Mairie Addelborg
De Mairie Addelborg weer in de Franzosentied (1810 bet 1813) een von de fiev Mairien, in de de Kanton Bewick indeelt weer. De Seet weer in Addelborg. Se harr 2143 Inwahners.[1]
Historie
ännernDe Ümgegend von Addelborg hett vör de Franzosentied to’n Deel to de Elvmaschvaagdie von dat Amt Loonborg in dat Hartogdom Sassen-Loonborg höört. To’n annern Deel to de Huus- un Maschvaagdie von dat Amt Bleikd in dat Förstendom Lümborg, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Addelborg een von de twölv Mairien in’n Kanton Addelborg von’n Distrikt Lümborg, Departement von de Nedderelv.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Addelborg weer nu een von de fiev Mairien in’n Kanton Bewick, Distrikt Lümborg, Departement von de Nedderelv. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to fiev Mairien höört harrn: de Mairien Addelborg, Haunstörp, Tesp un Hittbargen ut’n Kanton Addelborg un de Mairie Garlstörp ut’n Kanton Bleikd. Von de Mairie Tesp is aver blots Abendörp an de Mairie Addelborg gahn. Tesp sülvs is in de Mairie Övermeschacht wesselt.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn. De Rebeden, de vörher to dat Hartogdom Sassen-Loonborg höört harrn, sünd mit’n Wiener Kungress as Amt Addelborg an dat Königriek Hannover fullen.
Öörd
ännernDor hebbt düsse Öörd tohöört:
- Kaiserriek Frankriek:[1]
- Addelborg (525 Inwahners), Mariendal, Rethschuer (14), Abendörp (266), Hittbargen (280), Sassendörp (154), Haunstörp (322), Wennwisch (168), Windmöhl bi Wennwisch, Grönendiek (19), Barför (126), Garlstörp (269)
Vondaag sünd düsse Öörd Deel von de Samtgemenen Scharnbeek un Elvmasch un de Gemeen Bleikd.
Footnoten
ännern- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 56
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 37