Lütt Ohlers

Wapen/Flagg	Koort
Basisdaten
Bundsland: Neddersassen Landkreis: Stood Samtgemeen: Harsfeld Gemeen: Ohlers
Inwahners:
Postleettall:	21702
Vörwahl:	04166
Geograafsche Laag:	53° 24′ N, 9° 30′ O

Lütt Ohlers (hoochdüütsch Klein Ahlerstedt) is en lütten Oort in de Gemeen Ohlers (Samtgemeen Harsfeld) in’n Landkreis Stood, Neddersassen. De Oort höört to Ohrensmoor un warrt tohoop mit Depenrehmen ok as Deel von Ohrensmoor-Noord ansehn.

Geografie

De Oort liggt op de Stoder Geest. Dat Water ut dat Rebeed flütt in’n Westen över de Au af, in’n Süüdoosten över de Ramm un in’n Noordoosten över’n Griemsbeek na’n Steenbeek un wieder na de Au. In’n Noorden liggt dat Naturschuulrebeed Braken, Harslah, Kahl un Wild Moor.

De Naveröörd sünd Harsfeld in’n Noorden, Griemshorst, Kommerbusch un Remnoh in’n Noordoosten, Wiegersen in’n Süüdoosten, Ohrensmoor-Oost in’n Süden, Ohrensmoor-West in’n Süüdwesten, Ohlers in’n Westen un Hollenbeek in’n Noordwesten.

Historie

Lütt Ohlers is 1825 as Anbo in dat Moor von Ohlers ut anleggt worrn. 1955 hett Ohlers düssen Oort aver an Ohrensmoor afgeven.

Verwaltungsgeschicht

Vör 1885 weer dat Dörp in de Böörd Ohlers binnen dat Amt Harsfeld. Na 1885 hett dat denn to’n Kreis Stood höört un von 1932 af an to’n hüdigen Landkreis Stood.

De Oort hett fröher jümmer to de Gemeen Ohlers un denn von 1955 bet 1972 to de Gemeen Ohrensmoor höört. Mit de Gemeenreform in Neddersassen an’n 1. Juli 1972 is de Gemeen Ohrensmoor Deel von de düüdlich gröttere Gemeen Ohlers worrn.

Inwahnertall

Johr	Inwahners
1871-12-011. Dezember 1871	36 Lüüd, 8 Hüüs
1885-12-011. Dezember 1885	35 Lüüd, 8 Hüüs
1905-12-011. Dezember 1905	36 Lüüd, 8 Hüüs

Religion

Lütt Ohlers is evangeelsch-luthersch präägt un höört to dat Kaspel Ohlers.

För de Kathoolschen is de St.-Michaels-Kark in Harsfeld tostännig, de siet 1. September 2010 to de Karkengemeen Mariä Himmelfohrt in Buxthu höört.

Weertschop un Infrastruktur

För Lütt Ohlers is de freewillige Füürwehr Ohrensmoor mit tostännig.

Verkehr

Dör Lütt Ohlers löppt de Landsstraat 127, de in’n Noordoosten över Kommerbusch-Remnoh un Obbens na Buxthu geiht un in’n Süüdwesten över Ohrenswohl na Wangersen an de L 124. De L 124 löppt von dor wieder na Heeßel un Zeven. Von de L 127 geiht in’n Westen de Kreisstraat 75 na Ohlers un in’n Süden de K 59 na Ohrensmoor-Oost un Woonst af. Na Noorden kummt een över de K 79 na Griemshorst un von dor över de K 53 na Harsfeld.

De nächste Autobahn is de Autobahn 1 (Afsnidd Hamborg–Bremen). De Opfohrt 46 Heidenau liggt so 14 Kilometer in’n Süüdoosten von Lütt Ohlers an de K 15. Aver ok de Opfohrt 5 Hornborg op de A 26 (Afsnidd Hamborg–Stood) is mit 15 Kilometer in’n Noordoosten nich veel wieder weg.

De nächste Bahnhoff is so bi söss Kilometer wied weg in’n Noorden de Bahnhoff Harsfeld an de Bahnlien Bremerhoben–Buxthu.

Scholen

De Schölers ut Lütt Ohlers gaht na de Grundschool Ohlers un later na de Oberschool Ohlers oder na dat Au-Geest-Gymnasium Harsfeld.