Star Trek: Deep Space Nine
| Daten vun de Reeg | |
|---|---|
| Plattdüütsche Titel: | — |
| Düütsche Titel: | Star Trek: Deep Space Nine |
| Originaltitel: | Star Trek: Deep Space Nine |
| Produkschoonsland: | USA |
| Produkschoonsjohr(en): | 1992–1999 |
| Produzent(en): | |
| Episodenläng: | ~43 Minuuten |
| Episodentall: | 176 in 7 Staffeln |
| Originalspraak: | |
| Musik: | |
| Titelleed: | |
| Idee: |
Rick Berman |
| Genre: | |
| Eerst Sennen: | 4. Januar 1993[1] |
| Eerst Sennen (D): | 28. Januar 1994 op Sat.1 |
| Dorsteller | |
|
Hööftdorstellers:
Nevendorstellers: Afsnitt in’n Artikel | |
Star Trek: Deep Space Nine, kort ok DS9, is en US-amerikaansche Science-Fiction-Reeg, de 1993 in de USA in’t Feernsehn kamen is. Dat is de drüdde Feernsehreeg – wenn een mol de Tekentrick-Reeg buten vör lett, de ahn Spood lopen is – ut dat Star-Trek-Universum, dat Gene Roddenberry sik inst utdacht hett. De Reeg lööp bit 1999 und ümfaat 176 Episoden, de Begeevnissen ründüm de Ruumstatschoon Deep Space Nine.
Deep Space Nine stellt sik anners dor, as een dat vun de Star-Trek-Regen dorför gewohnt weer: Se is de eerste, de nich op en Ruumschipp speelt, un de Inholt warrt dorüm vun en folgen- un staffelövergriepen Rahmengeschicht bestimmt. Eenige vun de Themen, de in fröhere Regen behannelt worrn sünd, blievt in disse Reeg buten vör. Se befaat sik tomeist mit de Rebeden Krieg, Politik un Religion.
Inholt vun de Reeg
ännernDe Reeg speelt op de Ruumsstatschoon Deep Space Nine. Disse Statschoon weer vörmols vun de Cardassianer to’n Bargbo bruukt, as se noch den Planeten Bajor besett hollen un ünnerdrückt hebbt. Dormols harr se noch den Naam „Terok Nor“ un stünn ünner dat Regeer vun Gul Dukat. To Anfang vun de Reeg befinnt sik de Statschoon noch in’n Orbit üm Bajor un warrt vun Commander Benjamin Sisko, en Offizeer vun de Steernflott övernahmen. De Steernflott will dormit Präsenz in bajoraanschen Ruum wiesen, as de Bajoraner vör hebbt, Liddmaat in de Steernflott to warrn.
In de Pilotfolg deckt de ne’e Besatten vun DS9 in de Neeg en bestännig Wormlock op, dat den Alpha-Quadranten, in den de Steernflott to Huus is, mit den Gamma-Quadranten verbinnen deit. Natürlich is dat Wormlock dordör vun grote strategische Bedüden un somit Grund vör wedderkehren Kunflikten. Üm den Besittansprook op dat Wormlock düütlich to maken, warrt de Statschoon korterhand na’t Wormlock verleggt un hollt sien Positschoon nipp un nau vör de Ruumanomalie. Dorto kummt, dat Sisko de hele Tiet mit en unbestännige bajoraansche Regeren to doon hett.
In de eersten Staffeln dreiht sik de Geschicht vör allen üm den Striet twüschen de Bajoraner, de Föderatschoon un de Cardassianer, de sik na Johrteihnten vun jemehr Besetten jüst kort vör’n Anfang vun de Reeg vun Bajor torüchtogen hebbt – wat noch nich bi all Cardassianers in’n Kopp ankamen is. Mit de tweeten Staffel warrt en ne’e Partei in de Geschicht inföhrt, neemlich dat Dominion, wat de bestimmen Macht in’n Gamma-Quadranten is. Anföhrt warrt dat Dominion vun de so nöömten „Grünners“, de ok as Wesselbälgers betekent warrt, vun wegen dat se jemehr Gestalt vullstännig ännern künnt. Disse Grünners hebbt twee twee Spezies genetisch dorhen ännert, dat se jem ahn Bedingen fologen doot un jem as Gödder acht.
