in’e Farv. Meist tarnt se sik unner en Schicht ut Schiet un Plantenstreih. De Deekflunken laat mit ehr Trallenwark na de Flunken vun Nett-Wandlüse. De Kopp is bannig breed, man kort un driggt buten up twee Steele je een Knoppoge (Lüttogen (Ocelli) finnt sik bloß man bi een Aart). De korten Föhlspriete bestaht ut dree Le’e, dat leste is en beten dicker, as en Külen. Se sünd unner’n Kopp versteken. Wiet achtern up de Unnersiete vun’n Kopp geiht en Suugrüssel na achtern af. Wenn he nich bruukt warrt, is dor bloß man dat Labium vun to sehn.

Systematik

• Unnerornen Coleorrhyncha
  • Familie † Progonocimicidae
    • Unnerfamilie † Cicadocorinae
    • Unnerfamilie † Progonocimicinae
  • Böverfamilie Peloridioidea
    • Familie † Hoploridiidae (bloß ut de unnere Kried in de Transbaikal-Region, Russland)
    • Familie † Karabasiidae
    • Familie Peloridiidae (Moss-Wandlüse)

Literatur

• D. Burckhardt (2010): Mooswanzen – Peloridiidae (Hemiptera, Coleorrhyncha), eine enigmatische Insektengruppe. Entomologica Austriaca 17: 9-22.
• M.-C. Larivière, D. Burckhardt, A. Larochelle (2011): Peloridiidae (Insecta: Hemiptera: Coleorrhyncha). Fauna of New Zealand / Ko te Aitanga Pepeke o Aotearoa 67. 78 pp. ISBN 978-0-478-34731-9

Weblenken

Schedensnavels (Coleorrhyncha). Mehr Biller, Videos oder Audiodateien to’t Thema gifft dat bi Wikimedia Commons.