Elv-Werser-Dreeeck

Dat Elv-Werser-Dreeeck is dat Rebeed, dat twüschen de Münnen von Elv un Werser liggt. De Münn von de Elv un de verlängerte Lien von de Wersermünn draapt sik bi Cuxhoben. De annern beiden Ecken von dat Dreeeck warrt von de Städer Bremen un Hamborg billt. De Süüdgrenz is nich nipp un nau fast.

Koort mit dat Elv-Werser-Dreeeck

To dat Dreeeck höört de dree hüdigen Landkreise Stood, Cuxhoben un Oosterholt, de Stadt Bremerhoben un de Noorden von’n Landkreis Rodenborg. Dat is groff dat Rebeed von’n Landschopsverband Stood. Fröher hett dit Rebeed to Bremen-Veern tohöört un later denn to’n Regerungsbezirk Stood.

Dat Land is vör allen sied. De Landschopsformen sünd Wadd, Moor, Masch un Geest (deelwies mit Heid). De höögsten Bargen sünd Moränen ut de Saal-Iestied un nich höger as 75 m över de See (de höögste Barg is de Sülverbarg in de Wingst). To de Landschoppen höört Wusten, Hadeln, Landwöörden, Keden, dat Düvelsmoor un Oolland.

Strööm in dat Dreeeck sünd Oost, Geest, Luun, Swing, Eest, Wümm un Hamm.

De Noorden, besünners langs de Elv, de Werser un de Oost is Masch. Wat wieder af von de Strööm liggt denn faken Moor. De Süden is von de Stoder Geest präägt un in’n Westen löppt mit de Hoge Lieth en Geesttung bet na de büterste Eck von dat Dreeeck bi Cuxhoben. An de Südenkant geiht de Landschop in de Lümbörger Heid över.