De Verloop vun de Geschicht is kenntekent vun wesseln politische Situatschonen, sik ännern Allianzen un Striet twüschen de verscheden Völker un Personen. So föhrt de Klingonen toeerst Krieg gegen de Steernflott un gegen de Cardassianer, üm later denn tosamen mit de beiden gegen dat Dominion to bestahn. Man ok binnen de Völker gifft dat verschedene Partein, de sik nich eens sünd un sik deelwies afsplitten doot. Op Siet vun de Föderatschoon is dort bispeelswies de Maquis, de en Guerillakrieg gegen de Cardassianers föhrt, wiel op Sieten vun de Cardassianers de Obsidiaansche Orden oder bi de Steernflott de Sekschoon 31 – beids Geheemdeensten – op egen Verantworten un deelwies sogor gegen de egen Regeren vörgaht. De Ruumstatschoon steiht dorbi wegen ehr strategische Laag jümmer wedder in’n Middelpunkt un deent togliek ok as Opfangsteed för Flüchtlingen.
En Aspekt, de jümmer wedder in de Reeg opgrepen warrt is de Religion. De Bajoraner verehrt to’n Bispeel dat Volk, wat dat Wormlock maakt hett un dorin leevt, as jemehr „Propheten“. Un as Sisko dat Wormlock opdeckt hett un mit dat Volk snackt hett warrt he sülvst as jemehr Afsenntenansehn un acht. Dormit fallt em blangen sien Verwaltungsopgaven ok noch de en hoge spirituelle Rull to, vun de he anfangs gor nix weten will, mit de he sik denn aver jümmer mehr identifizeert un de opletzt för’t Enn vun de Reeg en bedüden Rull speelt.
Üm dat de Geschicht nich jümmers blots op de Ruumstatsschoon fastleggt is, hett de Besatten de Mööglichkeit, mit Shuttlescheep, so nöömte Runabouts („Flitzers“) to reisen, de na grote Strööm op de Eer nöömt sünd (t. B. Rio Grande, Mekong, Orinoco oder Ganges). Tosätzlich warrt op de Statschoon to Anfang vun de drüdden Staffel dat lütte Ruumschipp USS Defiant statschoneert, wat den Akschoonskreis vun de Besatten noch mol düütlich utwieten deit. De Defiant is as Kriegsschipp utleggt, de gegen de Gefohr dör’t Domion helpen schall. Dat Schipp warrt noch wieter utrüst, as to’n Bispeel mit en Tarnvörrichten vun de Romulaners, un warrt in’n wieteren Verloop vun de Reeg jümmer wedder för Butenmischonen insett (ok in den Star-Trek-Film Star Trek: First Contact).
Personen in de Reeg
ännernBenjamin Sisko
ännernBenjamin Sisko is de kommandeeren Offizeer op de Ruumstatschoon DS9. In de eersten Folg warrt Sisko toeerst as Eersten Offizeer vun de USS Saratoga inföhrt. In de Slacht gegen de Borg bi Wolf 359 warrt sien Schipp düchtig beschaten un opletzt tonichten maakt. Mit sien Söhn Jake kann Sisko sik noch redden, vördem dat Schipp ut’neen flüggt, man sien Fro, de bi den Angreep doodbleven is, mutt he torüch laten. As de Cardassianer sik later vun de Terek Nor torüchteht, schickt de Steernflott em, üm dat Regeer op de Ruumstatschoon, de vun nu an Deep Space Nine heet, to övernehmen.
Toeerst will Sisko den Posten nich recht annehmen un speelt sogor mit den Gedanken, ut de Steernflott ruttogahn. Mit de Tiet finnt he aver jümmer mehr in sien ne’e Opgaav rin un föhlt sik an’t Enn so verbunnen mit Bajor, dat he dor sien ne’e Heimat in sütt. In’n Verloop vun de Reeg warrt he to’n Captain beföddert un nimmt ok en föhren Rull in, as dat to’n Krieg mit dat Dominion kummt. Wiel he privat as’n Anhanger vun’n Baseball-Sport un passioneerten Hobby-Kock dorstellt warrt, un sik in’n Verloop vun de Reeg in de Kapitänsche Kassidy Yates verkieken deit, steiht he in sien Amt as’n gradlienigen aver ok pragmaatschen Vertreder vun de Grundsätz vun de Steernflott. Dorbi sett he sik ok mol över Orders weg, wenn he meent, dat se nich goot för de Föderatschoon sünd. Man in’n Krieg wiest he sik as’n harden Hund, de nich opgifft un – wenn dat nödig warrt – ok sien egen Leven op’t Speel sett.
