Tour Down Under

De Tour Down Under is en Deelstreckenrennen för Radrennfohrer in den austraalschen Bundsstaat South Australia rund um de Hööftstadt Adelaide. Dat is dat gröttste un wichtigst Radrennen vun Australien un Ozeanien. Dat Rennen wurr 1999 to'n eersten Mal utdragen un find jedes Johr Midden Januar statt. Mit Anfang vun de Saison 2008 is de Tour Down Under en Rennen vun de UCI ProTour un siet 2011 vun de Nahfolgereeg UCI World Tour.

Dat Feld vun de Tour Down Under 2007 vör de St Peter's Cathedral in Adelaide

Down Under Classic

Twee Daag vör de Tour Down Under find en ruch weg 50 Kilometer lang Kriterium in Adelaide statt, dat so nömmt "Cancer Council Classic", dat af 2012 "Down Under Classic" heeten dee un siet 2014 People's Choice Classic un in de sien Vörfeld de Deelnehmer vun dat Rennen vörstellt wurrn. De Ergevnisse vun dit Classic tellen aber weder to de Gesamtwertung noch gifft dat Punkte för de UCI World Tour.

Streckenführung

Dat Rennen sülvst geiht immer los an' darten Diensdag in' Januar un umfaat söss Daagafsnitte, vun de in de Regel kien een länger as 170 Kilometer is. Dat fang an mit veer meest flach Afsnittet. Wiel dat in Südaustralien kien so hooch Bargen, as bispeelswies in de Alpen gifft, is de stuurste Ansteeg de Willunga Hill (3 Kilometer lang; 7,6 % steil), de tomeest up de vörletzt Deelstreck tweemal befohren wurrn moot un dat Rennen entscheeden deiht. An' letzten Tag, en Sönndag, geiht de Tour Down Under traditschonell mit en ruch weg 80 Kilometer langen Rundkurs in de Hööftstadt Adelaide to Enn'. Up en bi anner grötter Rundfohrten dörut begäng Tietfohr-Deelstreck is all immer verzicht wurrn.

Deelnehmer

Völ europääsch Profi-Mannschapen bruuken de Tour Down Under as Vörbereiten för de in' März mit Paris-Nizza un Tirreno-Adriatico anfangen Saison, wiel in Europa noch Winter is, wiels de Fohrer vun de austraalsch Teams in' Hoochsömmer up de Südhalfkugel midden in de Saison stahn. In de letzt Johren hett de Attraktivität vun de Rundfahrt immer wieder tonommen, so hett bispeelswies Lance Armstrong, sien Comeback 2009 in Australien fiert. An glieker Stäe hett he twee Johr later ok sien letzt internatschonal Rennen vun sien Loopbahn bestreeden. 2010 hemm neben de Topsprintern um André Greipel ok de amteeren Weltmeester Cadel Evans un de tüschendör sparrt Alejandro Valverde deel. Sietdem dat Rennen to de UCI ProTour (siet 2011: UCI World Tour) hörrt, sünd automatisch de UCI ProTeams, also de gröttsten professionellen Mannschapen, to'n Start verplicht. Buterdem vergiift de Veranstalter in jede Johr en Startplatz an en austraalsch Natschonalteam, dat vun de südaustraalsch Universität ünnerstütt wurrd. Jedes deelnehmen Team besteiht ut söben Fohrer.

Organisatschoon

De Tour Down Under wurr vun de South Australian Tourism Commission (de Tourismuskommission) in't Leven ropen, um den Bundsstaat in dat Utland dortostellen un is todem dat eenzig bedüüden Profiradrennen vun Australien. De Tour Down Under steiht jedes Johr in' Middelpunkt vun dat "Festival of Cycling", en Veranstaltensreeg, bi de sück in South Australia all um dat Fohrrad dreiht.

Renndirektor is siet Grünnen vun dat Rennen de ehmalge Berofsradfohrer Michael Turtur, up de sien Idee dat Rennen footen deiht. Immer noch is de südaustraalsch Tourismuskommission Inhebber vun de Rundfohrt. Finanziell ünnerstütt wurrd de Tour Down Under aber ok vun de südaustraalsch Regeeren.

