Ilhas de Sotavento

De Ilhas do Sotavento (port.: „Eilannen ünner’n Wind“ oder „Eilannen af vun’n Wind“) sünd en Inselgrupp vun de Kap Verden in’n Atlantik.

De vulkaanschen Kapverdischen Eilannen warrt in twee Gruppen ünnerdeelt: De nöördlichen Ilhas do Barlavento un de süüdlichen Ilhas do Sotavento. Disse Indeelen kummt vun den Passatwind, de bestännig ut Noordoost weiht. Vun dorher leegt de süüdlichen Eilannen op de Leesiet, also de Siet, de vun’n Wind afwendt is.

To de Sotaventos tellt veer grote un en poor lütte Eilannen. Brava, Fogo un Santiago sünd felsig-bargig un prägt vun landweertschopplich Nütten. Se hebbt vun de Kapverd’schen Eilannen de längste Historie wat de Inwahners angeiht. Op disse Eilannen leevt ok de meisten Lüüd. Dat veerte grote Eiland is Maio in’n Oosten vun de Sotaventos. De sütt mehr ut as Sal un Boa Vista, de to de Ilhas do Barlavento höört. Maio is vun’n de Landschap her flach un wöstenordig. Landweertschap speelt dorüm keen Rull. Fröher hett dat Eiland vun Solt leevt, dat hier wunnen warrn kann.

Twüschen Brava un Fogo gifft dat butendem noch en Koppel vun lüttere Eilannen, de as Ilhéus do Rombo tosamenfaat warrt un nich bewahnt sünd. De beiden gröttsten dorvun sünd de Ilhéu Grande un de Ilhéu de Cima. Dorto kamt ünner anner’n de lütteren Ilhéu do Rei, Ilhéu Sapado un Ilhéu Luís Carneiro. Dat gifft aver noch mehr vörlagerte lüttere Eilannen ok bi de annern groten Sotaventos, as t. B. de Ilhéu do Santa Maria, de in de Havenbucht vun Praia liggt.

Eilannen vun Kap Verde