Kira Nerys
ännernKira Nerys is en bajoraansche Soldatin in’n Rang vun en Major (later in de Reeg warrt si in’n Rang vun’n Colonel beföddert). Se is vun de bajoraanschen Regeren as Verbinnensoffizeer op de Ruumstatschoon sennt worrn un steiht Sisko dor as Eerste Offizeersche an de Siet. Major Kira is dormit en wichtige Person bi’n Wedderopbo vun Bajor un as Middelsfor twüschen ehr Volk un de Föderatschoon.
Opwassen is Kira ünner gresige Bedingen wiel de Besetten dör de Cardassianer. Al fröh hett se ehr Öllern verloren un weer in’t Öller vun 13 Johren vun en Wedderstandsgrupp anhüert, de in Guerillataktik Terroranslääg op cardassiaansche Inrichten – militäärsch as ok zivil – dörföhrt hett. Na de Besetten hett se en hogen Rang in’t Militär kregen. Kira is en resolute Fro, de sik to helpen weet un ok al veel beleeft hett. Liekers, is se en Fro mit Geföhl, de en dulle Binnen to ehrn Heimatplaneten hett un Weert op ehr Frünnen leggt.
In’n Verloop vun de Reeg hett se eerst wat mit den Geistlichen Vedek Bareil, de aver denn an de Folgen vun en Unfall dood blifft. Later hett se en Affär mit den Anföhrer vun ehr fröheren Wedderstandszell un to’t Enn vun de Reeg hen mit Odo, den Sekerheitsbaas vun DS9. Wiel de Reeg warrt Kira "Lehmudder" för en Kind vun Miles un Keiko O’Brien. Dat weer an sik nich vörsehn un keem dorher, dat de Schauspelersche, Nana Visitor, swanger worrn weer.
Odo
ännern
Constable Odo is de Sekerheitsbaas op de Statschoon, un dat is he al to Tieten vun de cardassiaanschen Herrschop worrn vun wegen sien överragen Anlaag, Verbreken optoklooren un dorbi afsluut objektiv vörtogahn. Ut de sülven Grünnen hett behollt ok Sisko em as Sekerheitsbaas. Odo is en Wesselbalg, de sien Gestalt ännern kann as he dat will. Dat he sülvst een vun hunnert Nakamen vun de „Grünners“ ut’n Gamma-Quadranten, warrt he eerst in’n Verloop vun de Reeg gewohr. Dör siene Afkumst steiht he in’n Krieg gegen dat Domion eerst twüschen de Fronten, sleiht sik opletzt aver op de Siet vun de Föderatschoon.
Teemlich fröh al fühlt sik Odo to Kira hintagen, troet sik aver nich ehr wat dorvun to seggen. He kennt ehr al ut de Tiet vu Terek Nor, as he Sekerheitsbaas vun Gul Dukat weer. Sien Leev warrt later denn ok antert un Odo un Kira warrt en Poor. Op de Statschoon wannelt he sien Gestalt af un an, to’n Opklooren vun Verbreken. He is ok verantwoortlich för’t Enn vun’n Domion-Krieg, as he sien Volk övertüügt, dat se nich annere ünnerdrücken mööt, üm sülvst to överleven.
Jadzia Dax
ännernJadzia Dax is en vereenigten Trill, d. h. se is egentlich twee Personen: en minschlichen Weert un en wormlieken Symbionten, de dat Weten vun sien fröheren Weerten mitnehmen deit. Sisko kennt Dax vun de Tiet as se gemeesom op de USS Livingston deent haarn, as he noch as Curzon Dax leev. Jadzia is en levenslustige Fro, de för jeden Spaaß to hebben is un sik butendem as Kennersche vun de Klingoonschen Kultur rutstellt. Ofschoonst se ok fröh al vun Dr. Bashir ümworven warrt un later ok vun Quark, verkeikt se sik later in Worf un warrt sien Fro.
Op de Statschoon arbeit se as Wetenschopsoffizeer. Se hett aver tosätzlich ok en Pilotenutbilln un sitt dorüm fakener mol an’t de Conn – also an de Konsool, woneem dat Flegen stüert warrt. An’t Enn vun de sössten Staffel blifft Jadzia dood, nadem se vun en Pah-Geist angrepen worrn is. De Symbiont kann aver reddt warrn un kummt wenig later as Ezri Dax wedder op de Statschoon. De Dood vun Jadzia keem op Wunsch vun de Schauspelersche, Terry Farrell, de mehr Gaasch hebben wull aver nich dörsetten künn un sik denn lever op ehr wietere Loopbahn kunzentreeren wull. De Inschalttallen sünd mit ehr Utscheden eerstmol bannig rünner gahn.