Historie

De eerste Tour Down Under wurr 1999 utdragen. Gau entwickel sück dat Rennen to'n gröttsten Radsportwettbewarf vun Australien un Ozeanien. Hüüt gellt de Tour Down Under sogor as dat gröttste Radrennen vun de südlichen Hemisphäre.

Mit dat Teel, de Provinz Südaustralien nich toletzt för Touristen döör de Feernsehöverdragen in anner Länner bekannt to maken, fung de eerste Tour Down Under in dat Johr 1999 mit en ungefähr 40 Kilometer langen Rundkurs in Adelaide an. Nicolai Bo Larsen ut Däänmark weer in' Massensprint an' 19. Januar de eerste Deelstreckensieger, de Australier Stuart O'Grady wurr de eerste Gesamtsieger. Siet dat Enstahnsjohr wurrd dat Rennen in söss Deelstrecken utdragen, eerst siet 2000 start de Tour allerdings an en Diensdag, de eerste Utdragen weern noch an en Sönndag anfungen wurr.

2001 un 2002 bill in Glenelg en ähnlich lang Rundstreckenrennen as in de eerst Johren in de Provinzhööftstadt den Auftakt vun de Tour, bit de Tour van 2003 bit 2005 weer mit en ungefähr 50 Kilometer langen Rundkurs in Adelaide anfung. Nahdem de Slussdeelstreck in Adelaide 1999 noch 120 Kilometer lang ween weer, wurr se een Johr doup up 90 Kilometer verkörrt. Nahdem de Afsnitt eenig Johren lang sogor blots 80 Kilometer umfaaten dee, stockte man de Distanz 2006 weer um teihn Kilometer up. Neben Adelaide sünd de Oörd Norwood, Strathalbyn, Victor Harbor oder Tanunda faken Deelstreckenöörd. De "Königsdeelstreck" över den den Willunga Hill in den Oort Willunga find siet 2003 an' vörletzten Dag statt.

Siet 2006 drocht de Gesamtführende en orange-farven Trikot, tovör weer dat Leadertrikot Geel. Buterdem wurrd siet dat Johr dorvan afsehn, dat Ergevnis vun de Uptaktdeelstreck in Adelaide to de Gesamtwertung to tellen. Stattdessen wurrd de siether as "Cancer Council Classic" twee Daag vör den eegentlichen Anfanf vun de Runfohrt gesünnert utdragen.

Van 1999 bit 2004 hörr de Tour Down Under to de UCI-Kategorie 2.3. Af 2005 tell dat Rennen to de UCI Oceania Tour un weer in de hööchste Kategorie 2.HC instuuft. Siet 2008 is dat Rennen in de UCI ProTour - hüüd UCI World Tour – instuuft un dormit een vun de gröttste internatschonalen Rennen.

Sieger

De Tour Down Under wurrd wegen de nich bannig stuur Topographie faken vun Sprintern wunnen, de sück dör de Tietbonifikatschonen in't Teel en Vörsprung erarbeiten kunnen, aber ok Fohrer, de en Utrietversöök spoodriek afsluuten kunnen, hemm dat Rennen all wunnen, to'n Bispeel de Sieger van 2011, Cameron Meyer. Rekordsieger mit veer Titeln is Simon Gerrans ut Australien. 2001, 2002 un 2006 kunn de gastgeven Natschoon all dree Podestplatzen besetten. De Australier sünd mit all tosommen teihn Gesamterfolgen ok de spoodriekste Natschoon.

Siegerlist

2023 Jay Vine 2022 Nich utdragen 2021 Nich utdragen 2020 Richie Porte 2019 Dary Impey 2018 Daryl Impey 2017 Richie Porte 2016 Simon Gerrans 2015 Rohan Dennis

2014 Simon Gerrans 2013 Tom Slagter 2012 Simon Gerrans 2011 Cameron Meyer 2010 André Greipel 2009 Allan Davis 2008 André Greipel 2007 Martin Elmiger

2006 Simon Gerrans 2005 Luis León Sánchez 2004 Patrick Jonker 2003 Mikel Astarloza 2002 Michael Rogers 2001 Stuart O'Grady 2000 Gilles Maignan 1999 Stuart O'Grady

