Amtsgericht Blomendal
Dat Amtsgericht Blomendal is een von de dree Amtsgerichten in’n Bezirk von dat Landgericht Bremen. Dat hett sien Seet in de Landraad-Christians-Straat 65a/67/69 in Blomendal binnen de Fre’e Hansestadt Bremen.
Dat Gericht is tostännig för den Stadtbezirk Bremen-Noord mit de Stadtdelen Blomendal, Borglesum un Vesack. För den Rest von Bremen is dat Amtsgericht Bremen tostännig.
Överornt Gerichten
ännernDat Amtsgericht Blomendal is dat Landgericht Bremen, dat Hanseaatsche Oberlandsgericht Bremen un de Bundsgerichtshoff in Karlsruhe överornt.
Vör 1879 weer dat Obergericht Veern överornt un denn bet 1943 dat Landgericht Veern.
Geschicht
ännernMit dat hannöversche Gerichtsverfatensgesett von’n 8. November 1850, dat an’n 1. Oktober 1852 in Kraft gahn is, sünd Verwaltung un Justiz kumplett trennt worrn un de Amtsgerichten sünd as ünnerst Gerichten inricht worrn. Dat Amtsgericht Blomendal is dor denn blangen dat Amt Blomendal nee schapen worrn. De Grenzen von Amt un Amtsgerichtsbezirk weren desülven.
1866 hett Prüßen dat Königriek Hannover annekteert un dor is de Provinz Hannover von worrn. Dat Gericht weer denn en prüüßsch Amtsgericht.
De eerste Tied na 1852 hebbt Amt un Amtsgericht all beid in dat Huus Blomendal seten. As Blomendal aver bilütten jümmer mehr anwussen is, is 1899 an de hüdige Steed en neet Gerichtgebüüd boot worrn, dat later denn noch fakener utboot worrn is.
1939 hett Prüßen de Gemenen Aumund, Blomendal, Farge, Grohn, Lesum un Schönebeck an Bremen afgeven. Dat Amtsgericht Lesum is to’n 1. Januar 1943 denn oplööst worrn un Aumund, Grohn un Schönebeck sünd Deel von’n Gerichtsbezirk Blomendal worrn. Dat Gericht weer nu breemsch. An’t Enn von’n Tweten Weltkrieg hett dat Gericht sien Arbeid instellt. Na en Order von de amerikaansche Militärregerung von’n 21. Juni 1945 kunn dat Amtsgericht denn aver al an’n 14. Juli 1945 de Arbeid wedder opnehmen.
In de Johren 1980 schull dat Amtsgericht ut Köstengrünn dichtmaakt warrn. Na Protesten von de Lüüd in Bremen-Noord is dor aver nix na passeert. De Bremer Senaat hett denn en Bestandsgarantie för dat Gericht geven. To’n 1. Januar 1989 is dat Oortsamt Borglesum ut den Bezirk von dat Amtsgericht Bremen in’n Bezirk von dat Amtsgericht Blomendal wesselt, üm den Bezirk grötter to maken un to stärken.
Vondaag is dat Gericht tostännig för Zivil-, Familien-, Straaf-, Grundbook-, Betreuungs-, Nalass- un Vullstreckungssaken.
Amtsrichters
ännern- ~1858: Gustav Ludwig Wilhelm Jungblut
Gerichtsgebüüd
ännernDat Gerichtsgebüüd is an’n 5. August 2010 as Denkmaal schuult worrn.[1] Dor höört dat Gericht sülvs, dat Fängnis un de Deenstvilla to. De Anlaag is 1896 bet 1899 boot worrn. Inwieht hebbt se dat an’n 11. Februar 1899. 1913/1914 is dat Gericht utboot worrn. Dorbi hebbt se en neet Fängnis boot un dat ole Fängnis to Gerichtsrüüm ümboot. 1968 is de Deenstvilla von 1896 ok to Gerichtsrüüm ümboot worrn. Dat Huus is vondaag dat Gebüüd B von dat Amtsgericht. Dat Fängnis von 1914 is denn ok to Gerichtsrüüm ümboot worrn. Dat is in’n Juni 1997 na dree Johren Botied trech ween. Dor is nu dat Grundbookamt ünnerbröcht.
Fängnis
ännernDat Fängnis, dat bet 1932 ok dat Polizeifängnis von’n Kreis Blomendal weer, is 1933 to en SA-Schutzhaft-Fängnis worrn. An’n 12. März 1933 hebbt dor al 30 Lüüd von de KPD seten un Enn März 1933 90 Lüüd ut de Arbeiderbewegung (87 von de KPD un dree Sozialdemokraten), ünner annern Wilhelm Ahrens un Willy Dehnkamp.[2] Vondaag gifft dat an dat Gerichtsgebüüd en Gedenktafel för de poor hunnert polietschen Gegners von’n Natschonalsozialismus, de hier 1933/1934 in Schutzhaft seten hebbt un faken von hier in Tuchthüüs oder Konzentrationslagers kamen sünd.[3]
Kiek ook bi
ännernFootnoten
ännern- ↑ Drei Auf einen Streich – Bremen hat drei neue Kulturdenkmäler. Landsamt för Denkmaalpleeg
- ↑ Ulrich Schröder: Rotes Band am Hammerand: Geschichte der Arbeiterbewegung im Landkreis Osterholz von den Anfängen bis 1933. Donat Verlag, Bremen 2007
- ↑ Gedenkstätten für die Opfer des Nationalsozialismus. Eine Dokumentation. Band 1. Bundeszentrale für politische Bildung, Bonn 1995, ISBN 3-89331-208-0, Sied 216
Weblenken
ännern- Websteed von dat Gericht (hoochdüütsch)
- Översicht över de Rechtsspröök von dat Amtsgericht Blomendal (hoochdüütsch)
Achem | Blomendal | Dorum (siet 1859) | Hagen (siet 1859) | Leendaal | Leessem (bet 1859) | Leh (siet 1859) | Oosterholt | Otterbarg (bet 1859) | Rodenborg | Snevern (bet 1859) | Veern | Zeven (bet 1859)
Koordinaten:53° 11′ N, 8° 35′ O