Ezri Dax
ännernEzri Dax is de Nafolgersche vun Jadzia. Anners as de meisten Trill harr Ezri gor nich de Afsicht vereenigt to warrn, man as Jadzia Dax doodbleven weer, müss de Symbiont gau torüch na Trill bröcht warrn. De Reis harr de Dax-Symbiont aver nich överleevt un Ezri weer de eenzige Trill an Boord. Se söcht Kuntakt to Sisko, vun wegen dat se anners nich weet, woneem se hengahn schall. Sisko stellt ehr as Counselor op DS9 in, aver se maakt sik ok gau en Naam as Wetenschopsoffizeer in de Nafolg vun Jadzia.
Ofschoonst Jadzia Dax mit Worf verheiraat weer un se dat Weten vun Jadzia mitnahmen hett, föhrt Ezri Dax un Worf disse Eh nich wieter. To’n een is dat in de Trill-Sellschopp slecht ansehn, wenn een mit’n glieken Symbionten wedder wat anfangt, un to’n annern is Ezri för Worf nu mol nich mehr de glieke. Ezri fangt aver denn wat mit Julien Bashir an, de al wat mit ehr anfangen wull, as se noch Jadzia Dax weer.
Julien Bashir
ännernDr. Julien Bashir is de leiden medizinsche Offizeer op de Statschoon un op de Defiant. He kummt direkt vun de Akademie na DS9 un schüümt to Anfang meist över vör Neeschier op’t Aventüer un intressante Begeevnissen. Mit de Tiet warrt he ’n beten ruhiger, behollt in’t Allgemenen aver sien Anlaag, veel to snacken un to vertellen. As Jungspund, de dorto ok noch goot utsütt, versöcht he jümmer wedder mol mit Fronslüüd antobanneln.
In een Folg vun de Mitt vun de Reeg kummt rut, dat he as Kind in sien physische un geistige Entwickeln torüchbleven weer. Sien Öllern hett em denn op en Planeten bröcht, woneem man em geneetsch Opweerten de. Dat hett he geheem Hollen hatt, vun wegen dat sowat in de Steernflott an sik nich ansehn is. Bashir frünnt sik as eerst mit den Cardassianer Garak an und warrt in’n Verloop vun de Reeg de beste Fründ vun Miles O’Brien.
Miles O’Brien
ännern
Miles Edward O’Brien is en Figur, de ok al bi Star Trek: The Next Generation as Transporter Chief faken to sehn weer. O’Brien kummt glieks to Anfang al na DS9, neemlich ut twee Grünnen: to’n een is de Statschoon mit Aftehn vun de Cardassianer teemlich rünnerkamen, so dat en go’en leiden Ingenieur bruukt warrt. To’n annern hett he in sien fröhe Loopbahn al in’n Krieg mit de Cardassianer to doon hatt un kennt jem dorüm ’n beten.
O’Brien leeft mit sien Fro Keiko un sien Dochter Molly op de Ruumstatschoon un is fakener ok mol Hööftperson in enkelte Folgen. He is ok dat eenzige Liddmaat vun’n Föhrensmannschop, de nich Offizeer is. Meist warrt he vun all as Chief O’Brien betekent. Mit de Tiet warrt O’Brian de beste Fründ vun Dr. Bashir, ofschoonst he em to Anfang vun de Reeg nich utstahn kann.
Quark
ännernMit Quark kummt to’n eersten mol en Ferengi as fast Rull in en Star-Trek-Reeg. Quark is as Barkeeper op DS9, woneem he as tyypschen Ferengi hofft, veel Profit to maken. Ok sonst föhrt se sik tomeist as tyypschen Ferengi op: hollt sien Anstellten an de korten Lien bi wenig Geld un jammert jümmer wedder över sien Situatschoon, wenn dat Gewarf mol nich so lopen deit.
Jümmers wedder kriggt he sik mit Constable Odo, den Sekerheitsbaas in de Plünnen, vun wegen dat he blangen sien Bar ok noch Smuggelee bedrifft un dorbi ok faken mol mit verboden Saken un düstere Gestalten Hannel drifft. Liekers bewiest he in enkelte Folgen jümmers wedder ok en unvermoden Matt an Anstand un Moral, dat för Ferengi nu an sik gor nich mehr so tyypsch is. Un dat he sien Hart an’n rechten Plack hett, warrt ok düütlich, as af un an ok mol annere Lüüd helpen deit, wenn keeneen dormit rekent harr. Un ganz ahn Odo mag he denn ok nich wesen, wat düütlich warrt, as he em sogor mol dat Leven redden deit.