Klassements

As bi meest all anner internatschonalen Radrennen gifft dat ok bi de Tour Down Under verscheeden Sonnerwertungen, deren Führende spezielle Wertungstrikots dragen, de sück vun de anner Teamtrikots farvlich ünnerscheeden. De Wertungstrikots wurrn den Führenden nah jeder Deelstreck up en Podium verleeht, ok de Deelstreckensieger wurr ehrt. Jedes Wertungstrikot wurrd dorbi vun en Sponsor präsenteert. De Fohrer hemm de Plicht, de entspreken Wertungstrikots up de jewiels folgen Deelstreck to dragen. Wenn en Fohrer in' Besitt vun mehreren Wertungstrikots is, drocht he dat wichtigere. Dorbi gellt folgen Reegfolg: Orange-farven, Witt, Blau, Swaart Trikot. In dissen Fall wurrd dat nächstleeger Trikot vun den Tweetplatzeerten in de jewielig Sonnerwertung präsenteert. As Dräger gellt dennoch de Führende, ok wenn he dat – mit Utnahm bi de Siegerehrung – tatsächlich gor nich anhett.

Deelstreckensieger vun de Vergangenheit

Mit twalf Deelstrecken is Robbie McEwen de spoodriekste Fohrer in disse Hensicht. En Öösterrieker hett noch nie en Deelstreck wunnen. Ok en Swiezer Deelstreckenwinner geev dat bitlang noch nich, aber Martin Elmiger kunn 2007 de Gesamtwertung up sien Naam schrieven. Neben Rekordsieger André Greipel geev dat noch dree wiedere düütsche Deelstreckensieger - Erik Zabel, de in de eerst beid Johren insgesamt dree Deelstrecken wunn, Kai Hundertmarck un Steffen Wesemann.

Orange-farvenTrikot (Gesamtwertung)

De Fohrer mit de minnste Gesamttiet drocht dat Orange-farven Trikot, offiziell Santos Tour Down Under Ochre Leader’s Jersey. För de wichtigste Wertung wurrd de Gesamttiet vun en jeden Fohrer vun all Deelstrecken tosommentellt. Eventuelle Tietgootschriften wurrn vun de Gesamttiet vun den bedrapen Fohrer aftrucken: de Sieger vun en Deelstreck kriggt teihn Sekunn Bonifikatschoon, de Deelstreckentweete söss Sekunn un de -darte veer Sekunn. Ok bi de up jeden Afsnitt utfohren Tüschensprints gifft dat Tietgootschriften: dree Sekunn för den Eersten, twee för den Tweeten un noch een Sekunn för den Darten. Well nah de letzt Deelstreck de minnste Gesamttiet upwiest, is de Sieger vun de Rundfohrt. Wiel de Tietafstände bi de Tour Down Under meest bannig minn sünd, spelen de Tietgootschriften en wichtig Rull för de Gesamtplatzeeren vun en Fohrer. Liggen twee oder mehr Fohrer in de Gesamtwertung in de glieker Tiet, so entscheeden de beter Deelstreckenplatzeeren över de nipp un nau Platzeeren.

De eenzigen Fohrer in de Historie vun dat Rennen, de dat schafft hemm, dat Orange-farven Trikot vun der eersten bit to de letzt Deelstreck to verteidigen, sünd André Greipel (2010) un Simon Gerrans (2006).

Witt Trikot (Bargwertung)

Ebenfalls siet de eerst Utdragen vun de Tour Down Under wurrd en Bargwertung utfohren. Dat dorto hörrn Führungstrikot is witt. In' Gegensatz to völ anner Radrennen sünd de Anstiegen vun de Runfohrt, an de dat Barkpunkte gifft, nich in verscheeden Kategorien indeelt, stattdessen wurrd up jeden Tipp de sülvige Punkttall för de eersten Fohrer vergeven, de buterdem vun Johr to Johr immer weer afännert wurrd.

Mit dree Erfolgen in de Bargwertung is de Australier Cadel Evans Rekordsieger vun disse Sünnerwertung.

