Dietmar Danner

Dietmar Danner (* 29. November 1950 in Mannheim) is en ehmalger düütsch Footballspeler.

Sien Vader Walter Danner speel wiels den Tweeten Weltkrieg un nah sien Rückkehr ut den Fangenschap van 1949 bit 1951 in de eerst Mannschap vun den VfR Mannheim. Dietmar Danner sülvst fung bi Eintracht Plankstadt mit dat Footballspelen an, bevör he to den VfR Mannheim wesseln dee, wo he mit 18 Johren in dat Regionalligateam sien eersten Insatz harr.

1971 is de Linksfoot to Borussia Mönchengladbach wesselt, wo de Techniker un loopstarke Speler all in de eerst Saison to'n Stammspeler wurr un wo he tosommen mit Rainer Bonhof, Günter Netzer un Herbert Wimmer de Middelfeldass billen dee. Nahdem Netzer to Real Madrid un Bonhof mehr in de Afwehr spelen dee, bill Danner in de Saison 1973/74 tosommen mit Horst Köppel, Christian Kulik un Herbert Wimmer de Middelfeldreeg vun de Borussen, de in de Bundsliga Viezmeester wurrn. In de folgen Saison reck Danner sien eerst düütsch Meestertitel un in dat glieker Johr mit sien Mannschap ok den UEFA-Pokal.

In de Bundsliga-Saison 1975/76 hett he all 34 Spelen mitmaakt un ok de Meesterschap weer wunnen. He kreeg dornah aber Probleme mit sien Binnenband un den Meniskus un kunn in de folgen Johren blots noch dartig Spelen maken. In de Johren tovör weern dat 149 Spelen ween. Bi sien darte Meesterschap in de Saison 1976/77 keem he blots noch dreemal to'n Insatz un bi den tweeten UEFA-Pokalsieg wurr he in't Endspeel för noch 15 Minüüt inwesselt.

In de düütsch Natschonalmannschap keem Danner up söss Spelen van 1973 bit 1976. Sien letzt Lännerspeel weer dat Halffinale bi de Football-Europameesterschap 1976, as he to de Halftiet tegen Heinz Flohe utwesselt wurr. Danner kunn in de Natschonalmannschap nie an sien Vereensleistungen anknütten, harr aber ok regelmatig mit Verletzungen to kämpen.

Sien nächst Vereen weer denn in de Saison 1980/81 de FC Schalke 04 bi de he noch 19 Mal to'n Insatz keem aber ok glieks ut de Bundsliga afstiegen dee. Vun dor wessel he noch för een Johr to'n 1. FC Saarbrücken. 1982/83 hett he sien Loopbahn nah een Johr bi den Linzer ASK in Öösterriek afslooten.

Literatur

• Jürgen Bitter: Deutschlands Fußball-Nationalspieler. Das Lexikon. Sportverlag Berlin 1997, ISBN 3-328-00749-0

Weblenken

• Dietmar Danner in de Datenbank vun Fußballdaten.de
• Dietmar Danner up Kicker-online