Loomst

Loomst (hoochdüütsch Lamstedt) is en Dörp in de Gemeen Loomst, Samtgemeen Loomst, in’n Landkreis Cuxhoben, Neddersassen. Loomst is vondaag mit dat fröhere Dörp Köben tohoopwussen.

Wapen/Flagg	Koort
Basisdaten
Bundsland: Neddersassen Landkreis: Cuxhoben Samtgemeen: Loomst Gemeen: Loomst
Inwahners:	2.423 (2009-12-3131. Dezember 2009)
Geograafsche Laag:	53° 38′ N, 9° 6′ O
Laag von Loomst in de Gemeen Loomst (Koort lett sik anklicken)

Luftbild von dat Dörp Loomst von Süden keken (2013)

Dat Bördehuus in Loomst

Wapensteen mit’n plattdüütschen Naam an de Bundsstraat 495 (Oortsingang von Süden her)

Geografie

Loomst liggt op de Geest. So üm un bi fiev Kilometer na’n Süüdoosten loopt de Meh un de Oost an Loomst langs. Dat Water ut’n Westen von Loomst warrt över den Sether Kanaal un den Loomster Kanaal na de Oost hen afföhrt. Dat Water in’n Süüdwesten flütt över de Gösch af. Mit’n Westerbarg in’n Noorden un ’n Toslag in’n Süden liggt Loomst twüschen twee Wooldrebeden.

De Naveröörd sünd Rahden in’n Noorden, Hockmöhlen in’n Noordoosten, Ihlbeek in’n Oosten, Lüttmöhlen un Seth in’n Süüdoosten, Nindörp un Armsdörp in’n Süden, Hoorn in’n Süüdwesten un Mittelsnohn in’n Westen.

Historie

In de Oorkunnen kummt Loomst toeerst in de Tied 1111 bet 1116 as parochia Lamestede vör un weer dormit en egen Kaspel.

In’n Eersten Weltkrieg sünd 54 Soldaten ut Loomst fullen oder vermisst un in’n Tweten 119. In’n Düütsch-Franzööschen Krieg von 1870/1871 sünd acht Lüüd ut de Börde fullen, dorvon een ut Loomst sülvs.

Verwaltungsgeschicht

Vör 1859 weer Loomst Hauptoort von de Vaagdie Loomst in dat Amt Bremervöör un denn von 1859 bet 1885 in dat Amt Oosten. 1885 is dat an’n Kreis Neehuus gahn un 1932 an’n Kreis Land Hadeln. 1977 is dat denn Deel von’n Landkreis Cuxhoben worrn.

Inwahnertall

Johr	Inwahners
1824-00-001824	122 Füürsteden
1848-00-001848	1.088 Lüüd, 179 Hüüs
1858-00-001858	1.165
1885-00-001885	1.229
1910-12-011. Dezember 1910	1.364
1925-00-001925	1.328
1933-00-001933	1.247
1939-00-001939	1.307
2009-12-3131. Dezember 2009	2.423

Religion

Bartelmees-Kark in Loomst

Loomst is evangeelsch-luthersch präägt un billt en egen Kaspel. De Bartelmees-Kark is de Kaspel-Kark.

För de Kathoolschen is de St.-Ansgar-Kark in Warstood tostännig, de siet 2010 Deel von de Karkengemeen Hillig Geist in Stood is.

Kultur

Denkmaals för de Fullenen ut de twee Weltkrieg’ staht bi de Kark. En Gedenktafel för de Fullenen in’n Düütsch-Franzööschen Krieg von 1870/1871 hängt in de St.-Bartholomäus-Kark.

In Loomst liggt dat Norddüütsche Radiomuseum.

Verenen

De Schützenvereen Loomst is 1886 grünnt worrn.

Weertschop un Infrastruktur

Loomst gellt na dat Regionale Ruumordnungsprogramm as Grundzentrum för de Öörd in de Ümgegend.

De freewillige Füürwehr Loomst is 1891 grünnt worrn.

Verkehr

Loomst liggt an de Bundsstraat 495, de in’n Noorden bi Hemmoor an de Bundsstraat 73 ranlöppt. In’n Süden löppt de B 495 över Eversdörp na Bremervöör. Von Oosten von Heckthusen kummt de Landsstraat 116, de in’n Westen na Beers wiederlöppt. Na Nindörp un Hollen löppt de Kreisstraat 32. Na Noordwesten geiht de K 21 dör Köben na Bröckelbeek. Lüttjere Straten gifft dat ans na Lüttmöhlen un Ihlbeek.

De nächste Autobahn is de Autobahn 26 (Afsnidd Stood–Hamborg). De Opfohrt 2 Stood-Süüd liggt so 31 Kilometer in’n Oosten von Loomst. De Opfohrt 5 Debst op de Autobahn 27 (Afsnidd Cuxhoben–Bremerhoben) liggt so 33 Kilometer in’n Westen.

De nächste Bahnhoff is so bi negen Kilometer wied weg in’n Noordoosten de Bahnhoff Hemmoor an de Nedderelvbahn.

Scholen

Loomst hett en Grundschool, en Hauptschool un en Realschool.

Ünnernehmens

Luftbild von Möbel Steffens (2013)

Spoorkass in Loomst 2011 (to de Tied noch Kreisspoorkass

In de Hemsothstraat harr de Volksbank Stood-Cuxhoben en Filiaal, de an’n 28. April 2017 dichtmaakt hett. In de Lütte Straat hett de Spoor- un Dorlehnskass Böörd Loomst-Heckthusen ehr Filiaal un in de Grote Straat de Werser-Elv-Spoorkass.

Dat Ünnernehmen Möbel Steffens is en Möbelhuus mit över 20.000 m² Utstellungsfläch. Dat geiht trügg op en lüttje Saadler- un Pulster-Warksteed, de Klaus Steffens 1933 in Loomst grünnt hett. 1997 is dat Ünnernehmen in dat hüdige Gebüüd an’n Süüdrand von Loomst intagen.

Freetied

Mit dat „Lambada“ hett Loomst en egen Hallenbad.

Lüüd

De Footballspeler un -trainer Wolfgang Rolff is in Loomst boren. Ok de Fabrikant Claus Spreckels, de in de USA Suckerfabriken opmaakt hett, stammt ut Loomst. De Billermakersche Ursula Kirchberg leevt von 1981 af an in Loomst.