Blau Trikot (Punktewertung)

Siet de eerste Utdragen vun dat Rennen gifft dat ok en Punktewertung, de offiziell Sprintwertung heet un deren Führender en Blau Trikot kriggt. Punkte för de Punktwertung gifft dat aber nich blots an de Tüschensprints, sonnern ok in dat Teel vun jeder Deelstreck för de eersten Fohrer.

Mit dre Erfolgen is Robbie McEwen Rekordsieger vun de Punktewertung.

Swaart Trikot (Gesamtwertung vun de ünner 25-Johrigen)

Siet 1999 wurrd bi de Tour Down Under en Swaart Trikot för den Führenden vun de Nahwusswertung vergeven. Disse Wertung ermittelt de besten Fohrer, de in dat Johr vun de Rundfohrt hööchstens 25 Jahre olt sind. Bit 2007 wurr dat Trikot allerdings blots för Fohrer bit to en Öller vun 23 Johren vergeven.

De Spanier José Joaquin Rojas Gil hett de Nahwusstweemal wunnen un is dormit Rekordwinner. 2005 (Luis León Sánchez) un 2011 (Cameron Meyer) kunn en Fohrer sowohl de Nahwusswertung as ok dat Orange-farven Trikot erringen.

Root Trikot (Utteknung för de kämperischsten Fohrerr)

Nah jeder Deelstreck vun de Tour Down Under söcht en Jury den kämperischsten Fohrer vun den Dag ut. De dat denn winnen deiht, kriggt bi de Siegerehrung vun den Dag en Root Trtikot, dat he aber up de Deelstreck vun den nächsten Dag nich dragen dröfft, wiel luut dat Reglement vun den Radsportweltverbandes UCI wiels de Deelstrecken vun internatschonal Rennen blots veer Wertungstrikots präsenteert wurrn dröfft. De kämperischste Fohrer vun den Vördag wurrd allerdings dör en root Rüggnummer kenntekent. De Jury ermitddelt nah dat Enn' vun de Rundfohrt ok en Gesamtsieger in disse Sünnerwertung.

Hellblau Trikot (Mannschapswertung)

För de siet 1999 vergeven Mannschapswertung wurrn bi jede Deelstreck de Tieden vun de flinksten veer Fohrer vun en Mannschap tosommentellt. Ähnlich as bi den Pries för den kämperischsten Fohrer wurrd de führen Mannschap blots bi de Siegerehrungen in de hellblau Führungstrikots präsenteert.

Fröhere Sünnerwertungen

Van 2006 bit 2010 kreeg de Sieger vun den "Cancer Council Classic" ebenfalls en Blau Trikot, dat he up de folgen eerst Deelstreck präsenteer.

In dat Johr 2003 wurr statt den Pries för den kämperischsten Fohrer en Gesamtwertung nah Tiet för Fohrer ut Südaustralien utschreeven.

Reglement

De Tour Down Under wurrd nah dat Reglement vun den Weltradsportverband UCI, insbesünnere nah de Regeln för Deelstreckenrennen, utdragen.

Tietnahm un Tietlimit

In dat Teel wurrn de Afstände tüschen de enkelt Fohrer bzw. Fohrergruppen meeten. All Fohrer vun en slooten Grupp wurrn mit der glieker Tiet wert. Bi en Stört up de letzt dree Kilometer wurrn de dorin verwickelt Fohrer mit de gliker Tiet wert as de Grupp, de se to'n Tietpunkt vun den Stört anhörrn deen. Bi all Deelstrecken gellt en Tietlimit ("Karenztiet"), binnerhalv dessen jeder Fohrer dat Teel recken moot. Dat Tietlimit wurrd nah Schwierigkeitsgrad un Dörsnittsgeschwindigkeit vun de jewielig Deelstreck berekent. Dat Limit swankt dementsprekend tüschen 104 un 110 Perzent vun de Tiet vun den Deelstreckensieger. Allerdings hett de Rennleiden de Mögelkeit, dat Tietlimit flexibel to verlängern, wenn sonst mehr as twintig Perzent vun de Fohrer nah Kontrollsluss indrapen deen. Wegen de överwegend flach Deelstrecken vun de Rundfohrt stellt dat Tietlimit allerdings meest kien Problem för de Fohrer dor.

