The Magnificent Seven

The Magnificent Seven (op Platt so veel as „De wunnerboren Söven“; dt. Titel: Die glorreichen Sieben) is en Remake vun den Film Shichinin no samurai (dt.: Die Sieben Samurai). De US-amerikaansch Western is ut dat Johr 1960 un tellt to de Klassiker ünner de Westernfilmen

Filmdaten
Plattdüütsch Titel:	—
Originaltitel:	The Magnificent Seven
Düütsch Titel:	Die glorreichen Sieben
Produkschoonsland:	USA
Johr vun’t Rutkamen:	1960
Läng:	128 Minuten
Originalspraak:	Engelsch
Öllersfreegaav in Düütschland:	FSK 12
Filmkru
Speelbaas:	John Sturges
Dreihbook:	William Roberts
Produkschoon:	John Sturges Walter Mirisch
Musik:	Elmer Bernstein
Kamera:	Charles Lang
Snitt:	Ferris Webster
Szenenbild:	Edward Fitzgerald
Dorstellers
Yul Brynner: Chris Adams Eli Wallach: Calvera Steve McQueen: Vin Horst Buchholz: Chico Charles Bronson: Bernardo O’Reilly Robert Vaughn: Lee Brad Dexter: Harry Luck James Coburn: Britt Vladimir Sokoloff: De oole Mann Rosenda Monteros: Petra

Inholt

Vun’t Thema her is de Western dat lieke as de 1954 dreihte Film „Shichinin no samurai“ vun Akira Kurosawa, blots in en anneren Achtergrund.

Dat geiht üm en mexikaansch Dörp, dat vun Banditen plünnert warrt. De Dörpslüüd söökt sik söven Revolverhelden, de dat Dörp schulen un de Banditen verjagen schüllt. Jeder vun de Söven hett sien egen Grünnen, an disse Aktschoon deeltonehmen, anfungen bi dat beten Geld, över den Wunsch to helpen bit hen na den Dwang, sik sülvst wat bewiesen to möten. Nadem opletzt veer vun de Revolverhelden dood bleven sünd, faat de Anföhrer vun de Söven, Chris Adams, tosamen: „Wi verlert! – Wi verlert jümmers!“

In den Film speelt bannig veele beropen Schauspelers mit: Neven Yul Brynner speelt Charles Bronson, Steve McQueen un eenige annere mit. So ok de düütsche Schauspeler Horst Buchholz, för den disse Film de gröttste Spood in Amerika warrn schull.

Utteken

De Filmmusik vun Elmer Bernstein weer 1961 för den Oscar nomineert. De Titelmusik is later wedderverwennt worrn in de Zigarettenwarf för Marlboro.

Wietergahn un lieke Filmen

Vun den Film The Magnificent Seven geev dat dree wietere „offizielle“ Filmen, man keen vun jem künn an den Spood vun den eersten Deel rankommen.

• 1966: Return of the Seven (dt.: Die Rückkehr der glorreichen Sieben)
• 1969: Guns of the Magnificent Seven (dt.: Die Rache der glorreichen Sieben)
• 1972: The Magnificent Seven Ride! ( dt.: Der Todesritt der glorreichen Sieben)
• dorto keem en Fernsehserie, de vun 1998 bit 2000 produzeert worrn is.

Butendem geev dat noch annere Filmprodukschonen, de ok dat oorsprünglich Thema ut „Shichinin no samurai“ opgriepen deen:

• 1966: Winnetou und sein Freund Old Firehand, en vun de Karl May-Filmen.
• 1980: Battle Beyond the Stars (dt.: Sador – Herrscher im Weltraum), en Science-Fiction-Film, in dem Robert Vaughn ok wedder in en lieke Rull deelnahmen hett.
• 1998: A Bug’s Life (dt.: Das große Krabbeln) vun de Pixar Animation Studios.

Achtergrund un Trivia

• In’n Science-Fiction-Film Westworld vun 1973 speelt Yul Brynner en swatt kleedten Revolverhelden-Android jüst in de Oort as sien Dorstellen in The Magnificent Seven.
• In de Parodie ¡Three Amigos! (dt.: Drei Amigos) vun 1986 warrt dree Schauspelers för echte Revolverhelden Hollen un schüllt en Dörp in gefahr to Help kommen.
• Dat gifft en Kinnerbookreeg vun Alfred Weidenmann, de ok de Beteken „Die glorreichen Sieben“ nütt.
• De Stoff is vun dat Theaterlabel Herz&Mund in Mönster för dat hater oparbeit un an’n 1. Oktober 2004 ooropföhrt worrn.
• In den Film Otto – Der neue Film vun un mit Otto Waalkes warrt in een Szene „Die glorreichen Sieben“ as Kennwoort för den Togang to’t Backstage-Rebeet bruukt.
• In dat Wark The Dark Tower (dt.: Der Dunkle Turm) vun Stephen King warrt in’n Deel Susannah Betog herstellt twüschen de Hööftgrupp vun dat Book un de Söven Revolverhelden. De Hööftoort, woneem de Geschicht speelt – Calla Bryn Sturgis – is en Hommage an den Hööftdorsteller un den Speelbaas.
• The Clash hebbt 1980 en Leed mit den lieken Naam opnahmen.

Kritiken

• "Gelungene Western-Umsetzung des japanischen Klassikers „Die sieben Samurai“ mit Action, Spannung, Psychologie und einer großen Starbesetzung; der Film wurde immer wieder kopiert – aber nie mehr erreicht." (Werten: 3½ Steerns = utermaten) - Adolf Heinzlmeier un Berndt Schulz in’t Lexikon „Filme im Fernsehen“ (Utwiete Neeutgaav). Rasch und Röhring, Hamborg 1990, ISBN 3-89136-392-3, S. 309-310

• "Schauspielerische Leistungen, phantastische Landschaftsaufnahmen und die aufregenden Kampfszenen machen den Film zu einem Wildwest-Meisterwerk." - Stern, Hamborg

Websteed

• The Magnificent Seven in de Internet Movie Database (engelsch)