Jake Sisko
ännernJake is de eenzige Söhn vun Benjamin Sisko. He kummt mit sien Vadder op de Statschoon, woneem he sik gau mit den Ferengi-Bengel Nog anfrünnt. Liekers, dat sien Vadder dör sien Arbeit as Kommandant vun DS9 meist blots wenig Tiet för em hett, hollt Jake doch fast to em. Wohrhaftig sorgt he ok dorför, dat sien Vadder Kasidy Yates kennenlehrt, de he later heiraat.
As Sien Vadder em en Arbeit op de Ruumstatschoon bi Miles O’Brien anstellen deit, markt Jake gau, dat de Arbeit bi de Steernflott nich för em is. Sien Vörleev is veelmehr dat Schrieven vun Geschichten un so entwickelt he den Plaan Schriever to warrn. Eerste Insichten in de Schrieveree winnt he as Kriegsberichter in’n Dominionkrieg.
Worf
ännernWorf is de eerste Klingoon in de Steernflott, un hett ünner Cpt. Picard as Sekerheitsbaas op de Enterprise al deent. Na DS9 warrt Worf eerst in de tweeten Hälft vun de Reeg versett, woneem he as strategischen Offizeer insett warrt, nadem de Enterprise-D vernicht worrn is. As Klingoon frünnt he sik gau mit Jadzia Dax an, de sik goot mit de klingoonschen Traditschonen utkennt un em imponeeren deit. Wohrhaftig warrt ut jem en Poor un se heiraat ok sogors.
Wiel Worf fröher den klingoonschen Kanzler Gowron ünnerstütt un em sogor in sien Amt holpen hett, kriggt he wiel den Krieg gegen dat Domion Twievel an sien Vermögen dat Klingonenriek wieterhen to föhren. As Worf eenmol mehr nich dormit inverstahn is, woans Gorwron sien besten Mann, General Martok, insetten deit, stellt he sik apen gegen em un foddert em dormit to’n Tweekamp rut. Dorbi maakt he Gworon doot un beröpt Martok to’n ne’en Kanzler vun de Klingonen.
Kritik vun de Presse
ännernDat US-amerikaansche Feernsehblatt TV Guide hett DS9 as de „an’n besten speelte, schrevene, produzeerte un överhaupt de beste“ Form vun Star Trek betekent.[2] Die Presse segg, DS9 weer de dramaturgsch beste Reeg vun de Star-Trek-Feernsehregen: „Keen Reeg weer so in de Enkeltheiten dördacht, keen vun de Charakteren över de Johren so dull utklamüstert oder de Spannungsbagens so kloor tekent“. Wieter hören de Dialogen twüschen den Sekerheitsbaas Odo un den Barkeeper Quark to dat Lustigste, wat bi Star Trek jemols schreven worrn is. [3]
Video.de meent, dat in disse Reeg in’n Gegensatz to annere Star-Trek-Regen nich so veel op enkelte Aventüers sett worrn is, man op’n groot anleggte Rahmengeschicht.[4] Filmreporter kritiseer dorgegen, dat de Gööd vun de Episoden wesselhaft weer un sünners de mehr un mehr kriegerischen lateren Staffeln an Charme verloren harrn.[5] Cineman finnt, dat de drüdde Staffel mehr Action opwiest un’n veel grötter’t Tempo harr as de beiden dorför. Dat ne’e Ruumschipp Defiant harr för mehr Afwesseln sorgt.[6] In de sövten Staffel geev dat noch mehr Action, wat tomeist in grote Weltruumslachten ennen de. Man de enkelten Episoden in de Slussstaffel wiesen meist to veel Geschichtsfadens op un de Afgang vun de Hööftfiguren anvt Enn is teemlich hektisch utfallen.[7]
Tospraak vun de Tokiekers
ännernDS9 is bi de Fans vun Star Trek sünners to Anfang vun de Reeg op Freid aver ok op Aflehnen stött. Sünners de düstere Atmosphäär, dat Anhüpen vun Kunflikten binnen de Mannschop un de wassen militäärsche Ünnertoon hebbt Deep Space Nine foorts kloor vun dat op’n eersten Blick weniger kumplizeerte Ruumschipp Enterprise ut de tweeten Feernseh-Reeg afsett.
