Bredbeek
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Postleettall: | 27711 | |
| Vörwahl: | 04791 | |
| Geograafsche Laag: | Koordinaten:53° 15′ N, 8° 48′ O53° 15′ N, 8° 48′ O | |
|
| ||
Bredbeek (hoochdüütsch Bredbeck) is en Oort in de Gemeen Oosterholt-Scharmbeek in’n Landkreis Oosterholt, Neddersassen. Binnen de Gemeen höört de Oort to de polietsche Oortschop Freißenbüttel.
Geografie
ännernDe Oort liggt op de Oosterholter Geest. Bredbeek liggt an’n Möhlenbeek, de in de Hamm münnt.
De Naveröörd sünd Freißenbüttel in’n Noorden, Myhl in’n Oosten, Wist un Pennigbüttel in’n Süüdoosten, Westerbeek un Sandbekerbrook in’n Süüdwesten, Kattenhoorn in’n Westen un Elm in’n Noordwesten.
Historie
ännern1543 bestünn de Oort ut twee Hööv. Dor hett ok en Watermöhl an’n Möhlenbeek stahn.
1850 hett de Fabrikant Martin Schmand ut Scharmbeek en Hoff in Bredbeek köfft un em to en Herrnhuus mit Park utboot. 1889 hebbt de twee Bröder Wulff ut Geestmünn dat Herrnhuus övernahmen un dor en Gasthuus inricht. Aver al 1893 hett de Bremer Fabrikant Bergfeld (Koch & Bergfeld) denn dat Herrnhuus köfft.
Bergfeld hett ok de Watermöhl afrieten laten un dor later noch en Villa boot. De Familie Bergfeld is bet 1937 bleven. In dat Johr hett Carl Friedrich Wilhelm Borgward (Fohrtüügwarken Borgward) dat Land köfft. Dat Gelänn is denn ok bruukt worrn, dat junge Lüüd dor ehr Landjohr maken kunnen. Borgward hett dat Gelänn 1940 an’n Rieksfiskus Luftfohrt afgeven, de dor en Offzeerskasino inrichten wull. Dor is aver nix na kamen un de Besitt is stückwies verköfft worrn.
1942 hett de Landsversekerungsanstalt Ollnborg dat Herrnhuus övernahmen un dor en Lungenheilanstalt inricht, de bet an dat Enn von de Johren 1960 bestahn hett.
1971 hett de Landkreis Oosterholt Herrnhuus un Park köfft. 1974 hebbt se anfungen, dor en Jugendbildungssteed to boon, de 1976 denn trech weer. 1998 is ut de Jugendbildungssteed dat Tagungshuus Bredbeek worrn, dat as Egenbedriev von’n Landkreis arbeidt. 2013 is de Inrichtung as Heimvolkshoochschool anerkannt worrn un heet nu Bildungssteed Bredbeek. De Lännereen billt en separaten Bueree-Bedriev.
Verwaltungsgeschicht
ännernIn de Franzosentied hett de Oort toeerst 1810 bet 1811 binnen dat Königriek Westfalen to de Mairie Freißenbüttel in’n Kanton Oosterholt höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Scharmbeek in’n Kanton Oosterholt.
De Oort hett vör 1885 to de Vaagdie Scharmbeek von dat Amt Oosterholt tohöört. Na 1885 weer dat in’n Kreis Oosterholt, de 1932 mit’n Kreis Blomendal to’n ne’en un grötteren Kreis Oosterholt tohoopgahn is.
De Oort hett fröher to de Buurschop Freißenbüttel un later to de Gemeen Freißenbüttel höört, de an’n 1. März 1974 mit de Gemeenreform in Neddersassen Deel von de Gemeen Oosterholt-Scharmbeek worrn is. Sietdem höört Bredbeek binnen de Gemeen to de Oortschop Freißenbüttel.
Inwahnertall
ännern| Johr | Inwahners |
|---|---|
| 1791[1] | 7 Füürsteden |
| 1812[2] | 37 |
| 1824[3] | 7 Füürsteden |
| 1848[4] | 51 Lüüd, 8 Hüüs |
| 1. Dezember 1871[5] | 43 Lüüd, 6 Hüüs |
| 1. Dezember 1885[6] | 44 Lüüd, 6 Hüüs |
| 1. Dezember 1905[7] | 38 Lüüd, 6 Hüüs |
Religion
ännernBredbeek is evangeelsch-luthersch präägt un höört siet 1. Oktober 1992 to dat Kaspel von de Emmaus-Kark in Pennigbüttel. Vörher hett de Oort to dat Kaspel von de Willehadi-Kark in Scharmbeek höört.
För de Kathoolschen is de Hillige-Familie-Kark in Oosterholt-Scharmbeek tostännig.
De Doden warrt op’n Karkhoff Pennigbüttel begraven.
Weertschop un Infrastruktur
ännernFör Bredbeek is de freewillige Füürwehr Freißenbüttel mit tostännig.
Verkehr
ännernVon Bredbeek geiht en Straat in’n Oosten na Sandhusen an de Bundsstraat 74. De B 74 löppt in’n Noordoosten över Wallhöben, Kuhs un Basdaal na Bremervöör to un in’n Süüdwesten över Oosterholt-Scharmbeek un Hu’e na Bremen-Noord.
De Opfohrt 16 Bremen-Noord op de Autobahn 27/270 liggt so 14 Kilometer in’n Süüdwesten von Bredbeek an de B 74.
De nächste Bahnhoff is knapp veer Kilometer wied weg in’n Noordoosten de Bahnhoff Olenbüttel an de Bahnlien Bremen–Bremerhoben.
Footnoten
ännern- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 34
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 105
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 84
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 137
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 156
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 166
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 141
Weblenken
ännern- Websteed von de Bildungssteed (hoochdüütsch)