Tietgootschriften

De Sieger vun en Deelstreck kriggt teihn Sekunn Tietbonifikatschoon, de Deelstreckentweete söss Sekunn un de -darte veer Sekunn. Ok bi de up jeden Afsnitt utfohren Tüschenspringts gifft dat Tietgootschriften: dree Sekunn för den Eersten, twee för den Tweeten un noch een Sekunn för den Darten. De Gootschriften wurrn vun de Gesamttiet vun den jewieligen Fohrer aftrucken.

Verpleegen

Up jeder Deelstreck gifft dat ungefähr to de Hälft vun de Distanz en kenntekent Verpleegenszoon, in de Mitarbeiter vun de Teams hör Fohrer Verpleegensbüdels recken dröfft. Dat Entgegennehmen vun Verpleegen, de Tokiekers den Profis anbeeden, is as bi all annern Radrennen up eegen Gefohr. Bit twintig Kilometer vör Enn' vun de Deelstreck dröfft todem de sportlichen Leider ehr Fohrer Drunk und Nehren ut dat Teamfohrtüüg recken. Jeder Mannschap vun de Tour staht dorbi twee Fohrtüüg up jeden Dagsafsnitt to Verfügung.

Sekerheit

Övereenstimmend mit dat UCI-Reglement gellt ok bi de Tour Down Under siet 2004 de Helmplicht.

Technische Hülp un Hülp vun Dokter

En Pannenhülp för de Fohrer mit Defekt wurrd entweder dör dat Team oder den neutralen Materialwagen dörführt. Pannenhülp is immer blots achter en Fohrergrupp un achter dat Hööftfeld an' rechten Straatenrand tolaaten. Bruukt en Fohrer en Dokter, dröfft dat blots en Dokter vun den offiziellen ärztlichen Deenst ween. De Fohrer wurrd dann an dat Enn' vun dat Peloton behannelt. Wenn de Fohrer up de letzt 3 Kilometer to Fall kommt oder Pannen hemm, wurrn de Fohrer mit de glieker Tiet as de Grupp, de se anhörrn deen, wert.

Verstööten

De Regeln wurrn vun de Rennkommissare överwaakt, de up Motorrööd dat Rennen begleiten. Sehcht se Rennverstööten, könnt se de nah de Regeln vun den Weltradsportverband UCI ahnden. Verstööten gegen dat Reglement wurrn mit Geldstraafen, Tietstraafen oder de Disqualifikatschoon bestraaft. Regelwidrigkeiten bi Sprints (verlaaten vun de Fohrlien, anschuven vun en Mannschapskameraden usw.) wurrn mit Rückstuufen in dat Dagsklassement (ahn Tietstraaf) bestraaft.

Da Reglement ünnerseggt ok, Autos oder Motorrööd as Windschadden to bruuken. En Utnahm dorvan is, wenn de Fohrer wiels de Fohrt vun den offiziellen Tourdokter medizinisch behannelt wurrd oder sien Rad von en Mechaniker repareeren lett. Wenn en Fahrer en Panne harr, bruukt he faken de Autos vun de sportlichen Leider, um in deren Windschadden weer Ansluss an dat Peloton to kriegen. Verboden is dat ok aber disse Verstööten wurrn as bi meest all anner internatschonalen Wettbewarfen meest nie nich bestraaft.

Wenn Fohrer upgeeven dooht

Fohrer, de dat Rennen wiels en Deelstreck upgeven, mooten hör an' Rahmen as ok an dat Trikot fastmaakt Startnummer an' Bessenwagen afgeeven.

Fans

Jedes Johr verfolgen völ Tokiekers de Tour Down Under an' Straatenrand, wobi de Tokiekertall över de Johren immer höhger wurr. 2010 hemm sück dat 760.660 Tokieker ankeeken, dorvan 36.100 Minschen ut anner Länner un anner Deelen vun Australien..

Buterdem verfolgen de Fans vun de Rundfahrt jedes Johr en besünnern Bruuk, indem se vör Rennanfang en unbekannten Fohrer, meest en Profi, de Hülpsupgaven in dat Team wohrnimmt, ut de Startlist utwählen, um hüm denn wiels dat Rennen as en grooten Star to fiern un hüm ok nah Rennenn' en Upwachten för dat Hotel to maken.

