Elsdörp (Landkreis Rodenborg)

Oort in’n Landkreis Rodenborg (Wümm), Neddersassen
Wapen/Flagg Koort
Wapen unbekannt
Elsdörp
Laag vun Elsdörp in Düütschland
Basisdaten
Bundsland: Neddersassen
Landkreis: Rodenborg (Wümm)
Samtgemeen: Zeven
Gemeen: Elsdörp
Inwahners:
Postleettall: 27404
Vörwahl: 04286
Geograafsche Laag:
Koordinaten:53° 15′ N, 9° 21′ O
53° 15′ N, 9° 21′ O

Karte

Elsdörp is de Hauptoort von de Gemeen Elsdörp in de Samtgemeen Zeven, Landkreis Rodenborg, Neddersassen.

Bi dat Dörp Elsdörp höört von öllers ok de Oortsdelen Badenhorst, Bockhorst, Borg Elsdörp, Borgwall un Poitzendörp mit to.

Geografie un Geologie ännern

De Oort liggt op de Zevener Geest. Dat Water ut dat Rebeed flütt över’n Osenhorster Beek un den Bargelbeek na de Meh-Au hen af.

De Naveröörd sünd Frankenbossel in’n Noorden, Poitzendörp, Rüspel, Ehsdörp un Hatz in’n Noordoosten, Badenhorst, Bockhorst un Abbendörp in’n Süüdoosten, Heesdörp in’n Süden, Borg Elsdörp, Borgwall un Jeem in’n Süüdwesten, Osenhorst, Wehldörp un Bahnhoff Elsdörp in’n Westen un Wist mit Hoffkoh in’n Noordwesten.

En Översicht över de Geologie un Entstahn vun dat Rebeet vun’n helen Landkreis is in den Artikel Landkreis Rodenborg (Wümm) beschreven un kann dor naleest waarn.

Historie ännern

Elsdörp weer 1130 to’n eersten Maal in en Oorkunn as Ellestorp nöömt, later in de Historie weer dorut Elletorp. Üm de Tiet rüm weer Elsdörp Landbesitt vun de Graafsche Ida vun Elsdörp, de en Dochter vun’n Palzgraafen Otto vun Swaben un Broderdeern vun Konrad III. weer. Op de fröhere Borg wiest vundaag blots noch de Naam vun’n Oortsdeel Borg Elsdörp hen, wo de Borgwall noch to finnen is.

In’n Eersten Weltkrieg sünd 32 Soldaten ut Elsdörp fullen oder vermisst un in’n Tweten Weltkrieg 71.[1]

Verwaltungsgeschicht ännern

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Elsdörp in’n Kanton Zeven höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Zeven in’n Kanton Zeven.

De Oort hett vör 1885 to de Böörd Elsdörp in dat Amt Zeven tohöört. Na 1885 weer dat in’n Kreis Zeven. 1932 is dat Deel von’n Kreis Bremervöör worrn un 1977 von’n Landkreis Rodenborg.

De beiden Öörd Borg Elsdörp un Borgwall hebbt fröher en Gemeenverband mit Osenhorst billt. Eerst later is Osenhorst an de Gemeen Wist kamen un Borg Elsdörp un Borgwall an Elsdörp.

De Gemeen weer Maat von de Samtgemeen Elsdörp un is an’n 1. März 1974 mit de Gemeenreform in Neddersassen mit de Gemenen Ehsdörp, Frankenbossel, Hatz, Rüspel un Volkens tohoopgahn un hett de nu düüdlich vergröttere Gemeen Elsdörp billt.

Inwahnertall ännern

Johr Inwahners
1791-00-001791[2] 24 Füürsteden
1824-00-001824[3] 38 Füürsteden
1848-00-001848[4] 325 Lüüd, 49 Hüüs
1871-12-011. Dezember 1871[5] 332 Lüüd, 58 Hüüs
1885-12-011. Dezember 1885[6] 320 Lüüd, 59 Hüüs
1905-12-011. Dezember 1905[7] 352 Lüüd, 60 Hüüs
1910-12-011. Dezember 1910[8] 533*
1925-00-001925[9] 554*
1933-00-001933[9] 556*
1939-00-001939[9] 610*
* tohoop mit Badenhorst, Bockhorst, Borg Elsdörp, Borgwall un Poitzendörp

Religion ännern

Elsdörp is evangeelsch-luthersch präägt un billt mit de Allerhilligenkark en egen Kaspel. De Kark is in dat 11. Johrhunnert toeerst betüügt un villicht ut en fröhere Dööpkark entstahn. 1797/98 is de hüütige Bo entstahn, de ut Findlingen boot is.

För de Kathoolschen is de Christ-König-Kark in Zeven tostännig, de siet 1. November 2006 to de Karkengemeen Corpus Christi in Rodenborg tohöört.

Kultur ännern

En Denkmaal för de Fullenen ut de twee Weltkrieg’ steiht in Elsdörp op’n Karkhoff.

Verenen ännern

De Schüttenvereen Elsdörp is an’n 10. Juni 1914 grünnt worrn.

Weertschop un Infrastruktur ännern

 
Sprüttenhuus in Elsdörp

Elsdörp hett en egene freewillige Füürwehr, de an’n 23. Januar 1930 grünnt worrn is.

Verkehr ännern

Dör Elsdörp löppt de A 1. In’t Johr 2012 is na lange Botiet de Anslusssteed 48 Elsdörp fardigstellt worrn. Dorför geev dat dor al en Nootaffohrt na de L 131, de vun Bofohrtüüch un Nootfallwagens bruukt warrn künn. Dat Deelstück twüschen Zittens un Bokel weer mit mehr as 20 km neemlich düchtig lang wesen. De L 131 föhrt in’n Noordwesten na Zeven un in’n Süüden an de B 71, de wieter na Rodenborg (Wümm) geiht. Över de K 126 kummt man na Süüdwesten wieter na Jeem. Na Noordoosten rut, föhrt de K 126 över Rüspel un Volkens an de L 142, de Zittens mit Zeven verbinnt. An de L 142 över Weertzen föhrt ok de K 130, de bi Volkens aftwiegt un de K 132, de in Rüspel anfangt.

De nächste Bahnhoff is so bi 14 Kilometer wied weg in’n Süüdoosten de Bahnhoff Scheeßl an de Bahnlien Hamborg–Bremen. Von 1906 bet 1968 hett dat ok Personenverkehr op’n Bahnhoff Elsdörp an de Bahnlien Bremervöör–Wasra geven. De Bahnhoff liggt een Kilometer in’n Noordwesten von Elsdörp op dat Rebeed von Wist.

Bedrieven ännern

Över de Gemeen rut sünd twee Bedrieven ut Elsdörp bekannt. Dat een is de Elsdörper Fienkost AG un dat annere de Heidbloom Molkeree Elsdörp-Rodenborg e.G..

Scholen ännern

Elsdörp hett en egen Grundschool un en Kinnergoorn.

Footnoten ännern

  1. Onlineprojekt Gefallenendenkmäler
  2. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 67
  3. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 166
  4. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 141
  5. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 170
  6. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 182
  7. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 194
  8. Inwahnertallen op gemeindeverzeichnis.de
  9. a b c Inwahnertallen op verwaltungsgeschichte.de