Abendörp

Wapen/Flagg

Koort

Basisdaten

Bundsland: Neddersassen

386 (2013-07-3131. Juli 2013)

Postleettall:

21395

Vörwahl:

04176

Geograafsche Laag:

Koordinaten:53° 23′ N, 10° 27′ O53° 23′ N, 10° 27′ O

Abendörp (hoochdüütsch Avendorf) is en Dörp in de Gemeen Tesp (Samtgemeen Elvmasch) in’n Landkreis Horborg, Neddersassen.

Geografie

Abendörp liggt an dat Süüdöver von de Elv. In’n Süüdwesten liggt de Ilau-Sneegraven.

De Naveröörd sünd Gröönhoff-Tesperhuud in’n Noordwesten, Krukow un Juliusborg in’n Noordoosten, Snakenbeek in’n Oosten (disse veer in’n Kreis Hertogdom Loonborg in Sleswig-Holsteen), Addelborg in’n Süüdoosten, Lüdershusen in’n Süden (de letzten twee in’n Landkreis Lümborg), Bütel in’n Süüdwesten un Tesp in’n Westen.

Historie

Abendörp kummt 1230 as Vventhorp toeerst in de Oorkunnen vör, in dat Ratzborger Teegdregister, un hett to dat Bisdom Ratzborg tohöört. 1313 kummt dat in en annere Oorkunn denn as Ouendorpe vör.

In de Franzosentied von 1810 bet 1814 hett de Oort to de Mairie Addelborg in’n Kanton Bewick höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

In de Franzosentied is ok de Franzoseneek plant worrn, de in de Midd von dat Dörp stünn un in’n Juni 2008 rümmaakt warrn müss.

De Oort hett vör 1859 to dat Amt Addelborg tohöört un weer denn in dat Amt Lümborg. Na 1885 weer dat in’n Kreis Lümborg. 1932 is dat Deel von’n ne’en Landkreis Lümborg worrn.

De Oort is an’n 1. Juli 1972 bi de Gemeenreform in Neddersassen Deel von de Gemeen Tesp worrn un dorbi von’n Landkreis Lümborg na’n Landkreis Horborg wesselt.

In’n Eersten Weltkrieg sünd 15 Soldaten ut Abendörp fullen oder vermisst un in’n Tweten Weltkrieg 19^[1]. An’n 20. April 1945 sünd dör en Flegerangreep 22 Buurnhööv in Abendörp in Flammen opgahn. In dat Dörp steiht vondaag en Gedenksteen, de an dissen Dag denken lett.

Dat Dörp liggt in dat Rebeed von’n Leukämiecluster Elvmasch.

Inwahnertall

Johr	Inwahners
1812-00-001812^[2]	266
1824-00-001824^[3]	29 Füürsteden
1848-00-001848^[4]	277 Lüüd, 36 Hüüs
1910-12-011. Dezember 1910^[5]	302
1925-00-001925^[6]	320
1933-00-001933^[6]	306
1939-00-001939^[6]	310

Religion

Abendörp is evangeelsch-luthersch präägt un höört to dat Kaspel von de Nicolai-Kark in Addelborg.

För de Kathoolschen is de Marien-Kark in Lümborg tostännig.

Kultur

En Denkmaal för de Fullenen ut de twee Weltkrieg’ steiht in Abendörp an de Hauptstraat.

Verenen

Abendörp hett en egene freewillige Füürwehr.

Weertschop un Infrastruktur

Verkehr

Dör Abendörp löppt de Landsstraat 217, de in’n Süüdoosten bi Addelborg an de Bundsstraat 209 ran geiht un in’n Noordwesten na Tesp un Meschacht an dat Över von de Elv langs. Na Noordwesten is de Verkehr dör de Elv afsperrt. De nächsten Övergäng över de Elv sünd de Brügg von de B 404 twüschen Rönn un Geesthacht in’n Noordwesten un de Brügg von de B 209 twüschen Hohnstörp un Loonborg in’n Süüdoosten.

De nächsten Autobahnen sünd de Autobahn 25, von de de Anfang so 15 Kilometer in’n Noordwesten bi Geesthacht liggt, un de Autobahn 39, bi de de Opfohrt Lümborg-Noord so 18 Kilometer in’n Süden liggt.

De nächste Bahnhoff is so bi negen Kilometer wied weg in’n Oosten de Bahnhoff Loonborg an de Bahnlien Lübeck–Lümborg.