Sponsoren

Geldinnahmen kriggt de organiseeren Tourismusbehörde nich blots dör Zuschüsse vun de Provinzregeeren, sonnern vör allen dör Sponsoren. Dat Energieünnernehmen Santos is Naamenssponsor vun de Rundfohrt un ok de Titelsponsor vun dat oragnge-farven Trikot un de Rahmenveranstalten Festival of Cycling. Anner Partner sünd bispeelswies de Wahnwagenhersteller Jayco, de jährlich Naamenssponsor vun en Afsnitt un buterdem det blau Sprinttrikot präsenteert. De Autohersteller Škoda wiest sien Naam nich blots up den Bagen, de de Een-Kilometer-Marke vun en jeden Deelstreck dorstellt, sonnern ok up dat witt Bargtrikot. De Firma Europcar sponsert dat Trikot för den kämperischsten Fohrer, de Initiative "Cycle Instead", de de Südaustralier dorto bewegen will, to dat Fortbewegen fakener dat Fohrrad to bruuken, präsenteert dat Jersey för den besten Nahwussfohrer. Nee Sponsoren för dat Johr 2012 weern de Sekerheitsfirma Colemans, ebenso Naamensgever för en Deelstreck as de private Krankenversekerung Bupa. Wiedere Sponsoren könnt dör Bandenwarf oder Warf in dat offizielle Tour-Dörp in Adelaide up sück upmarksom maaken.

Ähnlich as bi de Tour de France fohrt up jeder Deelstreck en Warfkarawane ungefähr en half Stünn vör dat Fohrerfeld de Streck af un verdeelt Geschenke. Dorbi wiest sück ok dat Känguru Oppy, dat offizielle Maskottchen vun de Rundfohrt.

Festival of Cycling

Deelnehmer an de "Be Active Tour" 2007

De Tour Down Under is inbett in dat jährlich stattfinnen Festival of Cycling in Adelaide, bi dat sück een Week lang all um dat Fohrrad un den Radsport dreiht. In' Rahmen vun dit Festival wurrn en Avend mit den Stars vun den Radsport as ok wiedere Angebote as en Mitfloog in' Helikopter wiels de Deelstrecken oder en Wettbewarf, bi de de an' muisten smückt Deelstreckenoort söcht wurr, veranstalt.

Siet 2003 wurrd wiels dat Festival of Cycling ok en Jedermannrennen, de so nömmt Breakaway Series, anboden. Van 2004 bit 2007 harr dat Rennen de Naam "Be Active Tour", van 2007 bit 2011 "Mutual Community Challenge". Dorbi leggen den Deelnehmer een Deelstreck vun de Tour Down Under vun dat Johr torüch un lehrt so de glieker Streck kennen, de ok Profis in hör Rennen fohren. Todem wurrn en Rennen för Kinner anboten, dat up den Rundkurs vun de letzt Deelstreck vun de Tour Down Under in Adelaide veranstalt wurrd. De Deelnehmertall un dormit ok de Beleevtheit vun disse Wettbewarfen is vun Johr to Johr steegen, 2010 weern all 8000 Athleten an' Start.

Kriteriumsserie för Fruen

Ungefähr tietgliek to dat Rennen vun de Mannlüüd wurr bi de Tour Down Under ok en Rennserie ut dree Kriterien för Fruen veranstalt. Nah dat Afschaffen vun disse Veranstaltung wurr bit 2010 blots noch een eenzig Kriteriumsrennen utdragen, bevör 2011 weer twee Rennen in Adelaide, de so nömmt Rendition Homes-Santos Women’s Cup utricht wurr. Dat eerste Kriterium funn an den sülvigen Dag as dat Cancer Council Classic to Anfang vun dat Mannlüüdrennen statt, dat tweete Kriterium een Dag later.

Weblenken

Tour Down Under. Mehr Biller, Videos oder Audiodateien to’t Thema gifft dat bi Wikimedia Commons.

• Offizielle Websteed
• De Tour Down Under up die Sieden vun Radsportseiten.net