Man, na ehr Enn hett DS9 mit sien Dreihböker, Trickeffekten un de ümfaten Entwickeln vun de Figuren un de Geschicht groten Indruck maakt. As eerste Star-Trek-Reeg hett Deep Space Nine en „roden Faden“ entwickelt, de de enkelten Folgen to en eenheitliche Geschicht verknütt hett mit vele Nevenfiguren, de jümmer wedder vörkamen sünd. In’n Rüchblick warrt dat as en vun de groten Stärken vun de Feernsehreeg opfaat, möök aver togliek den Instieg swoor för de Tokiekers, de eerst later dortokamen sünd.
Vun vele Fans warrt de Reeg ok in’n go’en Ünnertoon as Sepenoper in’t Weltall betekent, wat ok dormit to doen hett, dat to’n eersten mol ok Hööftfiguren anduern wat mitenanner hatt hebbt. Ok de Verwickeln vun de Kruliddmaten ünnereenanner wiest Elementen dorvun op. In de Regen dorför weer blots mol’n kortfritig Anbanneln verlööft, üm de Hööftfiguren nich to dull fasttoleggen.
Utteken
ännernDeep Space Nine is alltohopen 31 mol för den Emmy nomineert wesen un hett em veer mol wunnen.[8] Aver ok annere Filmpriesen künn de Reeg för sik innehmen. Wunnen hett de Reeg:
- 1993: den Emmy in de Kategorie Rutragen Leistung bi’t Make-up in en Reeg
- 1993: den Emmy in de Kategorie Rutragen Leistung bi de Titelmusik
- 1993: den Emmy in de Kategorie Rutragen Leistungen bi Trickeffekten
- 1995: den Universe Reader's Choice Award in de Kategorie Best Nevendorstellersche in en Genre-Reeg för Nana Visitor
- 1995: den Emmy in de Kategorie Rutragen Leistung bi’t Make-up in en Reeg
- 1996: den ASCAP Award in de Kategorie Best Feernsehreeg för Jay Chattaway
- 1996: den ASCAP Award in de Kategorie Best Feernsehreeg för Dennis McCarthy
- 1997: den ASCAP Award in de Kategorie Best Feernsehreeg för Jay Chattaway
- 1997: den ASCAP Award in de Kategorie Best Feernsehreeg för Dennis McCarthy
- 1997: den Excellence in Production Design Award in de Kategorie Feernsehn
- 1998: den ASCAP Award in de Kategorie Best Feernsehreeg för Jay Chattaway un Dennis McCarthy
- 1998: den Monitor in de Kategorie Feernsehreeg – elektroonsch Trickeffekten
- 2005: den Sünnerpries vun de Academy of Science Fiction, Fantasy & Horror Films, USA
Episodenöversicht
ännern
|
|
|
|
|
|
|
|
|
|
|
|
|
|
Literatur
ännern- Armin Breitenbach: Deep Space Nine. Achter de Kulissen vun en Ruumstatschoon. Heel, Königswinter 1995. ISBN 3-89365-450-X
- Judith und Garfield Reeves-Stevens: Star Trek Deep Space Nine. Die Realisierung einer Idee. Heyne, München 1996. ISBN 3-453-10982-1
- Kolja Steinrötter: Science and a sense of hope. Zum Verhältnis von Wissenschaft und Religion in der Fernsehserie Star Trek: Deep Space Nine. Telos, Münster 2004. ISBN 3-933060-13-3
Weblenken
ännern
Star Trek:Deep Space Nine. Mehr Biller, Videos oder Audiodateien to’t Thema gifft dat bi Wikimedia Commons.
Borns
ännern- ↑ Star Trek: DS9 in de IMDb, afropen an’n 6. Mai 2009
- ↑ Diesel eBooks: Star Trek: Deep Space Nine: Unity by Perry, S. D., afropen an’n 20. Mai 2009
- ↑ Die Presse.com: Fernsehen: Letzte Tankstelle in dieser Galaxis, afropen an’n 21. Mai 2009
- ↑ Video.de: Star Trek - Deep Space Nine: Season 1, Part 1 (3 DVDs), afropen an’n 20. Mai 2009
- ↑ filmreporter.de: Star Trek - Deep Space Nine, afropen an’n 21. Mai 2009
- ↑ Cineman: Star Trek: Deep Space Nine Staffel 3, afropen an’n 20. Mai 2009
- ↑ Cineman: Star Trek: Deep Space Nine Staffel 7, afropen an’n 20. Mai 2009
- ↑ Academy of Television Arts & Sciences: Advanced Primetime Awards Search, afropen an’n 21. Nov. 2006