Völkersen
| Wapen/Flagg | Koort | |
|---|---|---|
|
|
| |
| Basisdaten | ||
| Flach: | 17,716 km² | |
| Inwahners: | ||
| Hööchd: | 27 m över NN | |
| Postleettall: | 27299 | |
| Vörwahl: | 04232 | |
| Geograafsche Laag: | Koordinaten:53° 0′ N, 9° 14′ O53° 0′ N, 9° 14′ O | |
|
| ||
Völkersen (hoochdüütsch Völkersen) is en Dörp in de Gemeen Langwedel in’n Landkreis Veern, Neddersassen. Binnen de Gemeen billt de Oort de polietsche Oortschop Völkersen.
Bi Völkersen höört ok de lüttje Oort Spang un de Oortsdeel Neenfeld mit to.
Geografie
ännernDe Oort liggt op de Achem-Veerner Geest. Dat Water ut dat Rebeed flütt över Gravens na’n Goldbeek un wieder na de Ole Aller af. Dat Naturschuulrebeed Waller Moor liggt in’n Noordoosten.
De Naveröörd sünd Hoberloo un Hellweeg in’n Noorden, Bredenfellermoor, Bokel, Ahusen, Ebersen un Spang in’n Noordoosten, Heidkroog un Holbm in’n Oosten, Oobering, Schüülg’n un Wall in’n Süüdoosten, Doolbröch un Hobüttel in’n Süden, Langwedel un Dauben in’n Süüdwesten, Langwedelermoor in’n Westen un Allerdörp in’n Noordwesten.
Historie
ännernAn Sporen ut de Vörgeschicht gifft dat ünner annern dat Grootsteengraff Völkersen ut de Jungsteentied.
Völkersen kummt an’n 24. Mai 935 as Fokarsha toeerst in en Oorkunn vör, in de König Hinnerk I. de Kark in Hamborg un den Hambörger Arzbischop Unni bestätigt, dat de Eddelherr Willarius sien Besitt in negen Dörper bi Langwedel gegen Besitt von de Hambörger Kark tuuscht hett.
In’n Eersten Weltkrieg sünd 20 Soldaten ut Völkersen fullen oder vermisst un in’n Tweten Weltkrieg 48.[1]
Verwaltungsgeschicht
ännernIn de Franzosentied von 1810 bet 1814 hett de Oort to de Mairie Wall in’n Kanton Veern höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1885 to de Huusvaagdie Veern in dat Amt Veern tohöört. Na 1885 weer dat in’n Kreis Veern, de 1932 mit’n Kreis Achem to’n ne’en un grötteren Kreis Veern tohoopgahn is.
De Oort is an’n 1. Juli 1972 mit de Gemeenreform in Neddersassen Deel von de Gemeen Langwedel worrn. Sietdem billt Völkersen en Oortschop mit egen Oortsraad un Oortsbörgermeester.
Inwahnertall
ännern| Johr | Inwahners |
|---|---|
| 1791[2] | 21 Füürsteden |
| 1812[3] | 204 |
| 1848[4] | 296 Lüüd, 50 Hüüs |
| 1. Dezember 1871[5] | 365 Lüüd, 67 Hüüs |
| 1. Dezember 1885[6] | 388 Lüüd, 76 Hüüs |
| 1. Dezember 1905[7] | 442 Lüüd, 81 Hüüs |
| 1. Dezember 1910[8] | 474 |
| 1925[9] | 507 |
| 1933[9] | 559 |
| 1939[9] | 540 |
Religion
ännernVölkersen is evangeelsch-luthersch präägt un höört to dat Kaspel von’n Doom to Veern.
För de Kathoolschen is de St.-Josef-Kark in Veern tostännig.
Oortsraad
ännern| Johr \ Partei | Tall | CDU | SPD | Gröne |
|---|---|---|---|---|
| 2016 | 5 | 2 | 1 | 2 |
- Liddmaten
- 2016:
- CDU: Heinrich Clüver, Frank Tödter
- SPD: Petra Henke
- Gröne: Andreas Noltemeyer, Inge Vogel
Oortsbörgermeesters
ännern| Tied | Naam | Partei |
|---|---|---|
| opstunns | Andreas Noltemeyer | Gröne |
Kultur
ännernEn Denkmaal för de Fullenen ut de twee Weltkrieg’ steiht in Völkersen op’n Karkhoff.
Verenen
ännernDe Schüttenvereen Völkersen is in’n Mai 1905 grünnt worrn.
Weertschop un Infrastruktur
ännernVölkersen hett en egene freewillige Füürwehr, de 1939 grünnt worrn is.
Verkehr
ännernDör Völkersen löppt de Landsstraat 155, de in’n Noordwesten över Allerdörp un Stellsfellen na Postdörp un Otterbarg geiht un in’n Süden över Doolbröch un Hobüttel na Nindörp an de L 158. Von Völkersen na Noorden löppt de Kreisstraat 24 na Hoberloo un in’n Oosten de Kreisstraat 31 na Heidkroog an’e Bundsstraat 215. De B 215 löppt in’n Noordoosten över Ebersen un Ünnerst na Rodenborg un in’n Süden över Wall un Daulsen na Veern un Dörbern.
De nächste Autobahn is de Autobahn 27 (Afsnidd Bremen–Wasra). De Opfohrt 25 Veern-Noord liggt so söven Kilometer in’n Süüdoosten von Völkersen an de B 215 un de Opfohrt 24b Langwedel söven Kilometer in’n Süüdwesten an de K 9.
De nächste Bahnhoff is so bi veer Kilometer wied weg in’n Süüdwesten de Bahnhoff Langwedel an de Bahnlienen Wunsdörp–Bremen un Ülzen–Langwedel. Disse Bahnhoff is ok inbunnen in dat Nett von de Regio-S-Bahn Bremen/Neddersassen.
Scholen
ännernIn dat Dörp liggt de Grundschool Völkersen.
Lüüd
ännernDe Politiker Andreas Mattfeldt is 1969 in Völkersen boren.
Footnoten
ännern- ↑ Onlineprojekt Gefallenendenkmäler
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 236
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 101
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 155
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 164
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 174
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 180
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
Dauben | Ädelsen (mit Cluvenhagen, Hagen-Grinnen, Giersbarg un Steenbarg) | Hoberloo | Hobüttel (mit Doolbröch, Nindörp, Schüülg’n, Oobering un Förth) | Langwedel (mit Langwedelermoor) | Völkersen (mit Spang)