Snavelinsekten

De Snavelinsekten oder Halfflunken (Hemiptera, Rhynchota) sünd en Ornen mank de Insekten. Se höört to de Neeflunken (Neoptera) mit to. In de Encyclopedia of Entomology stunn 2008 in, datt dor bi 82.000 Aarden vun beschreven wurrn sünd. De Tahl vun Aarden weltwiet is dor up 200.000 bi taxeert wurrn. Dor leevt bi 8.000 vun in Europa. To de Hemiptera weert unner annern de Grootgruppen (Unnerornens) vun de Plantenlüse, de Zikaden un de Wandlüse totellt. Na Gestalt, Farv un de Wiese, wie se leven doot, verscheelt sik de allerhand Aarden bannig.

Snavelinsekten; Halfflunken
Kalidasa lanata (en Lantüchtendreger in Indien)
Systematik
Stamm: Liddfööt (Arthopoda) Ünnerstamm: Tracheendeerter (Tracheata) Böverklass: Sessfööt (Hexapoda) Klass: Insekten (Insecta) Ünnerklass: Fleeginsekten (Pterygota) Böverornen: Neeflunken (Neoptera) Ornen: Snavelinsekten (Hemiptera)
Wetenschoplich Naam
Hemiptera; Rhynchota
Linnaeus, 1758

Campyloneura virgula, en Weeke Wandluus (Miridae)

(Eurhadina pulchella), en Blattzikade (Typhlocybinae)

Myzus persicae, en Röhrenblattluus (Aphididae)

Mundwarktüge vun enWandluus

Kennteken

All Gruppen mank de Snavelinsekten hefft Mundwarktüge, wo se mit steken un sugen könnt. De Unnerlipp is dor as en Gööl utbillt wurrn, wo de Steekröhren in langs lopen könnt, de ut Mandibeln un Maxillen utformt wurrn sünd. En Deel vun de Maxillen heet Lacinien. Dor loopt twee Kanals in: Dör den een kann suugt weern, dör denn annern kann Spee in de Freetstell speet weern. Bi all Snavelinsekten sünd Deele vun de Mundhöhlen to en Suugpumpe ummuddelt wurrn. Bi de wecken Aarden sünd de Vörbeen to Griepbeen ummuddelt, bi de annern sünd de Achterbeen to Roder- oder Jumpbeen wurrn. Meist gifft dat twee Paar Flunken.

Systematik

Ütere Systematik

In de Kladistik steiht de Ornen vun de Snavelinsekten binnen de Condylognatha gegen de Ornen vun de Franjenflunken (Thysanoptera) over. De Condylognatha staht nu wedder binnen de Acercaria gegen de Psocodea over. Wohrschienlich sünd de Acercaria de dichotome Sustergrupp vun de Eerdlüse (Zoraptera) binnen de Paraneoptera.

Binnere Systematik

De Aarden in düsse Gruppen verscheelt sik bannig. Se weert indeelt in de Grootgruppen Zikaden, Plantenlüse, Wandlüse un Schedensnavels. Binnen de Snavelinsekten sünd veer oder fiev monophyleetsche Gruppen bekannt. Se weert meist as Unnerornens ankeken.

• Zikaden (Auchenorrhyncha), mit de Infraordines
  • Lantüchtendregers (Fulgoromorpha) un
  • Singzikaden (Cicadomorpha)
• Prosorrhyncha
  • Wandlüse (Heteroptera)
  • Schedensnavels (Coleorrhyncha)
• Plantenlüse (Sternorrhyncha)

Kiek ok bi

• List vun Insekten

Literatur

• J. L. Capinera (Rutg.): Encyclopedia of Entomology. 2. Auflage, Springer Verlag, 2008 ISBN 1402062427

Weblenken

Snavelinsekten. Mehr Biller, Videos oder Audiodateien to’t Thema gifft dat bi Wikimedia Commons.