Doolbröch

Wapen/Flagg	Koort
Basisdaten
Bundsland: Neddersassen Landkreis: Veern Gemeen: Langwedel
Inwahners:
Postleettall:	27299
Vörwahl:	04232
Geograafsche Laag:	52° 59′ N, 9° 13′ O

Doolbröch (hoochdüütsch Dahlbrügge) is en Dörp in de Gemeen Langwedel in’n Landkreis Veern, Neddersassen. Binnen de Gemeen Langwedel höört de Oort to de polietsche Oortschop Hobüttel.

Geografie

De Oort liggt op de Achem-Veerner Geest. Dat Water ut dat Rebeed flütt över Gravens na de Ole Aller un de Werser af.

De Naveröörd sünd Völkersen in’n Noorden, Heidkroog in’n Noordoosten, Oobering, Holbm un Schüülg’n in’n Oosten, Wall in’n Süüdoosten, Hobüttel, Nindörp un Förth in’n Süden, Langwedel in’n Süüdwesten un Langwedelermoor in’n Noordwesten.

Historie

Doolbröch kummt 1548 as Dalbrügge toeerst in de Oorkunnen vör.

Verwaltungsgeschicht

In de Franzosentied von 1810 bet 1814 hett de Oort to de Mairie Wall in’n Kanton Veern höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Huusvaagdie Veern in dat Amt Veern tohöört. Na 1885 weer dat in’n Kreis Veern, de 1932 mit’n Kreis Achem to’n ne’en un grötteren Kreis Veern tohoopgahn is.

De Oort hett al von öllers to de Buurschop un later to de Gemeen Hobüttel höört, de an’n 1. Juli 1972 mit de Gemeenreform in Neddersassen Deel von de Gemeen Langwedel worrn is. Sietdem höört Doolbröch to de Oortschop Hobüttel.

Inwahnertall

Johr	Inwahners
1791-00-001791	2 Füürsteden
1812-00-001812	23
1824-00-001824	2 Füürsteden
1848-00-001848	32 Lüüd, 5 Hüüs
1871-12-011. Dezember 1871	25 Lüüd, 6 Hüüs
1885-12-011. Dezember 1885	30 Lüüd, 6 Hüüs
1905-12-011. Dezember 1905	47 Lüüd, 11 Hüüs

Religion

Doolbröch is evangeelsch-luthersch präägt un höört to dat Kaspel von’n Doom to Veern.

För de Kathoolschen is de St.-Josef-Kark in Veern tostännig.

Kultur

Verenen

In Saken Schüttenvereen un Sportvereen sünd de Doolbröchers vör allen bi de Vereens in Hobüttel aktiv.

Weertschop un Infrastruktur

För Doolbröch is de freewillige Füürwehr Hobüttel mit tostännig.

Verkehr

Dör Doolbröch löppt de Landsstraat 155, de in’n Noordwesten över Völkersen na Postdörp un Otterbarg geiht un in’n Süden över Hobüttel un Nindörp na de L 158 ran. De L 158 föhrt in’n Noordwesten över Langwedel un Ädelsen na Achem un in’n Süüdoosten na Daulsen an de Bundsstraat 215. De B 215 wedder geiht von Daulsen in’n Noordoosten över Wall na Rodenborg un in’n Süden na Veern un Dörbern. Von de L 155 in Doolbröch geiht na Süüdwesten de Kreisstraat 10 na Langwedel af. En lüttjere Straat löppt von Doolbröch över Schüülg’n na Wall.

De nächste Autobahn is de Autobahn 27 (Afsnidd Bremen–Wasra). De Opfohrt 25 Veern-Noord liggt so fiev Kilometer in’n Süüdoosten von Doolbröch an de B 215.

De nächste Bahnhoff is so bi twee Kilometer wied weg in’n Süüdwesten de Bahnhoff Langwedel an de Bahnlienen Wunsdörp–Bremen un Ülzen–Langwedel. Disse Bahnhoff is ok inbunnen in dat Nett von de Regio-S-Bahn Bremen/Neddersassen.

Scholen

De Kinner ut Doolbröch gaht op de Grundschool Völkersen. Ganz fröher güngen de Kinner ok al in Völkersen na School. As Hobüttel 1895 en egen Schoolhuus kregen hett, güngen dor ok de Kinner ut Doolbröch hen. De Volksschool in Hobüttel hett 1969 wedder dichtmaakt.

Literatur

• Chronik der Gemeinde Holtebüttel: Holtebüttel, Dahlbrügge, Nindorf, Schülingen, Overing. 2006